DAAR a ye, pag yʋʋr sẽn boond t’a Alɛgsãndra yii Amerikdisiid tẽng a ye ne kaare, n na n kẽng tẽng a to. B sẽn ta toadgẽ wã, kaarã yalsame tɩ b na n ges nebã sɛba. A Alɛgsãndra paa kaarã pʋgẽ, n wa wʋm ned sẽn pa yɩng n yeel tɩ: “Kaarã tõe n loogame, la sinoa wã na n paa ka.” A Alɛgsãndra sigame n na n gese. A sẽn sigã, a yãa rao sẽn yaa sinoa sẽn makd n na n bilg sodaag a sẽn pa tar a sɛbã võore. Raoã ra pa wʋmd ɛspayõllã sõma ye. A Alɛgsãndra yaa a Zeova Kaset soaba, n da be tiging sẽn gomd sinoa. A kosame n na n lebg sinoa wã goam ne ɛspayõlle, sẽn na n yɩl tɩ sodaagã wʋme.

Raoã yeelame tɩ yẽ ra tara a sɛbã fãa, la tɩ b zuu yẽ teedã ne a ligdi. Sɩngrẽ wã, sodaagã pa tẽ raoã goam ye. A ra tagsdame meng t’a Alɛgsãndra tʋmda ne neb sẽn koosd b taaba. La a wa n sak n deega raoã goamã, la a kɩtame t’a yao, a sẽn pa tar a sɛbã yĩnga. Raoã ra pa tar ligdi, t’a Alɛgsãndra peng-a dolaarã ligd wakɩr 20. A ra pa mi a sẽn na n pʋʋs a Alɛgsãndra bark to-to, n yeel-a t’a sã n wa n na n lebs-a a ligdã, a na n dogla bũmbu. La a Alɛgsãndra leok-a lame tɩ yẽ pa maan woto n dat tɩ b yao-a n lebse, la t’a sõng-a-la ne yamleoogo, bala a tagsdame tɩ zemsame. A kõo raoã sɛb sẽn gomd Biiblã yelle, la a sagl-a t’a bao n sɩng Biiblã zãmsg ne a Zeova Kaset rãmbã.

Ned sã n sak n maan bũmb n sõng a to a sẽn pa mi, tɩ d wʋme, sɩd noogda sũuri. Sãmbg sẽn kae, tũudmã fãa pʋgẽ, neb n be n maand woto, la baa neb sẽn pa tar tũudum maanda woto. Sã n da yaa yãmba, y na n sak n sõnga raoã bɩ? Sok-kãngã tara võore, bala a Zeezi yeelame: “Sẽn kõt-a sũ-noog yɩɩda sẽn deegd-a.” (Tʋʋmã 20:35, Sebr Sõngo) Siãnsã bãngdb me vaeesame n yã tɩ ned sã n yaa kõta, nafd-a lame. Wãn to? D na n goma rẽ yelle.

Bũmb wʋsg n wilgd tɩ naoor wʋsgo, ned sã n yaa kõta, a tara sũ-noogo. Tʋm-tʋmd a Poll yeelame tɩ “Wẽnnaam nonga ned ning sẽn kõt ne sũ-noogo.” A ra gomda kiris-neb yelle. B sak n kõo kũuni, sẽn na yɩl n sõng b tẽed-n-taas sẽn da be naong pʋgẽ. (2 Korẽnt-rãmbã 8:4; 9:7) A Poll goamã pa rat n yeel tɩ yaa b sũy sẽn da noom yĩng la b sẽn sõng b tẽed-n-taasã ye. Yaa b sẽn tõog n sõng-bã n kɩt tɩ b sũyã ra noomẽ.

Sɩd me, bãngdb n vaees n yã tɩ ned sã n kõ a to kũuni, bũmb n maand kõtã zugẽ, n kɩt t’a sũurã noome. A taab me n vaees n yã tɩ ned sã n kõ a to ligd n na n sõng-a, sũ-noog ning a sẽn paamdã yɩɩda yẽ mengã sẽn da na n dɩ ligdã.

