•  Sɩngr goama 2

•   D sẽn bãng Biiblã kareng pʋgẽ 3-5

  •   Diskuuri 3

  •   D bʋgs Wẽnnaam Gomdã zug neere 4

  •   Biiblã karengo 5

•   Moon-y koɛɛgã sõma 6-14

  •  Y sẽn tõe n sɩng sõsg to-to 7

  •  Lebg-y n tɩ kaag-y neba 8

  •  Sõng-y-b tɩ b lebg a Zeezi karen-biisi 9

  •  Wilg-y y sẽn tẽed bũmb ninsa 10

  •  Diskuuri 11

  •  Saglse, moon-y koɛɛga sõma karen-biisa yĩnga 12

  •  Sõsga sẽn na n yɩ zĩis ninsi 13

  •  Video-rãmba la sɛba tall n tʋma 14

•   D wilg tɩ d yaa kiris-neb hakɩɩka 15-16

  •   Tigingã Biibl zãmsgo 16

•   Baasg goama 17

•   Pẽgr la saglse 18

•   Wakatã 19

•   Tigims sull yel-gɛtã kaagre 20

•   Tigs-kãseng semenne 21

•   Tẽegrã semenne 22

•   Kiris-nebã vɩɩm la b tʋʋma tigsg yel-gɛta 23

•   Kiris-nebã vɩɩm la b tʋʋma tigsg perzidã 24

•   Sagend a to 25

•   Karen-dot a taaba 26

•   Video-rãmba 27

1. Sagls nins sẽn be seb-kãngã pʋgẽ wã na n sõnga neb nins sẽn tar sõsg Kiris-nebã vɩɩm la b tʋʋma tigsgã sasa wã. Nand tɩ nin-kãens segl b sõsgã, b segd n lebg n gesa sagls nins sẽn be Kiris-nebã vɩɩm la b tʋʋma tigsgã na-kẽndr sebr pʋgẽ wã, la seb-kãngã pʋgẽ me. B segd n sagla koe-moondbã fãa tɩ b segl b mense, tɩ karen-biig ning sã n kaẽ bɩ b tõe n ledg-a. B tõe n kõo ned sẽn wat tigissã wakat fãa n pa vaandẽ sor t’a yɩ Wẽnnaam tʋʋmdã lekoll karen-biiga, sã n mik t’a sak n deega Biiblã sẽn yet bũmb ninsã, t’a sẽn vɩ to-to wã me zems ne Biiblã noyã. Ned sã n nan pa koe-moonda, n yaool n dat n yɩ Wẽnnaam tʋʋmdã lekoll karen-biiga, Kiris-nebã vɩɩm la b tʋʋma tigsgã yel-gɛtã na n sõsa ne-a, n wilg-a b sẽn baood t’a maane, tɩ sõsgã baasgẽ bɩ a togs-a a sã n tõe n naagame. Sõsgã sasa, yaa tɩlɛ tɩ koe-moond ning sẽn zãmsd nin-kãng soab Biiblã, pa rẽ bɩ a roagd sẽn yaa a Zeova Kaset soab naage. Bũmb nins b sẽn baood tɩ ned sẽn dat n yɩ Wẽnnaam tʋʋmdã lekoll karen-biiga, la ned sẽn dat n lebg koe-moond sẽn nan pa reeg lisg maanã fãa yaa a yembre.—od sak a 8 sull a 8.

2. Minit a yembre. Semen fãa, b sã n yɩɩl la b pʋʋs n na n sɩnge, Kiris-nebã vɩɩm la b tʋʋma tigsgã perzidã wã na n sõnga kɛlgdbã tɩ b tʋll n kelg sõssã. A segd n goma bũmb nins sẽn na n naf tigingã n tɩ yɩɩdã yelle.

 3. Diskuuri: Minit piiga. Kiris-nebã vɩɩm la b tʋʋma tigsgã na-kẽndr sebr pʋgẽ, b ningda diskuurã gom-zugu, la gom-zu-bi a yiib bɩ a tãabo. Yaa kãsem-soab bɩ kãsem-sõngd sẽn tar minim n segd n maan diskuurã. Sã n yaa Biiblã sebr la b na n sɩng vaeesgo, b na n deng n ninga video sẽn gomd seb-kãng yelle. Sõsdã tõe n goma video wã zĩis kẽer sẽn be a diskuurã pʋgẽ yelle. La a segd n modgame n wɛgs gom-zu-bi wã fãa. Sẽk sã n beeme, a segd n goma imaaz-rãmbã yelle, la a wɛgs Biiblã goam kẽer sẽn be sebrã zug tɩ lekd diskuurã.

