DAWN in-nisa ma kellhomx xi marda. Huma kienu għaddejjin mill-bidla li ġġib magħha l-menopawsa, bidla naturali fil-ħajja taʼ mara u t-tmiem tal-fertilità tagħha. Jekk int mara, huwa dan iż-żmien qrib għalik? Jew għaddejja minnu? Hu x’inhu l-każ, iktar ma int u l-maħbubin tiegħek tkunu informati dwar din il-bidla, iktar se tkunu tistgħu tkampaw mal-isfidi li jiġu magħha.

Il-bidla tal-menopawsa, li bl-Ingliż tissejjaħ ukoll perimenopause, tinkludi kemm il-perijodu li jwassal għall-menopawsa u kemm il-menopawsa nfisha. * Madankollu, ġeneralment il-“menopawsa” spiss tirreferi għall-bidla kollha kemm hi.

Il-maġġoranza tan-nisa jibdew il-menopawsa taʼ 40 sena, imma xi wħud jibdewha mas-60. Fil-biċċa l-kbira tal-każi, il-mestrwazzjoni tibda tnaqqas bil-mod il-mod. Peress li l-livell tal-ormoni ma jibqax regulari, mara jew ma tibqax tara l-period kull xahar, jew tara d-demm meta mhux suppost, jew ikollha periods qawwijin ħafna. Għadd żgħir taʼ nisa jiqfilhom il-period f’daqqa, bħallikieku mil-lum għall-għada.

“Il-ktieb Menopause Guidebook jgħid: “L-esperjenza tal-menopawsa taʼ kull mara hi differenti. . . . Il-fwawar huma l-iktar skumdità komuni konnessa mal-menopawsa,” u għandu mnejn li warajhom ikun hemm tkexkix taʼ bard. Dawn is-sintomi jistgħu ma jħallukx torqod sew u jiħdulek l-enerġija kollha. Dawn l-iskumditajiet kemm idumu? The Menopause Book jgħid, “xi nisa jkollhom ftit fwawar  għal xi sena jew tnejn matul il-bidla tal-menopawsa. Oħrajn ibatu bihom għal ħafna snin, u persentaġġ żgħir ħafna jgħidu li kultant baqaʼ jkollhom il-fwawar tul il-bqija taʼ ħajjithom.” *

Minħabba li l-livell tal-ormoni ma jibqax regulari, mara għandha mnejn ukoll taqbadha dipressjoni u tbati bil-burdati, u b’hekk tibda tibki mix-xejn. Jistaʼ wkoll ikollha nuqqas taʼ konċentrazzjoni u tibda tinsa. Però, “huwa rari li mara waħda se tbati b’dawn kollha,” jgħid The Menopause Book. Fir-realtà, xi wħud ftit jew xejn ikollhom problemi u skumditajiet.

Bidliet sempliċi fl-istil tal-ħajja jistgħu jnaqqsu xi skumditajiet. Pereżempju, dawk li jpejpu għandhom mnejn inaqqsu l-kwantità taʼ fwawar jekk jaqtgħu t-tipjip. Ħafna nisa jibbenefikaw ukoll għax ibiddlu d-dieta tagħhom billi jillimitaw jew saħansitra jevitaw l-alkoħol, il-kafeina, u l-ikel bi ħwawar jaħarqu jew biz-zokkor. Dan jistaʼ jikkaġuna l-fwawar. M’għandniex xi ngħidu, hu importanti li tiekol tajjeb, jiġifieri li jkollok dieta bilanċjata u varjata.

Anki l-eżerċizzju jistaʼ jgħin ħafna biex jitnaqqsu s-sintomi tal-menopawsa. Pereżempju, jistaʼ jnaqqas l-insomnja u jtejjeb b’mod sinifikanti l-burdata, kif ukoll itejjeb is-saħħa tal-għadam u s-saħħa inġenerali. *

“M’hemmx għalfejn issofri waħdek,” tgħid Rondro li ssemmiet qabel. “Jekk tiftaħ qalbek maʼ dawk taʼ madwarek, ma jinkwetawx iżżejjed meta jaraw dak li tkun għaddejja minnu.” Fil-fatt, għandhom mnejn juru iktar paċenzja miegħek u jifhmuk aħjar. “L-imħabba hi paċenzjuża u qalbha tajba,” jgħid l-1 Korintin 13:4.—Good News Translation.

Ħafna nisa, inkluż dawk li huma mnikktin minħabba li m’għadhomx fertili, jibbenefikaw ukoll mit-talb. “[Alla] jfarraġna fil-hemm kollu tagħna,” taċċertana l-Bibbja. (2 Korintin 1:4, Il-Bibbja tal-Għaqda Biblika Maltija) Huwa wkoll taʼ faraġ li nkunu nafu li l-bidla tal-menopawsa hija temporanja. Wara, in-nisa li jkomplu jieħdu ħsieb saħħithom jistgħu jiksbu l-enerġija mill-ġdid u jgawdu ħafna iktar snin taʼ ħajja sinifikanti.