Rẽ yĩnga, y mi n tagsame tɩ y yɛlã sẽn yaa to-to wã kɩtame tɩ y pa tar n na n kõ y to bɩ? La bãng-y tɩ ned buudã fãa tõe n yɩɩ ned “sẽn kõt ne sũ-noogo.” Sã n yaa ne yam-sõng la d kõ ned bũmbu, baa pa wʋsgo, yaa sõma. A Zeova Kaset soab n tool sẽn yiisd-b seb-kãnga wã lɛtre, n paas ligdi. Ad a sẽn  yeel lɛtrã pʋgẽ: “Yʋʋm nins sẽn loogã, mam sẽn tõog n kõ ligd ning Rĩungã roogẽ wã pa waoog ye. La a Zeova kõo maam tɩ yɩɩg m sẽn kõ wã hal wʋsgo. . . . M pʋʋsd-y-la barka, m sẽn paam n tõe n kõ ligd n teel a Zeova tʋʋmdã. Sɩd kengda m daoodo.”

La pa ligd bal la d tõe n kõ d to ye. Bũmb a taab n be d sẽn tõe n kõ.

Biiblã yeelame: “Nin-sõng maanda a meng neere, la nin-toaag maanda a meng wẽnga.” (Yel-bũnã 11:17) Nin-sõng yaa ned sẽn yaa kõta. A sakd n dɩka a weerã, a pãngã, la bũmb a taab a sẽn tar n sõngd a taaba. A sẽn maand woto wã sɩd nafd-a-la bũmb wʋsg wɛɛngẽ, wala makre, yĩnsã laafɩ wɛɛngẽ.

Bãngdb n vaees n yã tɩ ned sã n sõngd a taab ne yamleoogo, a pa wae n bẽedẽ, a yam me pa wae n ka a menga. Ned a woto nong n tara keelem. Ned sã n bẽed bãag sẽn pa tar tɩɩm, wala ɛskelerooz pa rẽ bɩ SIDA wã, a sã n yaa kõta, paasda a laafɩ wã. B leb n wilgame tɩ ned sã n yaa rãam yamb n modg n base, a sã n maand bũmb n sõngd neb a taaba, tõe n kɩtame t’a yam ra yi a menga, la kɩt me t’a ra leb n lʋɩ rã-yũurã pʋgẽ ye.

Bũmb ning sẽn kɩt tɩ yaa woto wã, yaa tɩ ned sã n “kʋmd a taaba, n sakd n sõngd-b la a maand-b neere, a sũur pa wae n sãamdẽ ye.” Ned sã n yaa kõta, tõe n booga a yɩɩre, la kɩt me t’a ra bẽ tãnsiyõ ye. Ned pag wall a sɩd sã n maan kaalem, a sã n sõngd a taaba, pa na n yã n kaoos la sũ-sãangã boog ye.

Hakɩɩka, ned sã n yaa kõta, sɩd nafd-a lame.

A Zeezi ra yeela a karen-biisã yaa: “Kõ-y tɩ b na kõ yãmb me. Y na n kolemda y fuug tɩ b kiig-y wamd pidungu, wamd sẽn yegs yegse n pĩ tɩ baas n sẽegdẽ. Yãmb sẽn dɩk wamd ning n mak n kõ y taabã, wamd kãng la b rɩkd n mak n kõ yãmb me.” (Luk 6:38, Sebr Sõngo) Y sã n kõ y to kũuni, na n kɩtame tɩ yẽ me rat n kõ-y bũmbu, n wilg t’a sũur nooma ne y sẽn maanã. Neb sã n yaa kõtba, kɩtdame tɩ b tõe n lagem taab n tʋme, tɩ b zoodã me paasdẽ.

Bãngdb n vaees n yã tɩ “neb nins sẽn wae sakd ne yamleoog n sõngd b taabã mak-sõngã kɩtdame tɩ neb a taab rɩkd b togs-n-taare.” Sɩd me, “nebã sã n mi n karem kibay sẽn gomd neb sẽn sõng b taab yelle, kɩtdame tɩ b maneg n dat n yɩ kõtba.” Sẽn paase, bãngdb n maan vaeesgo, n yeel tɩ ned buud fãa tõeeme t’a sẽn beẽ wã neb sak n maan bũmb ninga, baa neb a sẽn pa mi wall a sẽn zɩ n yã. Rat n yeelame tɩ ned sã n maan bũmb n sõng a taaba, tõe n kɩtame tɩ neb sẽn wʋm me maan woto, hal tɩ wa lebg neb wʋsgo. Rẽ yĩnga, y pa rat n vɩɩmd zĩig sẽn pid ne neb a woto buud sɩda? Vẽenega, neb wʋsg sã n yaa kõtba, sɩd wata ne nafa wʋsgo.