 4. D bʋgs Wẽnnaam Gomdã zug neere: Minit piiga. Yaa sogsg la leoore. B pa segd n togs bũmb sɩngrẽ wã, bɩ baasgẽ wã ye. Yaa kãsem-soab bɩ kãsem-sõngd sẽn tar minim n na n wɛgs-a. A segd n soka kɛlgdbã sogsg a yiibã fãa. Sẽn paase, yẽ n get a sã n na n karma vɛrse-rãmb nins fãa sẽn be be wã. Sẽn na n kõ-a leoor pa segd n gom tɩ yɩɩg segõnd 30 ye.

 5. Biiblã karengo: Minit a naase. Yaa rao n segd n karme. A segd n karma vɛrse nins b sẽn kõ-a wã bala, la a ra togs bũmb sɩngrẽ wã, bɩ baasgẽ wã ye. Perzidã wã sẽn segd n maan n tɩ yɩɩd yaa a sõng karen-biisã tɩ b wa tõog n karemd sõma, tɩ nebã wʋmd b karengã võore, tɩ b ra karemd n tirda, tɩ b bãng gom-biis nins b sẽn dat tɩ nebã wʋm n yɩɩdã, tɩ b tõog n toeemd b koe-zomã, la b tũud karengã bãnã, tɩ yɩ wa b sẽn gomd to-to raasenkamã. Sẽn mik tɩ wakat ninga, vɛrse-rãmbã yaa wʋsgo, tɩ sasa ninga pa wʋsgã, Kiris-nebã vɩɩm la b tʋʋma tigsg yel-gɛtã sã n na n kõ karen-biig Biiblã karengo, a segd n tags n gesa a sẽn tõe la a sẽn pa tõe.

6. Minit piig la a nu. Tigsgã bab-kãngã bõn-daabã yaa sõng koe-moondbã tɩ b paas b minimã koɛɛgã mooneg pʋgẽ, b sẽn sõsd ne nebã to-to wã wɛɛngẽ, la b sẽn zãmsd nebã Biiblã to-to wã me wɛɛngẽ. Sã n wa yaa tɩlɛ, b tõe n yãka kãsem-dãmb tɩ b karem Biiblã, bɩ n wɛgs moon-y koɛɛgã sõma sõssã. Karen-biig fãa segd n tũu Nebã zãmsgã sebrã, wall Nong-y nebã borsiirã sak ning b sẽn wilgã saglse. Bee Kiris-nebã vɩɩm la b tʋʋma tigsgã na-kẽndr sebrã pʋgẽ. Sasa ninga, b na n ninga Sõsg ne kɛlgdbã, moon-y koɛɛgã sõma wã zĩigẽ. Yaa kãsem-soab bɩ kãsem-sõngd sẽn tar minim la b na n yãk t’a lʋɩ taoore.—Ges-y  sull 15 wã sẽn wilgd b sẽn segd n wɛgs sõs-kãensã to-to.

 7. Y sẽn tõe n sɩng sõsg to-to: Saam-biig bɩ saam-bi-poak tõe n wɛgsa sõs-kãnga. Sõsdã sã n yaa raoa, a sõsd-n-taagã segd n yɩɩ raoa, a sã n yaa paga, a sõsd-n-taagã segd n yɩɩ paga. Sã n yaa pag ne raoa, segd n yɩɩ neb sẽn kĩ ne taaba. Sõsdbã tõe n zĩndame bɩ n yalse. Y sã n dat n bãng bũmb a taab n paas sõs-kãngã wɛɛngẽ, la y sẽn tõe n wɛgs-a to-to wã wɛɛngẽ, bɩ y ges  sull 12 ne  13 wã

 8. Lebg-y n tɩ kaag-y nebã: Saam-biig bɩ saam-bi-poak tõe n wɛgsa sõs-kãngã. Sõsdã sã n yaa raoa, a sõsd-n-taagã segd n yɩɩ raoa, a sã n yaa paga, a sõsd-n-taagã segd n yɩɩ paga. (km 5/97 s.n. a 2) Sõsdbã tõe n zĩndame bɩ n yalse. Karen-biigã segd n wilga d sẽn tõe n yeel ned d sẽn lebg n tɩ kaag bũmb ninga. Y sã n dat n bãng bũmb a taab n paas sõs-kãngã wɛɛngẽ, la y sẽn tõe n wɛgs-a to-to wã wɛɛngẽ, bɩ y ges  sull 12 ne  13 wã.

