Nikolasi tsî Seline hâra ge ǀkhara ǃgomsiba gere hōǃâ. ǁÎra ge Fransi ǁnâub beros xa ge ǁgaumâihe î ra, ǀasa ǀhaohâba ǃoa doe. ǁÎra ge ra mî: “ǂGurom ge kaise ge ǂkhî-i xawem ge ega sîm ǀhōsana ge ǁkhore tsoatsoa. Sîm ge noxopa ǀgaisa ǀhōsagusisa ǀasa ǀhaohâb ǃnâ hâ ǃgâsan ǀkha ge omkhâi tama hâ i.” a ǃGom ǁkhā î a, amaga du mati ǂkhîba ūhâ tsî ǃgâise a dī ǁkhā ǀasa ǀhaohâba ǃoa du ga doe o? Nauna tae-e a dī ǁkhā hui dus ǃaroma? Mâ ǀgaugu ǃnâ du ǂkhâǃnâhe tsî nauna a ǂkhâǃnâ ǁkhā sadu ǀasa ǀhaohâb ǃnâ?

HAGA DAOǁGAUDI ǀKHARAǀKHARAN ǀKHA HUI DU ǁKHĀN

1. Jehovab ai ǂgomaiǂnûi. (Psa. 37:5) Kasumis ge 20 kurigas hâǃnâ hâ ǀhaohâba xu ge doe, ǁîs aob ge ǀasa sîsenni ǀkha ǀnî hâ ǃāsa ǃoa a doe o. Matis ge Jehovab “ai ǂgomaiǂnûi”? ǁÎs ge ra mî: “Jehovaba ta ge ǀuritsâsens tsî ǂâiǂhansendi hōǃâ ta gere di xa ge mîba. ǁNāsa ta gere dī ǁaeb hoabab ge ǂkhâ ta hâ ǀgaiba gere māte.”

Mati du Jehovab ai ǃnāsase ǂgomǃgâ ǁkhā? Hais ǁgammi tsî ǃhūb tsîna ǂhâ hâ î-i kai khami i ge sida ǂgoms tsîna ǂûmahesa ǂkhâ hâ īs kai. Nikolab ǂguro da goro ǃhoaǃgaob ge Abrahammi, Jesub tsî Paulub aiǁgaudi xa gere ǂâiǃgâ, Elob ǂâisa dīs ǃaroma ge ǂgui ǁguibade a dī ga. Nēs ge ǃnāsa ǂgomǃgâsiba ge mābi Jehovab nî hui bisa. Tsēs hoasa du ga Elobmîsa ôaǃnâ os ge nēsa sadu ûib ǃnâ du ra dī ǀkharaǀkharan ǀkha nî hui du. Tsî du ge nî ǁkhāǁkhāsen mati du nauna ǀasa ǀhaohâb ǃnâ ǂkhâǃnâ ǁkhā ǀgausa.

 2. Tā ǀoro ǀhaohâba ǀasab ǀkha ǀgopeǀnō. (Aoǁn. 7:10) Amerikaba ǃoab ge Beninsa xu doe, ob ge Julesa ǃkharagagu khaoǃhūga ūhâ khoen ǀkha ge ǀhao. “ǀHao-ū ta ra khoe-i hoa-e ta ti ûib xa nî mîba khami ta ge gere tsâ,” tib ge ra mî. ǁÎb ge ǁnaeti hâ i ǀgauba xus ge nēsa ge ǀkhara i tsîb ge ǁnās xa ǃaromahe hâse ge ǀguriǀgurisen tsoatsoa. Xaweb ge ǃgâsana ǃgâise ǂan tsoatsoa, ob ge ǀkhara ti ge tsâ tsoatsoa. ǁÎb ge ra mî: “Nēsi ta ge ra mûǂan, mâpa ǀgui da ga hâ xawe da a ǀguisa. ǁÎn ge ǃkharagaguse ǃhoa tsî ra tanisen. ǂHâǂhâsa î ge a î da khoena īn ase ūǃoa.” ǁNā-amaga ǀoro ǀhaohâb tsî ǀasab tsîna ǀgopeǀnōsa xu ǂgōsen. ǀGui aimâba-ao ǃgâsas Anne-Lise ge sao rase ra mî: “ǀAsa xūna ta nî ǁkhāǁkhāsen amaga ta ge ge doe, ǃâubasen tama ta ge ge hâ i ti ǀasa ǀhaohâb ǃnâ hâ xūn ǀoro ǀhaohâb ǀkha nî ǀguisa.”

