Khoen hoana xu ǀkharaseb ge Jesuba ǀhomǃgāse ǀhommi ǃnâ ge ǁan hâ-i, khoeseb nî ǃhūbaib ai ǃnaes aiǃâ. (Johaneb 8:23) ǁÎb ge ge ǂguro kurusabe i, tsîb ge ǀhommi tsî ǃhūbaib ai hâ xūn hoana kurus ǀkha ge hui. ǁÎb ge hoara-u Elob xa ǀguri ge kuruhe, ǁnās ǀkhab ge ǀgau hâ ǀonsa ra ǂgaihe, Elob di “ǀguise ǃnae hâb” ti. (Johaneb 1:14) Jesub ge Elob di ǃhoaba-aose gere sîsen ǁnā-amagab ge “Mîs” ti ra ǂgaihe.​—Khomai re ǂKhoa-mîdi 8:22, 23, 30; Koloseǁîn 1:15, 16.

Elob ge ǁîb ǀGôaba ǃhūbaib ǃoa ge sî, ǁîb ûiba ǀhomma xu ǂkham khoes Marias ti ra ǂgaihes ǁhāsa ǃoa, ǁîs xa nî ǃnaehese. ǁNās ǀkhab ge Jesuba khoesi ǁgûba ge ūhâ tama hâ-i. (Lukab 1:30-35) Jesub ge ǃhūbaiba ǃoa ge hā (ǂgurose) Elob xa hâ amaba ǁkhāǁkhās ǃaroma (ǀgamǁîse) aiǁgausab nî ǁnāxūba da ga mati da Elob ǂâisa a dī ǁkhā ǀgausa ǃgomgu tsî augu ǃnâ da ga hâs xawe tsî (ǃnonaǁîse) ǁîb ǀoasa ûiba “xoremarib” ase mās ǃaroma.​—Khomai re Markub 10:45.

Xoremarib ge khoe-i ǁōba xu nî ǃnora kaihe ga ra matarehe. (Eksodus 21:29, 30) ǁŌb tsî kairasib ge Elob di ǂâi tama ge hâ-i sa khoen ǀkha. Mati da ǁnāsa a ǂan? Elob ge ǂguro khoeb Adama ge mîba ǁoreb ga o ob nî ǁō di. Adami ga ǁore tama hâ o, ob ge tātsē ga ǁō tama hâ. (Genesis 2:16, 17; 5:5) Elobmîs ǃoa-aib ge ǁōba ǀgui khoeb Adami ǃnâ-ū khoen hoan tawa ge hā. ǁNās ǀkhab ge Adama ǁîb ôananôagub hoaba ǁoreba ge ǀomi kai tsî mādawa-ams ge a ǁō. Sada ge xoremariba  ǂhâ hâ ǁōb ǁoreb xa ge ǃaromaheb Adama xu da ge ǀomiba xu ǃnoras ǃaroma.​—Khomai re Romeǁîn 5:12; 6:23.

Ham-e xoremariba matares ǁkhāsiba ūhâ ǁōba xu nî ǃnora kai da ba? ǁŌ da ga o, o da ge sida ǁoren ǃaroma ǀgui ra matare. ǀOasa kurusa ūhâ tama khoe-i ge nau khoe-i ǁoreba a mādawa ǁoa.​—Khomai re Psalmti 49:8-10.

Jesub ge ǀoasa kurusa ge ūhâ i. ǁNā-amaga i ge ge ǂhâbasa tama hâ-i ǁîb nî ǁoreb ǃaroma ǁō ǃkhaisa, ǁore-eb ge ūhâ tama hâ-i amaga. Xawe ǁîb ge nau khoen ǁoreb ǃaroma ge ǁō. Elob ge kai ǀnama khoena ge ǁgau ǁîb ǀgôabab ge sî-o sida ǃaromab nî ǁōse. Jesub tsîn ge sida ǀnama ge ǁgau māsen tsîb ge dadasaba ǁnâuǀnam o sida ǁoren ǃaroma ǁōsa.​—Khomai re Johaneb 3:16; Romeǁîn 5:18, 19.

Vidioba kō re Jesuba tae-i ǃaroma ge?

ǃHūbaib aib ge hâ-i o ob ge Jesuba ǀaehâna gere ǂgauǂgau, ǁōhâna khâi kai tsî ǃgomgu ǃnâ hâ khoena gere hui. ǁNās ǃnâ-ūb ge gere ǁgau hānîǁaeb ǃnâb ǁnâuǀnamxa khoena nî dība xūna. (Mateub 15:30, 31; Johaneb 5:28) Jesub ge ǁōs khaoǃgâb ge Eloba khâisa ge mābi ǁkhapa gāgāsi kurusabeb ase ǀhommi ǃnâ nî ûise. (1 Petrub 3:18) ǁNās khaoǃgâb ge Jesuba Elob amǀkhāb ǁôab tawa ge sī ge ǃâu Jehovab ge gaosiba mābis kōse, Gaoseb nî hoa ǃhūbaiba ǂgaeǂguise. (Hebreǁîn 10:12, 13) Nēsib ge ǀhommi ǃnâ Gaose ra ǂgaeǂgui, tsî ǁîb saoǃgon-aon ge nē ǃgâiǂhôasa hoa ǃhūbaib ǃnâ ra ǂhôa.​—Khomai re Danieli 7:13, 14; Mateub 24:14.

ǀGūǁaeb ǃnâb ge Jesuba ǁîb ǀgaiba Gaose nî sîsenū hoa ǃgomsiga toa kaisa tsî ǁîna ra ǃaroman tsîna. Hoan hîa Jesub ǃnâ ra ǂgoman, ǁnâuǀnams ǃnâ-ūn ge ûiba paradais ǃhūbaib ai nî hō.​—Khomai re Psalmti 37:9-11.