 9. Sõng-y-b tɩ b lebg a Zeezi karen-biisi: Saam-biig bɩ saam-bi-poak tõe n wɛgsa sõs-kãnga. Sõsdã sã n yaa raoa, a sõsd-n-taagã segd n yɩɩ raoa, a sã n yaa paga, a sõsd-n-taagã segd n yɩɩ paga. (km 5/97 s.n. a 2) Sõsdbã tõe n zĩndame bɩ n yalse. Sõs-kãngã sasa, b na n wilga Biibl zãmsg sẽn zoe n sɩng sẽn maand to-to. B pa segd n togs bũmb sɩngrẽ wã, bɩ baasgẽ wã, sã n pa b ratame tɩ karen-biigã paas a minim rẽ wɛɛngẽ. Pa tɩlɛ tɩ b zẽk b koɛɛg n karem sulã fãa ye.

 10. Wilg-y y sẽn tẽed bũmb ninsã: B sã n wilg tɩ sõsgã yaa diskuuri, yaa saam-biig n segd n wɛgs-a. B sã n wilg tɩ yaa mak-n-wilgi, saam-biig bɩ saam-bi-poak tõe n wɛgs-a lame. Sõsdã sã n yaa raoa, a sõsd-n-taagã segd n yɩɩ raoa, a sã n yaa paga, a sõsd-n-taagã segd n yɩɩ paga. Sã n yaa pag ne raoa, segd n yɩɩ neb sẽn kĩ ne taaba. Karen-biigã na n tika bũmb nins sẽn be sebr ning b sẽn wilg sõs-kãng pʋgẽ wã n leok sokrã b sẽn sokã tɩ yɩ vẽeneg la takɩ. Yaa karen-biigã n yãkd a sã n na n togsa a sẽn tik sebr ning n segl a sõsgã bɩ a pa na n togse.

 11. Diskuuri: Yaa diskuur saam-biig sẽn segd n wɛgs tigingã neb taoore. Diskuurã sã n tika Nong-y nebã borsiirã zugu, Vẽnegre A wã zĩigẽ, karen-biigã segd n wilga d sẽn tõe n tall vɛrse wã bɩ vɛrse-rãmbã n tʋm to-to koɛɛgã mooneg sasa. Wala makre, a tõe n wilga sasa ning d sẽn tõe n tall vɛrse ning n tʋme, vɛrse wã võore, la d sẽn tõe n tik vɛrse wã n sõs ne ned to-to. Diskuurã sã n tika Nong-y nebã borsiirã sak a yembr zugu, karen-biigã segd n goma d sẽn tõe n tũ sagls nins sẽn be sakã pʋgẽ wã to-to koɛɛgã mooneg sasa. A tõe n goma makr ning yell b sẽn gom sakã nimero a 1 wã zĩigẽ wã yelle, wall a gom sakã vɛrse-rãmb a taab sẽn tõe n naf-d yelle.

   12. Saglse, moon-y koɛɛgã sõma karen-biisã yĩnga: Sagls nins sẽn be sul-kãngã la sẽn pʋgd-a wã pʋgẽ wã yaa sõss nins gom-zut sẽn yaa: “Y sẽn tõe n sɩng sõsg to-to,” la “Lebg-y n tɩ kaag-y nebã” yĩnga. Sã n pa b yeela bũmb a to, karen-biigã bõn-daabã yaa a gom bũmb Biiblã sẽn yet t’a võorã wʋmb pa toog yelle, la a sok sokr sẽn na yɩl n tõog n lebg n wa nindaare. Karen-biigã segd n goma bũmb sẽn pak a koɛɛgã mooneg zĩigẽ nebã, la sẽn na n sõng-b tɩ b bãng bũmb sẽn tar yõodo. Yẽ n yãkd a sã n na n kãaba kɛlgdã sebr bɩ n wilg-a video sẽn naag tõnd koe-moonegã tʋʋm-teedã. Karen-biigã pa segd n dɩk sõsgã ne zug ye. A segd n modg n paasa a minimã sõs ne nebã wɛɛngẽ. Wala makre, n wilgd a kɛlgdbã tɩ b yell pak-a lame, la a gomd wa raasenkamã.