ǀHaohâb ǃûi-aogu tsîn ge ǀoro ǀhaohâba, ǀasab ǀkha ǀgopeǀnōsa xu nî ǂgōsen. ǃGâsan xūna ǀkhara ǀgaub ǃnâ ra dīs ge hoaǁae ǂâibasen tama ǁîn xūna hoaǁae ǂhanuse dī tamasa. ǁNā ǀkharib ǃnân xūna ra dīhe ǀgauba ǁkhāǀkhāsens ge ǂhâǂhâsa, xū-ets nî mîs aiǃâ. (Aoǁn. 3:​1, 7) Kaise i ge nî ǃgâi ǃgâsana sadu ǃgâi tanisen ǀgaub ǀkha ǁkhāǁkhāsa, ǁîna ǁgaris xa în sadu ra ǂâi ǀgaub ǃnâ ǂâi.—2Kor. 1:24.

3. ǀAsa ǀhaohâb ǃnâ xūna dī. (Fil. 1:2) Does ge ǂgui sîsenni tsî ǃnāsa ǁaeb tsîna ǃkhōǂgā hâ. ǁNā-amaga i ge a ǂhâǂhâsa, î du sī du ra khami ǀasa ǀhaohâb ǀhaode hâǃnâ tsoatsoa. ǀAsa ǀhaohâb ǃgâsan ga hoaǁae mû du tama i, on mati a ǂkhâǃnâ du ǁkhā? Lusindas, ǁîs ǀgam ǀgôara ǀkha ge Suid-Afrikab ǃnâ hâ kai ǃāsa ǃoa a does ge ra mî: “Ti ǀhōsan ge ge ǀapemāde î ta ti ǀasa ǀhaohâb ǃnâ hân ǀkha ǀhōsagusisa kuru, aoǁnâ sîsenni ǃnâ ǁîn ǀkha ǂoa tsî ǀhaodi ai ǃeream. ǃGâsagu tsîna ta ge ge mîba ti omsan aoǁnâ sîsenni ǀhaos ǃaroma a sîsenū ǁkhāsa.”

“Sida ǃgâsan ǀkha da ga gagasi ǁaxasigu ǃnâ ǀguiba ‘sîsen,’ o i ge ǁîn tsî sida tsîna nî hui tsî nî ǀgaiǀgai.” Anne-Lise ǂguro da goro ǃhoaǃgaos ge ǀhaohâb ǃûi-aogu xa ge ǂkhâǃnâhe îs ǀhaohâb ǃnâ hâ ǃgâsan hoan ǀkha aoǁnâ sîsenni ǃnâ ǂoa. Nēsa mati ge ǀamǂoa? “ǃKhaese ta ge ge mûǂan nēb a ǃgâi ǀgausa ǀhaohâb ǃâse tsâs ǃaroma” tis ge ge mî. Māsenxase du ga sala ǃanu tsî kōǃgâ, os ge nēsa ra ǁgau sadu nēsisa nē ǀasa ǀhaohâba sadu ǀhaohâb ase ra mûsa. ǃNāsase du xūn ǃnâ ra ǃâ khami du ge nî ūǃoahe tsî ǀasa gagasi omaris ǃâ du a khami nî tsâ.

4. ǀAsa ǀhōsana kuru re. (2Kor. 6:​11-13) Khoen ga tsâba nî du rasa ǂan, o i ge nî supu ǁîna sadu ǀhō kaisa. ǁNā-amaga dītsâ re î ǀhaos nî tsoatsoas aiǃâ sali tawa sī tsî ǀhaos khaoǃgâ hâ ǃgau tsî khoen ǀkha ǃhoa tsî ǁîna ǂan. Dītsâ i ǁîn ǀonde ǁkhāǁkhāsen. Khoen  ǀonde du ga ǂâihō, ǃgâi tanisensa ūhâ tsî supuse ǃhoa ūhe ǁkhā, on ge ǁîna nî ǂan du ǂgao tsî du ge ǀnîsi a ǃgâi ǀhōsa kai ǁkhā.

Ūǃoahesa ǂâiǂhansens xa, mā-am re în ǃgâise ham du asa ǂan. Lusindasa xu ǁkhāǁkhāsen re hîna ge mîsa, “ǀgū ǀhōsanas ge nēsi ūhâ ǁînas ge ǂgurose ǁîs omsa ǃoa a ǁkhau amaga.”

“ǃKHŌǃOAGU RE”

ǀUts a khoen xa ǀoa hâ sali ǃnâ ǂgâs ge ǀnî khoena ra ǃao kai. Mati du ǀasase sadu ǀhaohâba ǃoa ra doe ǀkhīna nî tsâ kai? Apostel Paulub ge mî khami: “Xristub ge Elob di ǂkhaisib ǃnâ ǃkhōǃoa du khami ǃkhōǃoagu re.” (Rom. 15:7) Xristuba ǁgaes ǃnâ-ū gu ge ǀhaohâb ǃûi-aoga ǀasase doe ǀkhī hâna nî ǁkhoreǁhare. (“ Tae-e nî hui du doe du ga o?” ti hâ boksisa khomai re.) Hoan ǀhaohâb ǃnâ hân, ǀgôan tsîna ǃkhōǂgā hâsen ge ǃâ-e ǀasa ǀhōsana kurus tsî ǁkhoreǁhares ǃnâ a ǀhuru ǁkhā.

