Ayo! Tõnd moonda koɛɛgã zak-zaka, la d pa tagsd tɩ yaa d sẽn na n maand rẽ la d na n paam fãagr ye. (Efɛɛs-rãmbã 2:8) Bõe yĩnga?

 D rɩk makre: Mams-y n ges-y wa nin-sõng sẽn na n pʋlem t’a na n kõo neb kũun-kãsenga, la yaa ned ning fãa sẽn na n kẽng zĩig ning la daar ning a sẽn yãkã bal n na n paame. Y sã n kɩsa sɩd ne a sẽn pʋlmã, y kõn modg n tũ a sẽn yellã sɩda? Yaa vẽeneg tɩ y na n tũume. Tõe tɩ y na n togsa y zo-rãmb la y roagdba, tɩ bãmb me wa paam kũunã. La baa y sã n tũ raoã sẽn yellã fãa, pa wilgd tɩ y tog n paama kũunã ye. Bala, kũun yaa kũuni.

 Woto me, a Zeova Kaset rãmbã tẽedame tɩ Wẽnnaam sẽn pʋlem t’a na n kõo neb nins fãa sẽn sakd-b yẽ vɩɩm sẽn kõn sa wã na n pidsame. (Rom-dãmbã 6:23) D modgdame n wilgd nebã tõnd sẽn tẽedã, n saagdẽ tɩ b na n wa paam n dɩɩ Wẽnnaam pʋlemsã nafa. La d pa tagsd tɩ yaa d sẽn na n moond koɛɛgã la d na n paam fãagr ye. (Rom-dãmbã 1:17; 3:28) Hakɩɩka, ned ka be sẽn tõe n tʋm tɩ sek a na n paam Wẽnnaam barkã sẽn yaa kãseng wʋsgã ye. Bala, Biiblã yeta woto: “Bãmb fãaga tõndo, la ka tõnd sẽn tʋm tʋʋm-tɩrs yĩng ye, la yaa bãmb mengã nimbãan-zoeer yĩng la b fãag tõndo.”—Tit 3:5.