Ġeħova ta l-​art lill-​bnedmin. Hi d-​dar tagħna. Għalhekk, l-​ewwel koppja umana, Adam u Eva, ma nħalqux biex jimlew is-​smewwiet​—Alla kien diġà ħalaq lill-​anġli biex jgħixu fis-​sema. (Ġob 38:4, 7) Minflok, Alla ħa lill-​ewwel raġel u poġġieh fi ġnien mill-​isbaħ imsejjaħ il-​ġnien tal-​Għeden. (Ġenesi 2:15-​17) Ġeħova ta lilu u lin-​nisel futur tiegħu l-​prospett li jgawdu ħajja taʼ dejjem fuq l-​art.​—Aqra Salm 37:29; 115:16.

Oriġinalment, il-​ġnien tal-​Għeden biss kien ġenna. L-​ewwel koppja umana kellhom jimlew l-​art b’nisilhom. Maż-​żmien, kellhom irażżnu l-​art kollha u jagħmluha ġenna. (Ġenesi 1:28) L-​art qatt ma se tinqered. Dejjem se tkun id-​dar tal-​umanità.​—Aqra Salm 104:5.

Ara l-vidjow Alla għala ħalaq l-art?

Adam u Eva m’obdewx lil Alla, u għalhekk Ġeħova poġġiehom ’il barra mill-​ġnien. Il-​ġenna tal-​art intilfet, u ebda bniedem ma rnexxielu jerġaʼ jagħmel l-​art ġenna. Il-​Bibbja tgħid: “L-​art f’idejn il-​wieħed mill-​agħar ngħatat.”​—Ġob 9:24.​—Aqra Ġenesi 3:23, 24.

Abbanduna Ġeħova l-​iskop oriġinali tiegħu għall-​umanità? Le! Hu jistaʼ kollox. Qatt ma jistaʼ jfalli. (Isaija 45:18) Hu se jġedded lir-​razza umana għall-​mod kif riedha tkun.​—Aqra Salm 37:11, 34.

L-​art se terġaʼ tintgħamel Ġenna matul il-​ħakma taʼ Ġesù bħala s-​Sultan maħtur minn Alla. F’battalja li tissejjaħ Armageddon, Ġesù se jmexxi l-​anġli t’Alla u jeqred lil dawk kollha li jopponu lil Alla. Imbagħad Ġesù se jaqfel lil  Satana għal 1,000 sena. In-​nies t’Alla se jsalvaw mill-​qerda għax Ġesù se jiggwidahom u jipproteġihom. Se jgawdu l-​ħajja taʼ dejjem f’Ġenna fuq l-​art.​—Aqra Rivelazzjoni 20:1-​3; 21:3, 4.

Alla meta se jeqred il-​ħażen minn fuq l-​art? Ġesù ta “sinjal” li kellu jindika meta t-​tmiem ikun fil-​qrib. Il-​kundizzjonijiet preżenti tad-​dinja jheddu l-​eżistenza tal-​bniedem u juru li issa qed ngħixu fil-​“konklużjoni tas-​sistema.”​—Aqra Mattew 24:3, 7-​14, 21, 22.

Matul l-​1,000 sena, Ġesù mis-​sema se jaħkem fuq l-​art u se jtemm it-​tbatija kollha. (Isaija 9:6, 7; 11:9) Minbarra li se jaħkem bħala Sultan, Ġesù se jaqdi bħala l-​Qassis il-​Kbir u se jħassar id-​dnubiet taʼ dawk li jħobbu lil Alla. B’hekk, permezz taʼ Ġesù, Alla se jelimina l-​mard, ix-​xjuħija, u l-​mewt.​—Aqra Isaija 25:8; 33:24.

In-​nies li jobdu lil Alla se jgħixu fil-​Ġenna tal-​art. (1 Ġwanni 2:17) Ġesù bagħat lis-​segwaċi tiegħu biex ifittxu lin-​nies ġwejdin u biex jgħallmuhom kif isiru aċċettabbli għal Alla. Illum, Ġeħova qed iħejji lil miljuni taʼ nies għal ħajja fil-​Ġenna tal-​art futura. (Sofonija 2:3) Fis-​Swali tas-​Saltna tax-​Xhieda taʼ Ġeħova, in-​nies jitgħallmu kif ikunu rġiel miżżewġin u missirijiet aħjar u kif ikunu nisa miżżewġin u ommijiet aħjar. It-​tfal u l-​ġenituri jqimu flimkien u jitgħallmu kif jibbenefikaw mill-​aħbar tajba.​—Aqra Mikea 4:1-​4.