SAK A 01
Wãn to la Biiblã tõe n sõng-yã?
Tõnd fãa la bal sokda d mens sogsg vɩɩmã wɛɛngẽ, namsgã, kũumã, la beoog-daarã wɛɛngẽ. D maanda yɩɩr me daar fãa zu-loeesã wɛɛngẽ. Wala makre, bao-n-kõ-noorã la d sẽn na n maan to-to tɩ sũ-noog zĩnd d zagsã pʋsẽ. Neb wʋsg yãame tɩ Biiblã sõngd-b lame tɩ b paamd sogsg kẽer leoore, la sagls sẽn sõngd-b daar fãa. Yãmb tagsdame tɩ Biiblã tõe n sõnga ned buud fãa bɩ?
1. Sogsg Biiblã sẽn leokd kẽer la bʋse?
Ad sogsg kẽer Biiblã sẽn leokde: Vɩɩmã sɩnga wãn-wãna? Vɩɩmã yõod yaa bõe? Bõe yĩng tɩ nin-sõma namsdẽ? Ned kaalem poore, bõe n maande? Nebã fãa sã n data laafɩ la bãane, bõe yĩng tɩ zabã yaa wʋsgo? Bõe n na n paam tẽngã beoog-daare? Biiblã pʋgẽ, b sagenda tõnd tɩ d bao sogs-kãensã leoore. Sɩd me, neb milyõ-rãmb paama b leoorã hal tɩ naf-ba.
2. Wãn to la Biiblã tõe n sõng tõnd d daar fãa vɩɩmã pʋgẽ?
Biiblã kõta tõnd sagls sẽn yaa sõma. Wala makre, a wilgda zagsã rãmb b sẽn tõe n paam sũ-noog to-to. A kõta sagls sẽn tõe n sõng-d tɩ d mao ne yɩɩrã, la sẽn tõe n sõng-d me tɩ d paam sũ-noog d tʋʋmdã pʋgẽ. Y sã n zãms seb-kãngã, y na n bãnga Biiblã sẽn yet yel-kãensã wɛɛngẽ, la yɛl a taaba. Tõe tɩ y wa sak n deeg tɩ ‘Gʋls-sõamyã tõre, [rat n yeel tɩ Biiblã sẽn yetã fãa] tara yõodo.’—2 Tɩmote 3:16.
Seb-kãngã pa ledgd Biiblã ye. A pʋd n tõe n sõng-y lame tɩ y vaees Biiblã y toore. Woto yĩnga, d sagend-y lame tɩ y karem vɛrse nins sẽn be sak fãa pʋgẽ wã, n ges sã n zemsa ne bũmb nins y sẽn zãmsdã.
PAAS-Y Y BÃNGRÃ
Ges-y Biiblã sẽn sõng neb to-to, y sẽn tõe n maan to-to t’a karengã tall yamleoogo, la bũmb ning sẽn kɩt tɩ y segd n bao ned t’a sõng-y tɩ y wʋm a võorã.
3. Biiblã tõe n wilg-d-la sore
D tõe n yeelame tɩ Biiblã yaa wa tors sẽn wit sõma. A tõe n sõnga tõnd tɩ d bãng n yãk yam, la a sõng-d me tɩ d bãng bũmb nins sẽn wat beoog-daare.
Karm-y Yɩɩn-sõamyã 119:105, la y sõs sogs-kãensã zugu:
-
Sẽn gʋls-a gom-kãensa wã tagsg ra yaa wãn ne Biiblã?
-
Yãmb tagsg yaa wãn ne Biiblã?
4. Biiblã tõe n leoka d sogsgã
Pag a ye yãame tɩ Biiblã sõng-a lame t’a paam sogsg a sẽn da sokd a meng leoore. Yaa sogsg a sẽn da sokd a meng hal na maan yʋʋma. Ges-y VIDEO wã. Rẽ poor bɩ y sõs sogsgã zugu:
VIDEO: D ra tol n yĩm tɩ manegr n wat ye! (1:48)
-
Video wã pʋgẽ, sogs-bʋs la pagã ra sokd a menga?
-
Wãn to la Biiblã zãmsgã sõng-a?
Biiblã wilgdame tɩ yaa sõma tɩ d sokd sogsgo. Karm-y Matiye 7:7. Rẽ poor bɩ y sõs sokrã zugu:
-
Sogs-bʋs la y sokd y menga, tɩ Biiblã tõe n sõng-y tɩ y paam b leoorã?
5. Y sẽn tõe n maan tɩ Biiblã kareng tall yamleoogo
Neb wʋsg nong n karemda Biiblã, hal tɩ nafd-ba. Ges-y VIDEO wã. Rẽ poor bɩ y sõs sogsgã zugu:
VIDEO: Biiblã karengo
-
Video wã pʋgẽ, kom-bɩɩsã tagsg ra yaa wãn sɛbã kareng wɛɛngẽ?
-
Bõe n kɩt tɩ b tagsg yaa toor masã Biiblã kareng wɛɛngẽ?
Biiblã yeelame tɩ bũmb nins b sẽn gʋls a pʋgẽ wã yaa tõnd zãmsg yĩnga, sẽn na yɩl n sõng-d tɩ d paam belsgo, la d tẽ manegre. Karm-y Rom dãmb 15:4. Rẽ poor bɩ y sõs sokrã zugu:
-
Yãmb tagsg yaa wãn ne Biiblã sẽn yeel t’a tõe n belsa tõnd la a kɩt tɩ d tẽ manegrã?
6. Neb a taab tõe n sõng-d lame tɩ d wʋm Biiblã goam võore
Neb wʋsg karemda Biiblã b yembre, la b mikame me tɩ b sã n sõsd a zug ne neb a taaba, sõngd-b lame. Karm-y Tʋʋm 8:26-31. Rẽ poor bɩ y sõs sokrã zugu:
-
Bõe n tõe n sõng-d tɩ d wʋm Biiblã goam võore?—Ges-y vɛrse 30 la 31.
NEB KẼER SẼN YETE: “Biiblã zãmsg yaa sẽk sãoongo.”
-
Yãmb yẽ yetame tɩ bõe? La bõe yĩnga?
KƲMSGO
Biiblã kõta sagls sẽn sõngd tõnd d daar fãa vɩɩmã pʋgẽ, la a sõngd tõnd tɩ d paamd d sogsg kẽer leoore. A leb n sõngda nebã tɩ b paamd belsgo, la a sõngd-b tɩ b tẽed manegre.
Leb-n-gese
-
Sagl-bʋs buud n be Biiblã pʋgẽ?
-
Sogsg Biiblã sẽn leokd kẽer la bʋse?
-
Bõe la yãmb dat n bãng Biiblã pʋgẽ?
GES-Y-YÃ
Ges-y Biiblã saglsã sẽn nafd tõnd to-to rũndã-rũndã.
“Biiblã saglsã yaa zãmaan fãa yĩnga” (2018 Gũusg Gasgã N° a 1)
Ges-y Biiblã sẽn sõng rao sẽn da maood ne sũ-sãams hal a yãadmẽ to-to.
Sẽn sɩng to-to tɩ mam vɩɩmã toeeme (2:53)
Ges-y Biiblã sagls sẽn tõe n sõng zak rãmb tɩ b paam sũ-noog to-to.
Neb wʋsg tẽedame tɩ b mii dũniyã sẽn be a soab ning nugẽ wã. La b sẽn tẽedã pa sɩd ye. Ges-y Biiblã sẽn yetã.
Bõe yĩng tɩ y tog n zãms Biiblã?—A zãngã (3:14)