Nauna ǁkhoreǁhares ge ǃhaokhoeǃkhōǃoaxasib tsî nauna ǂhân hâ huiba mās tsîna ǃkhōǂgā hâ. Aiǁgaus ases ge ǀnî ǃgâsasa ǁîs ǁaeba sîsenū tsî ǀasase doe ǀkhī hâ ǃgâsasa ǃāsa gere ǁgau, matis tekis tsî trains tsîna hō ǁkhā ǀgausa. Nē ǃgâsas ge dī xū-i ge ǁîsa ge tsâǀkhā tsî ge huisi îs ǁîs ǀasa omsa ǁnaedī.

KAIS DI ǃĒS

ǃAetab tamas ka io ǁharib ge ǂguiǃnāde ǁîb khōba ra ǁnôaxuhe, ǁhana tsoatsoab nîs aiǃâ. ǁNās ǁkhās khami du ge ǀasa ǀhaohâba ǃoa du ga doe, o ǂâiǂhansen kai du ra xūn hîna Jehovab ǃoabas ǃnâ aiǃgû kai du tide na xu nî ǂgōsen. “Does ge ǃgâi ǁkhāǁkhāsa” ti ra ge Nikolasi tsî Célines hâra ra mî. “ǀAsa khoen tsî ǃkhais tsîna ǁnaetis ǃaroma î ge ǀasa ǀgauga omkhâisa ge ǂhâbasa i.” Jean-Charlesi, ǂguro da goro ǃhoaǃgaob ge ǁîb omaris ge ǃgâiba ǀama ǀgaub xa sao rase ra mî: “ǀAsa ǀhaohâb ǃnâ i ge sîm ǀgôara gagasise  kai tsî Jehovaba ǀkha ǀgū ǀhōsagusisa ge omkhâi. ǀOro wekhegu khaoǃgâs ge sîm ǀgôarosa wekheb ǁaegu hâ ǀhaos tawa ǃâna ge ūhâ tsoatsoa. Tsîb ge aore ǀgôaba ge ǁāǁnâhe tama aoǁnâ-ao kai.”

Tae-e du a dī ǁkhā sadu mâsib xa ǃaromahe hâse du ga aiǁgause ǂhâsib a ǃnāsa ba doe ǁoa o? Sadu ǀoro ǀhaohâb ǃnâ du ge ǀasase a tsâ ǁkhā tsî nē khomaiǃâs ǃnâ māsa ǀapemāde a dītsâ ǁkhā. Jehovab ai du ra ǂgomaiǂnûi ǁaeb ǃnâ sadu ǀhaohâb ǀkha xūna dī re. Aiǁgaus ase aoǁnâ sîsenni ǃnâ naun ǀkha ǂoa, ǀasa ǀhōsana kuru tsî ǀnai du a ǂanan ǀkha dū ūhâ ǀhōsagusisa ǀgaiǀgai. ǀNîsi du ge ǂgurose ǀasase doe ǀkhī hân tamas ka io ǂhâsiga ūhâna a hui ǁkhā. Ama Xristeǁîn ǀnammi ai ra mûǂanhe amaga i ge nauna huisa Jehovaba ǃoa nî ǂgae du. (Jhn. 13:35) “Nēti ī ǁguibadi ǃnâb Eloba ǃgâiǃgâibasensa,” ūhâsa du ge a ǂgomǃgâ ǁkhā.—Heb. 13:16.

ǃGomsinan gere hōǃâ xawen ge ǂgui Xristeǁîna ǂkhîba ǁîn ǀasa ǀhaohâgu ǃnâ ge hōǃâ tsî du ge sadu tsîna ǁnāsa hōǃâ ǁkhā. “ǀHaohâga dawas ge ge huite î ta ǂgui ǃgâsana ǃgâise ǂan,” tis ge Anne-Lisesa ra mî. Kasumis ge nēsisa ra ǂanǃgâ “doets ga ob ge Jehovaba ǂgui ǀgaugu hōǃâ tsâ tamats hâ gu ǃnâ a hui tsi ǁkhāsa.” Julesa mati ra tsâ? ǁÎb ge ra mî: “Hō ta ge ǀhōsan ge ge huite î ta ǁkhoreǁharehe hâse tsâ. Nēsi ta ge ti ǀhaohâb ǀgūse ra tsâ tsî i ge nî ǃgombate doesa.”