Gallettini għall-Klieb
“FIL-BIDU tal-2014, jien bdejt immur mixja biż-żewġt iklieb żgħar tiegħi fil-pjazza fejn kont ngħix,” kiteb Nick li joqgħod f’Oregon, l-Istati Uniti. “Hemmhekk kien ikun hemm ix-Xhieda taʼ Ġeħova bl-istands tal-letteratura. Huma kienu jkunu lebsin pulit u kienu jitbissmu lil kull min jgħaddi.
“Ix-Xhieda ma kinux dħulin man-nies biss, imma anke mal-klieb tiegħi. Darba waħda, Elaine, li kienet qiegħda mal-istand, tat il-gallettini lill-klieb tiegħi. Minn dakinhar, kull darba li kont ngħaddi minn quddiemhom, il-klieb kienu jiġbduni għal ħdejhom biex ituhom il-gallettini.
“Kull darba li konna ngħaddu minn hemm, il-klieb kienu jieħdu pjaċir bil-gallettini li jtuhom u jien kont nieħu pjaċir bil-konversazzjonijiet qosra li kien ikolli magħhom. Imma kont inżomm lura u ma kontx nitkellem magħhom għal ħafna ħin. Jien kelli iktar minn 70 sena, u ma kontx naf x‘jemmnu x-Xhieda taʼ Ġeħova. Minħabba li kont iddiżappuntat b’ħafna reliġjonijiet Kristjani, ħsibt li aħjar nistudja l-Bibbja waħdi.
“Matul dan iż-żmien, jien kont nara Xhieda oħrajn bl-istands fil-belt fejn kont noqgħod u kollha kienu dħulin. Huma dejjem wieġbu l-mistoqsijiet li kelli minn fuq il-Bibbja u dan ġegħelni nafdahom.
“Darba waħda, Elaine staqsietni, ‘Temmen li l-annimali huma rigal mingħand Alla?’ Jien għedtilha, ‘Iva, dażgur li nemmen!’ Imbagħad Elaine qratli Isaija 11:6-9. Minn dakinhar, jien xtaqt nitgħallem iktar dwar il-Bibbja, imma xorta ma ridtx nieħu letteratura minn tagħhom.
“Wara dan, jien bdejt nieħu pjaċir bil-konversazzjonijiet qosra imma interessanti li kien ikolli maʼ Elaine u r-raġel tagħha, Brent. Huma ssuġġerewli biex naqra minn Mattew sa Atti biex nifhem x’jiġifieri tkun Kristjan veru. U hekk għamilt. Wara ftit, jien aċċettajt studju tal-Bibbja maʼ Brent u Elaine. Dan kien fis-sajf tal-2016.
“Kont inħares ’il quddiem biex nagħmel l-istudju tal-Bibbja kull ġimgħa u mmur il-laqgħat fis-Sala tas-Saltna. Vera kont ferħan li bdejt nitgħallem dak li tgħid il-Bibbja. Wara ftit iktar minn sena, sirt Xhud taʼ Ġeħova. Issa li għandi 79 sena, vera kuntent li sibt ir-reliġjon vera u li Ġeħova tani l-privileġġ li nsir parti mill-familja kbira li għandu mad-dinja kollha.”