Ad kibar sẽn wilgd rẽ. Yaa bũmb sẽn maan Floriid sẽn be Etazĩni soolmẽ wã. Sob-kãseng  n da sãam teed wʋsg be, t’a Zeova Kaset rãmb kẽng n na n tɩ sõnge. Roog la b ra rat n manege, n da gũudẽ tɩ b wa ne manegrã teedo. B sẽn wa n gũudẽ wã, b yãame tɩ yak a ye lalg n sãame, tɩ b sõng-a n manege. Rẽ zugẽ bilfu, yakã gʋlsa lɛtr n tool a Zeova Kaset rãmbã biru-kãsengã. Ad a sẽn yeele: “Mam pa na n tol n yĩm nin-kãensã sẽn maanã ye. Mam sẽn seg nin-sõma a woto buud pa waoog ye.” A sũur sẽn da noomã kɩtame t’a tool ligd zem bala, n yeel tɩ yaa sẽn na n teel a Zeova Kaset rãmbã tʋʋmdã sẽn yaa sõma hal wʋsgã.

Bũmb a to me siãnsã bãngdb sẽn vaees n yã yaa tɩ ninsaal buudã fãa tʋll n sõng a taabã. B yeelame tɩ nand meng tɩ biig zãms goamã, a zoe n tʋll n sõnga neb a taaba. Bõe yĩnga? Biiblã wilgda a võore. A yeelame tɩ Wẽnnaam naana ninsaal n ‘wẽneg a menga,’ rat n yeel tɩ ninsaal tara zʋg-sõma nins Wẽnnaam sẽn tarã.—Sɩngre 1:27.

Tõnd Naand a Zeova sẽn yaa Wẽnnaam ning buudã sɩd bee yamleoogo. Wala makre, a yaa kõta. Yẽ n naan tõndo, la a kõt-d bũmb nins fãa sẽn yaa tɩlɛ ne d vɩɩmã. (Tʋʋmã 14:17; 17:26-28) Wẽnnaam yaa d saasẽ Ba. D sã n zãms Biiblã sẽn yaa a Gomdã, na n sõng-d lame tɩ d bãng-a sõma, la d bãng raab ning a sẽn tar ne ãdem-biisã. Biiblã leb n wilgdame tɩ Wẽnnaam maana bũmb tõnd beoog na yɩ neer yĩnga. * (1 Zã 4:9, 10) A Zeova yaa bũmb fãa kõta. D sã n dɩk a togs-n-taar n yaa kõta, noogda a sũuri, la nafd tõnd mengã. Woto pa segd n ling-d ye. Bala, Wẽnnaam naana tõnd a meng wẽnego.—Ebre-rãmbã 13:16.

Sõsgã sɩngrẽ, d goma pag yʋʋr sẽn boond t’a Alɛgsãndra yelle. Yãmb mi a kibarã sẽn baas to-to bɩ? Rao a ye sẽn da be kaarã pʋgẽ yeela a Alɛgsãndra t’a loba a ligdã. La b sẽn ta tẽng ning b sẽn da rebdẽ wã, raoã a Alɛgsãndra sẽn sõngã baoo a zo-rãmba, n deeg ligdã n lebse. Sẽn paase, raoã tũu a Alɛgsãndra saglgã, n sɩng Biibl zãmsgo. Kiis a tãab poore, b le yãa taab Peru soolmẽ wã, tigis-kãseng a ye sẽn zĩnd ne sinoa sasa. Raoã boola a Alɛgsãndra ne neb nins sẽn tũ-a n wa tigis-kãsengã a rɛstoorã pʋgẽ tɩ b rɩ. A maana woto, n na n pʋʋs-a bark a sẽn maan bũmb nins fãa n sõng-a wã yĩnga.

Y sã n yaa kõta, la y sõngd y taaba, y paamda sũ-noog wʋsgo. La y sã n tõog me n sõng ned t’a bãng Wẽnnaam a Zeova sẽn yaa bõn-sõma buud fãa kõtã, y na n paama sũ-noog n tɩ yɩɩda. (Zak 1:17) Rẽ yĩnga, yãmb yaa kõta, n paamd nafa nins rẽ sẽn wat ne wã bɩ?