   13. Sõsgã sẽn na n yɩ zĩis ninsi: B sẽn wilg sõssã sẽn na n yɩ zĩis ninsã wɛɛngẽ, karen-biigã tõe n toeema yɛlã tɩ zems ne sẽn yaa to-to b babgẽ wã. Wala makre:

1.  (1) Zak-zaka: Ka wã, b gomda koɛɛgã mooneg zak-zakã yelle, tɩ yaa tõnd mengã n kẽng a soabã zakẽ, wall yaa ne telefõn bɩ lɛtre. Tõeeme me n yɩ lebg n tɩ kaag ned d sẽn sõs ne zak-zak moonegã sasa.

2.  (2) Segb y sẽn paame: Ka wã yaa sẽn na n wilg tɩ d segd n tũnuga ne segb buud fãa d sẽn paam n taas nebã koe-noogã. Wala makre, tõe n yɩɩ gom bũmb sẽn be Biiblã pʋgẽ yell ne ned d sẽn seg d tʋʋmã zĩigẽ, lekollẽ wã, d sakã pʋgẽ, biis bɩ kaar pʋgẽ, wall zĩig ning fãa.

3.  (3) Zãma zĩigẽ: Ka wã, yaa koɛɛgã mooneg ne perzãntoaar-dãmbã, koɛɛgã mooneg soayã zutu, vʋʋsem zĩisẽ, parking rãmbẽ, wall zĩig ning fãa neb sẽn beẽ.

 14. Video-rãmbã la sɛbã tall n tʋmã: Sẽn zems ne yɛlã sẽn yaa to-to wã, karen-biigã tõe n yãka yam n wilg kɛlgdã video, bɩ n kãab-a sebre. B sã n yeel karen-biigã t’a wilg video, wall yaa yẽ n yãk yam n na n wilg video, a segd n maana wa a wilga kɛlgdã video wã, la b sõs a zugu.

15. Yɩɩllã poore, tigsgã bab-kãngã kaoosda minit 15. Yaa sõsg a ye bɩ a yiib sẽn na n wilg kɛlgdbã b sẽn tõe n tũ bũmb Wẽnnaam Gomdã sẽn yet to-to. Sã n pa b yeela bũmb a to, yaa kãsem-soab bɩ kãsem-sõngd sẽn tar minim n segd n wɛgse. La sã n yaa sõsg tigingã yĩnga, yaa kãsem-soab n segd n wɛgse. B sã n yeel tɩ yaa sõsg ne kɛlgdbã, sõsdã tõe n soka sogsg a taab n paas sogsg nins b sẽn zoe n sokã. A segd n modgame t’a sɩngr goamã yɩ koɛɛga, sẽn na yɩl n paam sẽk n gom bũmb nins sẽn tar yõod n tɩ yɩɩdã yelle, la a bas tɩ kɛlgdbã kẽes b toogo. A sã n segd n boola ned n soke, sã n tõe, yɩta sõma t’a soabã wa ɛstaraadã zugu, la a ra pa a zĩigẽ wã n gom ye.

  16. Tigingã Biibl zãmsgo: Minit pis-tã. Yaa kãsem-soab sẽn mi neb zãmsg sõma n segd n wɛgs bab-kãngã. La kãsem-dãmbã sõor sã n pa waoogẽ, sã n yaa tɩlɛ b tõe n yãka kãsem-sõngdb sẽn tar minim. Kãsem-dãmbã sull segd n yãka kãsem-dãmb nins sẽn tar minimã tɩ b maand tigingã Biibl zãmsgã. B segd n modg n zãmsa tigingã neb sõma la b ra loog wakatã, n wɛgs vɛrse-rãmbã sõma, la b sõng nebã tɩ b bãng zãmsgã sẽn tõe n naf-b to-to. B sã n lebg n ges sagls nins b sẽn kõ, b sẽn tõe n wɛgs sõsg ne kɛlgdbã to-to wã, na n sõng-b-la wʋsgo. (w23.04 s. 24, zĩ-gũbrã) B sẽn yãk bũmb nins tɩ d segd n zãms semennã pʋgẽ wã sã n sa, b pa tog n paas bũmb a taab n wogl zãmsgã ye. Sã n tõe, semen fãa b segd n toeemda tigingã Biibl zãmsg karemdã la a taoor lʋɩtã. Kiris-nebã vɩɩm la b tʋʋma perzidã wã sã n kos tɩ b kʋʋg zãmsgã, taoor lʋɩtã segd n gesa a sẽn na n kʋʋg-a to-to. A tõe n yeelame tɩ b ra karem sull kẽer ye.

