A Nikola ne a pag a Selin zu-loɛɛgã ra yaa toore. Fãrens filiyallã n kos-b tɩ b kẽng tiging a to, tɩ b sake. B yeelame: “Sɩngrẽ wã, d sũur da noomame, la rẽ poor bilfu, d sũur sãama d sẽn da pa le be ne d zo-rãmbã. D ra nan pa minim d tigin-paallã neb sõma ye.” a Sẽn yaa woto wã, bõe la y tõe n maan n paam sũ-noog tigin-pall pʋgẽ? Bõe la neb a taabã tõe n maan n sõng-yã? Bõe la yãmb ne y tigin-paallã neb tõe n maan n keng taab tẽebo?

BŨMB A NAAS SẼN TÕE N SÕNG-YÃ

1. Teeg-y-yã a Zeova. (Yɩɩn. 37:5) A Kazumi sẽn yaa Zapõ saam-bi-poakã zĩnda tiging pʋgẽ n kaoos yʋʋm pisi. B wa n kosa a sɩdã t’a tɩ tʋʋm zĩig a to, tɩ yɩ tɩlɛ t’a toeem tiginga. Bõe la a maan tɩ wilgd t’a ‘basame t’a Zeova wilg-a sore’? Ad a sẽn yeele: “Mam pʋʋsa a Zeova naoor wʋsg n wilg-a bũmb ning sẽn kẽesd-m rabeemã, m sẽn get tɩ m yaa m yembrã la m yɩɩrã. Wakat fãa a Zeova ra kõt-m-la pãnga.”

Bõe la y tõe n maan n maneg n teeg a Zeova? Sẽn na yɩl tɩ tɩɩg lebg bedre, rẽnda a paam koom la noosmã sẽn be tẽn-gãongã pʋgẽ wã. Tõnd me sã n dat tɩ d tẽebã pãng paase, rẽnda d maan bũmb toor-toore. A Nikola sẽn yaa saam-biig ning yell d sẽn zoe gomã bãnga bũmb sẽn sõngd-a t’a maneg n bas a yam t’a Zeova na n teel-a lame. A bʋgsda neb sẽn mong b mens bũmb wʋsg Wẽnnaam raabã maaneg yĩng mak-sõng zugu. Wala makre a Abrahaam, a Zeezi la a Polle. Y sã n zãmsd Biiblã n pa vaandẽ, sẽn wa n yaa bũmb ning fãa n toeem y vɩɩmã pʋgẽ, y na n tõog n maoo ne. La pa rẽ bal ye. Y na n tõog n kenga y tigin-paallã neb raood me.

 2. Ra rɩk-y y pĩnd tigingã yɛl n mak ne tigin-paallã rẽnd ye. (Koɛ. 7:10) A Zill yaa saam-biig sẽn yi Benẽ n na n tɩ zĩnd Etazĩni. A mikame tɩ tẽngã neb minimd yaa toor fasɩ ne a sẽn yiẽ wã. A yeelame yaa: “M da getame tɩ yaa wa yaa tɩlɛ tɩ m togs m vɩɩmã kibar ned ning fãa m sẽn sege.” A sẽn da pa minim rẽ wã kɩtame t’a sɩng a meng zãagr ne tigingã neba. A sẽn wa n bãng saam-biisã la saam-bi-pogsã sõma wã, a toeema a tagsgã. A yeelame yaa: “Masã m bãngame tɩ sẽn wa n yaa tẽngã zĩig ning fãa la f be, nebã fãa yaa a yembre. Yaa b sẽn gomd to-to wã la b manesmã n yaa toor bala. D pa segd n modg nebã tɩ b toeem ye.” Rẽ wã, ra rɩk-y y pĩnd tigingã yɛl n mak ne tigin-paallã rẽnd ye. Saam-bi-poak a Annliiz sẽn yaa so-pakdã yeelame yaa: “M sẽn toeem zĩigã, yaa m sẽn dat n bãng bõn-paal yĩnga. Pa m sẽn saagd n na n le tɩ paam bũmb nins m sẽn basã ye.”

Kãsem-soab me pa segd n dɩk a pĩnd tigingã yɛl n mak ne a tigin-paallã rẽnd ye. Yɛlã sẽn yaa toor y tigin-paallã pʋgẽ wã pa rat n yeel tɩ pa sõma ye. (Koɛ. 3:1, 7b) Nand tɩ y toeem bũmbu, yɩta sõma tɩ y reng n bao n wʋm yɛlã võor sõma. Yaa sõma n yɩɩd tɩ y kõt mak-sõng la y ra bao n modg tigingã nebã tɩ b maan wa yãmb sẽn datã ye.—2 Kor. 1:24.

