Y tʋʋm sã n sãame, pa ligd zu-loees bal la y na n paam ye. Tõe n kɩtame me tɩ y zakã pʋgẽ vɩɩm pa le yaa nana, wall kɩt tɩ y lebg sũ-to-ned la y maand yɩɩr wʋsgo. Sagls nins sẽn pʋgdã tika Biiblã sagls sẽn yaa sõma wã zugu. Y tʋʋm sã n sãame, b tõe n sõng-y-la wʋsgo.

•   Togs-y neb a taab yellã sẽn namsd-y to-to wã.

   Biiblã sẽn yete: “F zoa nong-f-la wakat fãa.”—Yel-bũnã 17:17.

   Y tʋʋm sãoong poore, y sũur tõe n sãamame, wall y sũurã tõe n yikame, pa rẽ bɩ y pa mi y sẽn maandg wall y tagsdẽ tɩ y ka võor ye. Y sã n gom yellã sẽn namsd-y to-to wã yell ne y zakã rãmb la y zo-rãmba, b tõe n kenga y raoodo. B tõe n kõ-y-la sagls sẽn tõe n sõng-y tɩ y le paam tʋʋmde.

•   Ra maan-y yɩɩr tɩ loog nug ye.

   Biiblã sẽn yete: “Da maan-y yɩɩr a bada ne beoog yelle, bala beoog me na n talla a yɛla. Daar fãa tara a meng yɛl tɩ seke.”—Matiye 6:34.

   Biiblã sagenda tõnd tɩ nand tɩ d maan bũmbu, d segd n deng magame. (Yel-bũnã 21:5) La a sagend-d lame me tɩ d ra maan yɩɩr wʋsg sẽn wat beoogã wɛɛngẽ ye. D wae n maanda yɩɩr bũmb toor-toor sẽn pʋd n pa na n tol n maan wɛɛngẽ. Sẽn são yaa y sẽn na n tagsd bũmb ning y sẽn tog n maan rũndã wã yell n yɩɩda.

   Biiblã tara sagls a taab sẽn tõe n sõng-y tɩ y mao ne yɩɩr ning tʋʋm sãoong sẽn mi n wat ne wã. Y sã n dat n bãng n paas bɩ y karem sõsg ning gom-zug sẽn yaa: Comment gérer le stress.

•   Toeem-y bũmb kẽer y ligdã yiisg wɛɛngẽ.

   Biiblã sẽn yete: “M tara wʋsg tɩ m pa tar me, mam zãmsa kɩt tɩ m sẽn tarã sek-ma.”—Filip rãmbã 4:12.

   Vɩɩmd-y tɩ zems ne y yɛlã sẽn yaa to-to masã wã. Rat n yeelame tɩ y segd n gũusda ne y sẽn yiisd ligdã to-to wã masã, sẽn na yɩl tɩ zems ne y sẽn tarã. Gũus-y n da wa reeg-y samd sẽn pa tɩlɛ ye.—Yel-bũnã 22:7.

   Y sã n dat sagls a taab y sẽn tõe n vɩɩmd to-to tɩ zems ne y paoongã sẽn yaa a soab masã wã wɛɛngẽ, bɩ y karem sõsg ning gom-zug sẽn yaa: “Comment vivre avec moins.”

•   Ra sãam-y y sẽkã ye.

   Biiblã sẽn yete: “Kell-y n kẽn-y ne yam, n da sãam y sẽkã ye.”—Kolos rãmbã 4:5.

   Baa ne y sẽn pa le tar wakat takɩ y sẽn yãk tʋʋmã yĩnga, kell-y n tall-y minim-sõamyã n da sãam y sẽkã ye. Y sã n maand woto na n sõngame tɩ y bũmb fãa kell n sigl sõma, la kɩt tɩ y nand y meng me.

•   Sak-y n tʋm-y tʋʋm toor-toore.

   Biiblã sẽn yete: “Tʋʋmd buud fãa sẽn tʋm ne wɩsg-m-meng tara yõodo.”—Yel-bũnã 14:23.

   Sak-y n tʋm-y tʋʋmd sẽn yaa toor ne y pĩnd tʋʋmdã. Tõe tɩ yɩ tɩlɛ tɩ y sak tʋʋmd nebã sẽn pa nande, wall yaoodã sẽn pa ta yãmb pĩnd tʋʋmdã.

•   Kell-y n pẽdg-y ne tʋʋm baoobo.

   Biiblã sẽn yete: “Bʋd f bõn-buud yibeoogo, la f ra bas f nus tɩ yɩ zaalem zaabr ye. Bala, fo ka mi bõn-buud ning sẽn na n sake, wall a yiibã fãa sã n na n yɩɩ sõama ye.”—Koɛɛg soaba 11:6.

   Kell-y n bolg-y tʋʋma. Togs-y neb a taabã tɩ y baooda tʋʋma. Togs-y y roagdba, y mitinsi, y sẽn da tʋmd ne neb ninsã la y yagse. Gẽes-y tʋʋm baoob biru-rãmbẽ wã, zʋrnall-dãmbẽ wã wall zĩis a taab nebã sẽn mi n gʋls n baood neb n na n dɩk tʋʋmã, la tʋʋm-noor sãnda sɩt wɛɛb-rãmb pʋsẽ. Sak-y n deeg-y tɩ y na n kẽnga tʋʋm zĩis wʋsg pʋsẽ, la tɩ y na n gʋlsa demand-dãmb wʋsg n yaool n wa paam tʋʋmde.