17. Minit a tã. Kiris-nebã vɩɩm la b tʋʋma perzidã wã na n lebg n togsa sagls kẽer d sẽn paam tigsgã sasa. A segd n wilga nebã zãmsg ning d sẽn na n paam semen ning sẽn watã. A tõe n wilga sokr b sẽn na n leoke. Sẽk sã n beẽ, a tõe n togsa karen-biis nins sẽn tar sõss semen ning sẽn watã yʋya. Sã n pa b yeela bũmb a to, yaa perzidã wã baasg goam sasa la a na n karem lɛta-rãmb la koeese. B pa segd n togs tigingã taoor koe-moonegã yiib ne pɩɩsgã na-kẽndr ye. B segd n ning-b-la tigingã taablo zugu. Perzidã wã baasg goamã pʋgẽ, sẽkã sã n pa na n sek a na tõog n taas koɛɛg bɩ n karem lɛtre, a tõe n deng n kosa saam-biis sẽn tar sõss “D wilg tɩ d yaa kiris-neb hakɩɩka” pʋgẽ tɩ b kʋʋg b sõssã. (Ges-y  sull 16 ne  19.) B na n baasa tigsgã ne yɩɩll la pʋʋsgo.

18. Karen-biig fãa sõsg poore, kiris-nebã vɩɩm la b tʋʋma perzidã segd n tika sagls nins sẽn be sak ning b sẽn wilgã pʋgẽ n pẽg-a la a sagl-a tɩ ra yõsg minit a yembr ye. Nand tɩ perzidã wã bool karen-biig t’a wa sõse, a pa segd n togs nebã zĩig ning karen-biigã sẽn tik n segl a sõsgã ye. La karen-biigã sõsg poore, perzidã wã sã n pẽg-a n sa, a tog n togsa zĩig ning karen-biigã sẽn tik n segl a sõsgã. A na n togsa a sẽn maan tɩ wilgdẽ t’a tũu saglgã, t’a sã n pa tũ me bɩ a sõng-a ne bʋgsem t’a bãng tɩ yaa sõma t’a maneg n tũ nindaare. Perzidã wã leb n tõe n goma bũmb a taab karen-biigã sẽn maan tɩ yaa sõma, tɩ tõe n naf a mengã wall tigingã neba. Tigsgã poor bɩ wakat a to, a tõe n boola karen-biigã n kõ sagls a taab sẽn tik Nong-y nebã borsiirã, Nebã zãmsgã borsiirã, wall Ecole du Ministere sebrã zugu. Tõe n tika saglg ning karen-biigã sẽn da segd n tũ wã zugu, wall bũmb a to. Y sã n dat n bãng kiris-nebã vɩɩm la b tʋʋma tigsg perzidã wã ne sagend a to wã tʋʋmde, bɩ y ges  sull 19,  24, ne  25.

19. Sõsd baa a ye pa segd n zʋʋg wakatã, baa perzidã wã saglsã. Karen-biig sã n yõsg wakatã, b segd n maana yam n kɩt t’a kʋʋg a sõsgã. La sõsdb a taab sã n yõsg wakatã, sagend a to wã segd n sagla b ned kam fãa tigsgã poore. (Ges-y  sull 24 ne  25.) Tigsgã fãa segd n kaoosa lɛɛr a 1 la minit 45, yɩɩlã ne pʋʋsgã sẽn naage.