3. Naagd-y tigingã neb n maand bũmb wʋsgo. (Fili. 1:27) Yaa sɩd tɩ f sã n yik n na n tɩ zĩnd zĩig a to, rɩta sẽk wʋsg la wat ne yaamse. La y sã n ta y zĩ-paallẽ wã, tara yõod wʋsg tɩ y ra bas tɩ kaoos tɩ y yaool n sɩng tigissã maaneg ne y tigin-paallã ye. Sã n tõe bɩ y kẽnd Rĩungã roogẽ n maand tigissã la y ra pa zakẽ n maan ye. Y tigin-paallã neb sã n zɩ n yã yãmb wall b sã n kaoosd n yãt yãmba, b na n maana a wãn n sõng-yã? Saam-bi-poak a ye yʋʋr sẽn boond t’a Lusinda ne a kom-pugli a yiib yik n tɩ zĩnda Afirikdisiid tẽn-bedr a ye pʋgẽ. A yeelame yaa: “M zo-rãmbã sagla maam tɩ m modg n pẽnegd m tigin-paallã neb sõma, n moond koɛɛgã ne-b la m kẽesd m toog tigissã sasa. D yeela saam-biisã me tɩ b tõe n maanda koɛɛgã mooneg tigissã tõnd zakẽ wã.”

Yãmb ne y tigin-paallã neb sã n “naagd taab” n maood n tʋmd Wẽnnaam tʋʋmã, na n kenga y “tẽebã” la bãmb me tẽebã. A Annliiz ning yell d sẽn zoe n gomã kãsem-dãmb sagl-a lame t’a modg n moon ne a tigin-paallã neb fãa. Baasa wãna? A yeelame yaa: “Pa yã n kaoos la m bãng tɩ m sã n maand woto, sõngd-m lame tɩ m paam zood sõma ne tigingã neb ye.” Sẽn paase, y sã n naagd n maand bũmb kẽere, wala makre, n yẽesd Rĩungã roog wall n get Rĩungã roog yelle, y tẽed-n-taasã na n yãame tɩ y geta tigingã wa yãmb me tiginga. Y sã n naagd y tigin-paallã neb n maand bũmb wʋsgo, b na n minima yãmb tao-tao tɩ y getẽ tɩ b yaa wa y zakã neba.

4. Yõg-y zood ne y tigin-paallã neba. (2 Kor. 6:11-13) Bũmb sẽn tar yõod wʋsg y  sẽn tõe n maan n paam zo-rãmba, yaa y sẽn na n wilgd nebã tɩ b yell pak-y lame. Rẽ wã, wat-y tigissã pĩnd la y ra loogd pĩnda, n paamd n sõsd ne nebã n bãng-b sõma. Modg-y n bãng-y b yʋyã. Y sã n tẽegd nebã yʋy la y nong b zĩigẽ tɩ y pẽnegr me yaa nana, b na n dat n bãng-y lame n paase, tɩ rẽ kɩt tɩ y paam tɩ b lebg y zo-rãmba.

Ra solg-y y sẽn sɩd yaa a soab y sẽn dat tɩ nebã nong-y yĩng ye. Bas-y tɩ b bãng y sẽn sɩd yaa ned ningã. Maan-y wa a Lusinda sẽn maanã. A yeelame: “D sẽn yãk yam n mi n bool neb d zakẽ wã kɩtame tɩ d tar zo-rãmb hakɩɩka.”

“BƖ Y REEGD TAAB SÕMA”

Neb kẽer sã n ta tigin-paall pʋgẽ b yɛɛsda b sẽn pa mi nebã yĩnga. Woto wã, neb sã n wa y tigingẽ wã paalem, bõe la y tõe n maan tɩ sõng-ba? Tẽn-tʋmd a Poll sagla kiris-nebã yaa: “Woto wã, bɩ y reegd taab sõma wa Kiristã me sẽn deeg yãmb sõma, Wẽnnaam waoogr yĩngã.” (Rom. 15:7) Kãsem-dãmbã sã n dɩkd a Zeezi togs-n-taare, b tõe n sõnga neb nins sẽn nan wa wã tɩ b bas b yam. (Ges-y zĩ-gũbrã: “ Y sã n toeem tiginga, bõe la y tõe n maan tɩ sõng-yã?”) La tigingã neb fãa tara b sẽn tõe n maan tɩ neb nins sẽn nan wa wã yam gãande.

