TLAJTLANILI 9
¿Kinamiki nitlaneltokas ipan evolución?
TA, ¿TLAKE TIJCHIUASKIA?
Ximoiljui ni: Alex ayokmo kimati tlake kineltokas. Ya kimajtoya toTeotsij kichijchijki nochi tlen onka, uan nama itlamachtijka kiiljuia nochi iselti pejki onka, kiijtoua katli tlauel ixtlamatij kiitstokej nelia nopa evolución. Alex amo kineki mopinaualtis, yeka moiljuia: “Tlaj katli tlauel ixtlamatij kiijtouaj nelia nopa evolución, uajka kinamiki amo tleno nikijtos, pampa inijuantij kena tlauel ixtlamatij”.
Tlaj ta nojkia mitspanoskia kej Alex, ¿tijneltokaskia nopa evolución san pampa miak amochtli ya nopa kiijtoua?
ACHTOUI KUALI XIMOILJUI
Maske miakej maseualmej nima kiijtojtiuetsij tlaneltokaj ipan evolución o kineltokaj se akajya kichijchijki nochi tlen onka, amo uelij kiixtomaj kenke kineltokaj nopa.
-
Sekij kineltokaj se akajya kichijchijki nochi tlen onka pampa ya nopa kinmachtijkej ipan iglesia.
-
Sekinok tlaneltokaj ipan evolución pampa ya nopa kinmachtijkej ipan escuela.
XIJNANKILI NI CHIKUASEJ TLAJTLANILI
Hebreos 3:4 kiijtoua: “Nochi kaltinij kipiaj ajkia kinchijchijtok, pero toTeko Dios, yajaya tlen kichijchijtok nochi tlen onka”. ¿Timoiljuia nelia tlen kiijtoua ni texto?
Tlaj timoiljuiskiaj se kali iselti mochijchijki, tijnextiskiaj tlauel amo titlalnamikij. Nojkia kiampa panoskia tlaj timoiljuiskiaj amo aka kichijchijki nochi tlen onka.
TLEN SEKINOK KIIJTOUAJ: Nochi tlen onka yolki kema ipan iluikaktli tlatoponki, nopa kitokaxtiaj Big Bang.
1. ¿Tlake o ajkia kichijki ma pano nopa Big Bang?
2. ¿Kinamiki timoiljuisej sanima yolki nochi tlen onka, o kualtiaskia tijneltokasej nochi tlen onka eltok pampa se akajya kichijchijki?
TLEN SEKINOK KIIJTOUAJ: Tiualauij tlen tlapialmej.
3. Tlaj tiualauij tlen tlapialmej, uelis tlen nopa changos, ¿uajka kenke tojuantij kena tlauel titlalnamikij uan inijuantij amo?
4. Tlaj amo aka kinchijchijki, ¿kenke se keski tlamantli tlen yoltok uan tlapialmej amo san kejueli eltok inintlakayo uan ouij tijkuamachiliaj kenijkatsa yolij?
TLEN SEKINOK KIIJTOUAJ: Katli ixtlamatij kiijtouaj nelia nopa evolución.
5. Katli kiampa kiijtoua, ¿tlaneltoka ipan evolución pampa nojkia kiitstok nelia o san pampa sekinok kiiljuijtokej?
6. ¿Keskij maseualmej tlaneltokaj ipan evolución san pampa sekinok kiniljuijtokej nochi katli tlalnamikij kineltokaj nopa?
“Ximoiljui tikalaki ipan se ueyi kuatitlamitl, uan kema tinejnentia tikita eltok se yejyektsi kali. Uelis amo tikijtoskia ni: ‘¡Nelia yejyektsi ni kali! Nesi uetski se keski kuauitl uan iselti mochijki ni kali’. ¡Amo kema tikijtoskia nopa! Uajka, nojkia amo kinamiki tikijtosej nochi tlen onka iselti yolki o mochijki” (Julia).
“Tlaj se akajya mitsiljuiskia tlatoponki kampa kichijchiuaj amatlajkuiloli, uan nopa tinta kampa ueli toyajki uan teipa mochijki se diccionario, ¿tijneltokaskia tlen mitsiljuia?” (Gwen).
¿KENKE MONEKI NITLANELTOKAS IPAN TOTEOTSIJ?
Biblia kiijtoua moneki kuali tijtekiuis ‘motlalnamikilis’ (Prov. 3:21). Ni kiijtosneki amo titlaneltokas ipan toTeotsij san pampa ya nopa:
-
TIJYOLMATI: “Nimoiljuia uelis kena itstok se akajya tlen kichijchijki nochi tlen onka”.
-
KINELTOKAJ SEKINOK: “Kampa niitstok nochi tlaneltokaj ipan toTeotsij”.
-
KINEKIJ XIJNELTOKA: “Nochampoyouaj nechiljuiaj moneki nitlaneltokas ipan toTeotsij”.
Uajka, kinamiki ta tijmatis kenke titlaneltoka ipan toTeotsij.
“Kema nijkaki kenijkatsa notlamachtijka kiixtoma nochi tlen kichiua totlakayo, kichiua ma nimotemachi toTeotsij nelia itstok. Nochi tlen tijpiaj ipan totlakayo kipia iteki maske kemantika timoiljuiskiaj san tlapik se keski tlamantli tlen tijpixtokej. Tojuantij amo tijmatij nochi tlen kichiua totlakayo. ¡Nelia tlauel kuali!” (Teresa).
“Kema nikita se uejkapantik kali katli kipia miak pisos, se ueyi akali o se carro, nimotlajtlania: ‘¿Ajkia kichijchijki?’. Se akajya moneki kuali tlalnamikis uan kiampa uelis kichijchiuas se carro, pampa kipia miak tepostli uan nochi moneki kuali mosajsalos uan kiampa kuali tekitis. Tlaj se carro amo iselti mochijchiua, uajka maseualmej nojkia amo ininselti yolkej, monejki se akajya ma kinchijchiua” (Richard).
“Kema nimomachtiyaya nochi tlen onka, nikitayaya nopa evolución amo nelia. [...] Nimoiljuia tlauel ouij se kineltokas nopa evolución, uan amo ouij se kineltokas itstok se akajya katli kichijchijki nochi tlen onka” (Anthony).
XIMOILJUI IPAN NI TLAMANTLI
Maske nopa científicos tlauel miak xiuitl momachtijtokej, nojua amo kikuamachiliaj miak tlamantli, uan amo nochi sanse kiijtouaj tlen nopa evolución. Tlaj inijuantij amo sanse tlen kineltokaj maske ixtlamatij, uajka amo kenijki tlaj ta nojkia amo titlaneltoka ipan evolución.
Tlen nojkia mitspaktis tikitas
WHAT YOUR PEERS SAY
¿Kinamiki titlaneltokas ipan toTeotsij?
Xikinixmati omej telpokamej katli motlajtlaniyayaj miak tlamantli uan tlake kinpaleuik nojua kuali ma tlaneltokakaj.
