Il-​Bibbja tagħmilha ċara li Ġesù ma kienx miżżewweġ, avolja ma tgħidx dan b’mod speċifiku. a Ikkunsidra dan li ġej.

1.   Il-​Bibbja taʼ spiss tirreferi għall-​familja taʼ Ġesù u anke nisa li kienu jingħaqdu miegħu fil-​ministeru tiegħu u li kienu weqfin ħdejh meta hu ġie maqtul, però qatt ma ssemmi li hu kellu mara. (Mattew 12:46, 47; Marku 3:31, 32; 15:40; Luqa 8:2, 3, 19, 20; Ġwanni 19:25) L-​iktar raġuni li tagħmel sens rigward għala l-​Bibbja ma tgħid xejn fuq dan is-​suġġett hi li hu qatt ma kien miżżewweġ.

2.   Rigward dawk li jibqgħu ma jiżżewġux sabiex ikunu jistgħu jagħmlu aktar fis-​servizz t’Alla, Ġesù qal lid-​dixxipli tiegħu: “Min jistaʼ [jibqaʼ ma jiżżewwiġx], ħa jagħmel il-​wisaʼ għal dan.” (Mattew 19:10-​12) Hu ħalla l-​eżempju għal dawk li jiddeċiedu li ma jiżżewġux sabiex jiddedikaw lilhom infushom aktar bis-​sħiħ lil Alla.—Ġwanni 13:15; 1 Korintin 7:32-​38.

3.   Eżatt qabel ma miet, Ġesù rranġa biex xi ħadd jieħu ħsieb lil ommu. (Ġwanni 19:25-​27) Li kieku Ġesù kien miżżewweġ jew kellu t-​tfal, hu kien jagħmel ċert li dawn il-​membri immedjati tal-​familja kien ikollhom min jieħu ħsiebhom ukoll.

4.   Il-​Bibbja tuża lil Ġesù bħala eżempju għall-​irġiel miżżewġa, imma ma tirreferix għal kif hu ttratta ma’ martu letterali. Minflok, hi tgħid: “Irġiel, komplu ħobbu lin-​nisa tagħkom, bħalma l-​Kristu wkoll ħabb lill-​kongregazzjoni u ta lilu nnifsu għaliha.” (Efesin 5:25) Li kieku Ġesù kien verament miżżewweġ meta kien fuq l-​art, ma kienx jintuża l-​eżempju perfett tiegħu bħala raġel miżżewweġ letterali f’dak il-​vers?

 Iva, Ġesù kellu minn tal-​inqas sitt aħwa. Dawn jinkludu ħutu subien Ġakbu, Ġużeppi, Xmun, u Ġuda u minn tal-​inqas żewġ aħwa nisa. (Mattew 13:54-​56; Marku 6:3) Dawn l-​aħwa kienu t-​tfal bijoloġiċi t’omm Ġesù, Marija, u r-​raġel tagħha, Ġużeppi. (Mattew 1:25) Il-​Bibbja ssejjaħ lil Ġesù “l-​ewwel imwieled” taʼ Marija, u dan jimplika li kellha aktar tfal.—Luqa 2:7.

 Sabiex isaħħu t-​twemmin tagħhom li Marija baqgħet verġni tul ħajjitha kollha, xi wħud applikaw tifsiriet differenti għat-​terminu “ħutu.” Pereżempju, xi wħud jaħsbu li ħut Ġesù kienu fil-​fatt it-​tfal taʼ Ġużeppi minn żwieġ taʼ qabel. Però, il-​Bibbja turi li Ġesù wiret id-​dritt legali li jsaltan li kien imwiegħed lil David. (2 Samwel 7:12, 13; Luqa 1:32) Li kieku Ġużeppi kien missier taʼ subien akbar minn Ġesù, l-​akbar wieħed minnhom kien ikun il-​werriet legali taʼ Ġużeppi.

 Jistaʼ jkun li t-​terminu jirreferi għad-​dixxipli taʼ Ġesù, jew ħutu spiritwali? Din l-​idea mhijiex fi qbil mal-​Iskrittura, peress li l-​Bibbja tgħid li għal xi żmien “fil-​fatt, ħutu ma kinux qed jeżerċitaw il-​fidi fih.” (Ġwanni 7:5) Il-​Bibbja tagħmel differenza bejn ħut Ġesù u d-​dixxipli tiegħu.—Ġwanni 2:12.

 Skont teorija oħra, ħut Ġesù kienu fil-​fatt il-​kuġini tiegħu. Iżda, l-​Iskrittura Griega tuża kliem differenti għal “ħu,” “qarib,” u “kuġin.” (Luqa 21:16; Kolossin 4:10) Ħafna studjużi tal-​Bibbja jirrikonoxxu li ħut Ġesù kienu ħutu fil-​vera sens tal-​kelma. Pereżempju, The Expositor’s Bible Commentary jistqarr: “L-​iktar mod naturali kif tifhem il-​kelma ‘ħutu’ . . . hu li t-​terminu jirreferi għal ulied Marija u Ġużeppi, jiġifieri għal ħut Ġesù mill-​omm.” b