D rɩk makre: Bi-pugl yʋʋr sẽn boond t’a Lea n kẽng soaare. A sẽn ta wã, pa yã n maan minit 10 bal la a wʋm ned sẽn yeel-a yaa:

A Lea sẽn wẽnemdã, a mikame tɩ yaa a zoa a Lidi n zãad biyɛɛr butels a yiibu. Zoe n fukame, t’a rɩk a ye n tees a Lea, n bas n yeele: “Reeg biyɛɛr maasg n yũ. Fo pa le yaa biig ye. Bɩ bõe?

A Lea pa rat n sak ye. La a Lidi sẽn yaa a zoa wã yĩnga, a pa rat t’a wa tags tɩ yẽ yaa dem-dem ye. Sẽn paas menga, a Lidi yaa nin-sõngo. A sã n sak n yũud rãam, dẽnd pa wẽng ye. A Lea tagsa a sũurẽ yaa: “Yaa rãam bal la a rat tɩ m yũ, pa dorog ye.”

Fo sã n da be a Lea zĩigẽ, bõe la fo na n maane?

Fo sã n dat tɩ yell a woto taoor bɩ f tõog n yãk yam sẽn yaa sõma, f tog n bao n bãnga noy nins f sẽn segd n tũ f vɩɩmã pʋgẽ wã. Fo sã n tõog n maan dẽ, na n sõnga foo tɩ f bãngd n yãkd yam f toore, n da bas tɩ neb a taabã soog foom ye.—1 Korẽnt-rãmbã 9:26, 27.

Bõe la f tõe n maan tɩ sõng-fo? D gom bũmb a naas yelle.

F sã n mi f pãn-tõogã la f zʋg-sõma wã, na n sõng-f lame tɩ f kõ f meng sɩda.

BIIBLÃ KIBARE: Tʋm-tʋmd a Poll yeelame: “Baa mam sã n ka gom minim-soaba, mam ka ned sẽn ka tar bãngr ye.” (2 Korẽnt-rãmbã 11:6) A Poll sẽn da wʋmd Gʋlsg Sõamyã võor sõma wã kɩtame t’a tõog n yals kãn-kãe, nebã sẽn wa namsd-a wã. A pa bas tɩ nebã goam koms a raood t’a pa le kõ a meng sɩd ye.—2 Korẽnt-rãmbã 10:10; 11:5.

FEES F MENGA: Tẽngrã, gʋls minim wall pãn-tõog f sẽn tare.

Masã, gʋls zʋg-sõng a ye f sẽn tare. (Wala makre, f tagsda neb a taabã yell bɩ, bɩ f yaa kõata, wall ned b sẽn tõe n teege, bɩ ned sẽn maand bũmb fãa a wakate?)

Fo sã n bas tɩ f pãn-komsmã soog-fo, f pa na n le tõog n tũ noy nins f sẽn yãk yam n na n tũ wã ye. Tõe n waa ne yelle. Yaa wa sebg sẽn na n pengd batayo n teesd a sẽn datẽ.

BIIBLÃ KIBARE: A Poll ra miime t’a tara pãn-komsem. A yeelame: “Mam sũurã zĩ-zulungẽ wã, mam sũ-noog bee ne Wẽnnaam tõodã. La mam yãta tõog a to mam yĩngã wilẽ, t’a maood ne mam yam-wekrã tõogã n kɩtd tɩ mam yaa yel-wẽnã sẽn be mam yĩngã wilẽ wã tõog yamba.”—Rom-dãmbã 7:22, 23.

FEES F MENGA: F segd n maoo ne pãn-komsem bʋgo?

Rẽ yĩnga fo na n sak n kẽe tagsɩ n yeel sofɛɛrã t’a gilg sakã yaar hal tɩ esãasã wa sɛ sɩda? Ayo. Bala rẽ pa yam ye. Leb n na n sãama f ligdi.

Dẽnd f sã n deng n mag n mi f sẽn dat n maane, f na n bãnga f sẽn na n tees f vɩɩmã neng ninga, n da yuusd yaar ye. Woto f mi f sẽn date, la f sẽn tõe n maan n paam-a.

BIIBLÃ KIBARE: A Poll yeelame: “Mam yẽ, mam zoetame, la ka wa ned sẽn ka mi a sẽn dabdẽ ye.” (1 Korẽnt-rãmbã 9:26) A Poll ra pa vɩ yaar ye. A ra mii a sẽn date, t’a sẽn da maandã fãa wilgd rẽ.—Filip-rãmbã 3:12-14.

FEES F MENGA: Tẽngrã, gʋls bũmb a tãab f sẽn magd n na n maan yʋʋmd ning sẽn watã.

Ned sã n pa kɩs sɩd ne bũmbu, a pa tõe n bãng n yãk a sẽn na n maaneg ye. A yaa wa gomtɩʋʋgo. A toeemdame tɩ zemsd ne a zo-rãmbã raabo. Rat n yeelame t’a pa mi a sẽn sɩd yaa ned ning ye.

La fo sã n mi fo sẽn sɩd yaa ned ninga, baa neb a taabã sẽn maaneg fãa, fo tʋʋm-tʋmdɩ wã na n wilgda fo sẽn kɩs sɩd ne bũmb ninsã.

BIIBLÃ KIBARE: No-rɛɛs a Dãniyɛll sẽn wa n yaa bi-bɩɩga, a “yãka yam” a sũur pʋgẽ, t’a na n saka Wẽnnaam noyã, baa a sẽn da pa be ne a zakã rãmbã. (Dãniyɛll 1:8) A sẽn maan woto wã, sõng-a lame t’a tũ a sẽn da kɩs sɩd ne bũmb ninsã.

FEES F MENGA: Fo yẽ kɩsa sɩd ne bõe? Wala makre, fo kɩsa sɩd tɩ Wẽnnaam beeme bɩ? Bõe la f tik n yetẽ tɩ Wẽnnaam beeme?

Fo kɩsa sɩd tɩ Wẽnnaam noyã yaa fo meng nafr yĩng bɩ? Bõe yĩnga?

Woto wã, fo rat n yɩɩ wa tɩɩg võ-koɛɛnga, tɩ sobg sã n fugd bal bɩ a laand yaar bɩ? Bɩ fo yaa wa tɩɩg sẽn yas kãn-kãe baa ne sob-kẽenga? Modg n yãk noy takɩ n tũudẽ. Rẽ, f yɩta wa tɩɩgã. Leb n na n sõng-f lame tɩ f bãng f sẽn sɩd yaa ned ningã.