Reeg taab sõma wã pa tek bool nebã y zakẽ wã bal ye. Y tõe n maana bũmb takɩ me n sõng-ba. Wala makre, saam-bi-poak a ye talla saam-bi-poak sẽn nan wa b tigingẽ wã paalem n gilg tẽngã, la a wilg-a a sẽn tõe n maan to-to n tõog n paam tagsɩ bɩ biis n kẽnd a kẽna. Saam-bi-poakã sẽn maan bũmb ningã yɩ-a-la noog wʋsgo, la sõng-a tɩ zĩ-paalgẽ wã zĩndg yɩ nana ne-a.

Y TÕE N PAAMAME TƖ Y TẼEBÃ PÃNG PAASE

Sʋʋr sã n bɩtẽ a yĩngã fʋkda naoor wʋsg t’a yaool n wa tõog n yɩke. Woto me, y sã n toeem tiginga, y segd n basa tagsg buud fãa  sẽn kẽesd-y rabeem tɩ y pa tõe n tʋm a Zeova tʋʋmã sõma wa sʋʋr sẽn pa tõe n yɩke. A Nikola ne a Selin yeelame yaa. “F sã n yik n tɩ zĩnd zĩig a to, sõngd-f lame tɩ f paam minim bũmb wʋsg wɛɛngẽ. Sẽn na yɩl n tõog n vɩɩmd zĩig ning d sẽn yik n kẽngã la d minim nebã, yɩɩ tɩlɛ tɩ d bɩɩs zʋg-sõma n paase.” A Zãsarl ning yell d sẽn gom sɩngrẽ wã, wilga b sẽn toeem tigingã sẽn naf a zakã rãmb to-to. A yeelame: “D sẽn toeem tigingã kɩtame tɩ tõnd kambã tẽebã bɩ, tɩ bãmb ne a Zeova zoodã me paam pãnga. Kiis a wãn poor bala, d bi-puglã sɩnga sõss maaneg Kiris-nebã vɩɩm la b tʋʋma tigsg sasa. D bi-riblã me lebga koe-moond sẽn nan pa reeg lisgu.”

La y yɛlã sã n kɩt tɩ y pa tõe n tɩ zĩnd zĩig a to, wala makre, zĩig koe-moondb raab sẽn yaa kãsenga, bõe la y tõe n maane? Y tõe n tũu sagls nins sẽn be sõs-kãngã pʋgẽ wã kẽere, tɩ y tigingã lebg wa tigin-paall y nifẽ. Pʋʋsd-y-yã a Zeova la y naagd y tigingã neb n maand bũmb kẽere. Wala makre, n moond koɛɛgã ne-ba, n yõgd zood ne neb a taaba, la y paasd yãmb ne y pĩnd zo-rãmbã zood pãnga. Y tõe n yãka yam me n maan bũmb takɩ n sõng neb nins sẽn nan wa tigingã pʋgẽ paalmã bɩ sẽn dat sõngrã. Sẽn mik tɩ yaa nonglmã n wilgd tɩ d yaa kiris-neb hakɩɩkã, y sã n sõngd y taabã na n paasa yãmb ne a Zeova zoodã pãnga. (Zã 13:35) Y tõe n kɩsa sɩd tɩ “Wẽnnaam sũur nooma ne maan-kãensã buudu.”—Ebre. 13:16.

Kiris-neb wʋsg tõog n tɩ zĩnda zĩig a to n paam bark baa ne sẽn pa yɩ nana wã. Yãmb me sã n make, y na n tõogame! A Annliiz yeelame yaa: “M sẽn toeem tigingã sõng-m lame tɩ m pak m sũurã yalenga.” Masã a Kazumi kɩsa sɩd tɩ f sã n toeem tiginga, a Zeova tõe n sõng-f lame n yɩɩg f sẽn da tẽedã menga. La a Zill yẽ? A yeelame yaa: “M sẽn paam zo-rãmbã kɩtame tɩ yaa wa m bee ne m zakã rãmba. M minima m tigin-paallã neb sõma tɩ yaa toog meng tɩ m loog n bas-ba.”