20. Tigims sull yel-gɛtã sã n na n kaag tigingã, tigsgã na-kẽndr yaa wa b sẽn wilg Kiris-nebã vɩɩm la b tʋʋma tigissã na-kẽndr sebr pʋgẽ wã. La ad yɛl kẽer b sẽn toeemde: B na n ledga tigingã Biibl zãmsg b sẽn maand tigsgã babg ning sẽn yaa D wilg tɩ d yaa kiris-neb hakɩɩka pʋgẽ wã ne yel-gɛtã sõsg a sẽn na n wɛgs minit 30. Perzidã wã na n lebg n tẽega b sẽn zãmsã, b sẽn na n zãms semen ning sẽn watã, n taas koees la a karem lɛta, la a yaool n bool yel-gɛtã t’a sɩng a sõsgã. Yel-gɛtã sõsg poore, a na n baasa tigsgã ne yɩɩll a sẽn yãke. A tõe n boola saam-biig a to t’a wa baas ne pʋʋsgo. Tigims sull yel-gɛtã kaagr sasa, karen-doog a to b sẽn maand ne tigingã buud-gomd pa segd n zĩnd ye. La sull tõe n maana a tigsg baa tigims sull yel-gɛtã sã n kaagd tiging ning sẽn get sullã yellã. La yel-gɛtã sõsg sasa, sullã neb segd n wa naaga tigingã n kelge.

21. Semen ning b sẽn na n maan tigs-kãsengã, tiging baa a ye pa segd n maan tigsg ye. Zagsã rãmb bɩ ned kam fãa segd n gesa bũmb nins b sẽn da segd n zãms semen-kãng tigissã sasa wã.

22. Tẽegrã sã n maan semennã pʋgẽ, Kiris-nebã vɩɩm la b tʋʋma tigsg pa na n zĩnd ye. La b na n maana koe-moonegã yiib tigissã Tẽegrã daare.

23. Yaa kãsem-dãmbã sull n yãkd kãsem-soab t’a yɩ kiris-nebã vɩɩm la b tʋʋma tigsg yel-gɛta. Yaa yẽ n get tɩ b maand tigsgã tɩ yɩ sõma la zemsd ne saglsã siglgã sẽn kõ wã. A segd n yẽsda ne sagend a to wã sõma. B sã n wa yiis Kiris-nebã vɩɩm la b tʋʋma na-kẽndr sebr fãa, yel-gɛtã segd n yãka neb nins sẽn na n wɛgs sõsg kiis a yiibã tigissã babs toor-toorã sasa. Wala makre, karen-biisã sõssã, sõss a taabã, la tigsgã perzidã wã. (Ges-y  sull a 3-16 ne  24.) A sã n wa na n yãk karen-biisã, a segd n tagsa karen-biigã yʋʋmã yelle, a minimã, la a sã n tõe n pelga a pʋg n wɛgs sõsgã b sẽn na n kõ-a wã. A segd n maana gũusg me, a sã n wa na n yãk neb nins sẽn na n wɛgs tigsgã sõss a taabã. Neb nins fãa sẽn na n wɛgs sõssã tigsgã sasa wã segd n mii tiiri, tɩ ket sẽn yɩɩd semen a tãabo. A segd n tũnuga ne Karen-biig sõsga, Kiris-nebã vɩɩm la b tʋʋma tigsg sasa (S-89) sebrã n kõ karen-biisã b sõssã. Kiris-nebã vɩɩm la b tʋʋma tigsg yel-gɛtã segd n modgame tɩ b tablg na-kẽndrã a sẽn maanã taablo wã zugu. Kãsem-dãmbã sullã tõe n yãka kãsem-soab a to bɩ kãsem-sõngd t’a sõngd Kiris-nebã vɩɩm la b tʋʋma tigsgã yel-gɛtã. Lekollã sõssã sẽn yãk a toogo, yaa kãsem-dãmbã bal n segd n yãk neb nins sẽn na n wɛgsd tigsgã sõss a taabã.

24. Semen fãa, kãsem-soab a ye n na n yɩ Kiris-nebã vɩɩm la b tʋʋma tigsg perzidã. Kãsem-dãmbã sõor sã n pa waoogẽ, b tõe n yãka kãsem-sõngd sẽn tar minim. Yaa yẽ n segd n segl tigsgã sɩngr goama, la a baasg goama. Yaa yẽ me n boond sõsdbã tɩ b sɩng b sõssã. La kãsem-dãmbã sõor sã n pa waoogẽ, a tõe n wɛgsa sõss kẽer tigsgã sasa, sẽn yɩɩd fãa sã n yaa video bal la b na n wilg kɛlgdbã. Sõsd ne a to sʋka, a goamã segd n yɩɩ koɛɛg-koɛɛga. B segd n wae n yãkda kãsem-dãmb nins sẽn tar minimã tɩ b yɩt tigsgã perzidã. Sã n tõe, b na n yãkda Kiris-nebã vɩɩm la b tʋʋmã tigsg yel-gɛtã naoor wʋsg t’a yɩt perzidã n yɩɩd kãsem-dãmb a taabã sẽn tar minimã. Kãsem-soab sã n tar minim n tõe n maand tigingã Biibl zãmsgo, dẽnd tõe t’a tara minim n na n yɩ tigsgã perzidã. La tẽeg-y tɩ kãsem-dãmb nins b sẽn yãkd tɩ b tõe n yɩ perzidã wã tog n kõta karen-biisã sagls ne bʋgsem, n wilgd-b tɩ b nong-b lame la b pẽgd-b sõma. Yaa perzidã wã me n segd n ges tɩ tigsgã ra zʋʋg wakatã ye. (Ges-y  sull 17 ne  19.) Perzidã wã sã n data, la zĩig sã n beẽ, b tõe n ninga mikoro a to ɛstaraadã zugu, tɩ sõsd sã n wa na n sig bɩ a yals be n bool sẽn pʋgd-a wã. A sã n dat me, Biiblã kareng la tigsgã babg ning sẽn yaa Moon-y koɛɛgã sõma wã sasa, a tõe n zĩi ne taabl ɛstaraadã zugu. Woto tõe n kɩtame tɩ b ra sãam sẽkã ye.

25. Sã n tõe, yaa sõma tɩ b yãk kãsem-soab sẽn tar minim nebã zãmsgã la sõssã wɛɛngẽ, t’a yɩ sagend a to. A tʋʋmd yaa a bool kãsem-dãmbã la kãsem-sõngdb nins sẽn wɛgsd sõss buud toor-toorã n sagle, sã n wa mik tɩ segdame. Wala makre, sẽn wɛgsd-b sõss Kiris-nebã vɩɩm la b tʋʋma tigsgã sasa wã, sẽn maand-b diskuur-dãmbã, la Gũusg Gasgã ne tigingã Biibl zãmsg karemdbã la b taoor lʋɩtbã. (Ges-y  sull 19.) Tigingã sã n tar kãsem-dãmb wʋsg sẽn tar minim nebã zãmsgã la sõssã wɛɛngẽ, yʋʋmd fãa b tõe n toeemda sagend a to wã. Pa tɩlɛ tɩ sõsg fãa poor bɩ a bool kãsem-soab bɩ kãsem-sõngd n sagl ye.

26. Sẽn zems ne karen-biisã yɛl sẽn yaa to-to wã, tigimsã tõe n maana karen-dot a taab karen-biisã sõssã yĩnga. Karen-doog fãa segd n tara sagenda. Sã n tõe, segd n yɩɩ kãsem-soaba. Sã n yaa tɩlɛ, b tõe n yãka kãsem-sõngd sẽn tar minim. Kãsem-dãmbã sull segd n gesa ãnd soab la b na n yãke, la b sã n na n toeemda a soabã yʋʋmd fãa. Sagend a to wã segd n tũuda sagls nins sẽn be  sull 18 pʋgẽ wã. Karen-dot a taab sã n beeme, b segd n kosa karen-biisã tɩ b kẽng karen-dot a taabẽ wã D bʋgs Wẽnnaam Gomdã zug neerã sẽn be tigsgã babg ning sẽn yaa D sẽn bãng Biiblã kareng pʋgẽ wã poore. B segd n le wa naaga tigingã neb tigsgã babg ning sẽn yaa Moon-y koɛɛgã sõma wã poore. B sã n wa ning video tɩ b na n sõs a zugu, sã n tõe, sẽn be-b karen-doog a to wã na n paa be n gese, bɩ n kelg sõsgã. Woto sã n pa tõe, sagendã segd n tũnuga ne tablɛt n sõs ne sẽn be-b karen-doog a to wã video wã zugu.

27. Tigsgã sasa, b na n ningda video-rãmba. B na n ningda kiris-nebã vɩɩm la b tʋʋma tigsgã video-rãmb JW Library® aplikasɩyõ wã pʋgẽ, tɩ d tõe n paam-b tablɛt-rãmb la telefõn-dãmb pʋsẽ.

© 2023 Watch Tower Bible and Tract Society of Pennsylvania

S-38-MM 11/23