Kichʼpan pektzil a walak u talel etel a Dʼios, a kiʼ u yool. U kʼati ti kiʼooʼ u yool a familia. (1 Timoteo 1:11) Dʼios u xookil a tzʼoʼkolbʼeel. Tzʼoʼkolbʼeel jabʼix ti yan tuwich ley kʼabʼeet ti kaʼ talak a kiʼolal ich familia y walak u tzʼeek a jetzʼaʼanʼoolil a chʼisaj tzʼubʼ. A mak aj tzʼoksaj tzaj u tzʼoksik a ley a yan tiʼi a kaj, kaʼ u registarte u tzʼoʼkolbʼeel. Xoko Lucas 2:1, 4, 5.

Bʼikiʼ ti walak u yilik a tzʼoʼkolbʼeel a Dʼioso? U kʼati ti bʼebʼeel keʼenakooʼ tubʼajil a winik etel ixchʼup. A Jehovah u kʼati ti kaʼ kulak a ichamtzil y ätantzil tubʼajilooʼ ichil u jajil. (Hebreos 13:4) Motz tiʼi a pʼätbʼajil. (Malaquias 2:16) Walak u chaʼik kaʼ yanak a pʼätbʼajil y jedʼeʼek u kaʼ tzʼoʼkolbʼeel aj Tzʼokʼsaj wa juntuul tuyaamooʼ käjlaji etel u laakʼ mak. Xoko Mateo 19:3-6, 9.

A Jehovah u bʼetaj a winik etel ixchʼup tiʼi kaʼ u komon aantooʼ u bʼajil ichilooʼ u tzʼoʼkolbʼeel (Genesis 2:18) Ti yan winik u polil a familia, a ichamtzil leʼek tzaj u käxtik kʼuʼ a kʼabʼeet tiʼijooʼ u familia y tiʼi kaʼ u kaʼansooʼ tiʼi u pektzil a Dʼioso. A ichamtzil maʼ tzʼuʼutak etel u yakunaj ti u yätan y kaʼ u tzʼaaʼ taanil kʼuʼ u kʼati. Ichamtzil etel ätantzil tzaj yan u yakunaj etel u tzik tubʼajilooʼ. U men tulakal ichamtzil y ätantzil maʼ maʼloʼooʼ, saʼtesaj a kʼabʼeet tiʼi kaʼ yanak a kiʼolal ichilooʼ u tzʼoʼkolbʼeel. Xoko Efesios 4:31, 32; 5:22-25, 33; 1 Pedro 3:7.

Wa yan a probʼlema ichil a kuxtal, kaʼtuuleʼex tzaj a känik a yakuntik a bʼajileʼex. (1 Corintios 13:4, 5) A Bʼibʼle maʼ walak  u yadʼik wa kiʼ kaʼ u jäpʼä u bʼajil a mak chen u men yan u probʼlema a walak u talel ich tzʼoʼkolbʼeel. Xoko 1 Corintios 7:10-13.

A Jehovah u kʼati ti kiʼakeʼex a wool. Tiʼi yan a tukul a kiʼ jedʼeʼek a wilik u kiʼil a kuxtal. U kʼati kaʼ wileʼex u kiʼil a tukul y a bʼaʼal a manooʼ a tat etel a naʼ ichil. (Colossians 3:20) A Jehovah u kʼatilik kaʼ ilaʼ u kiʼil a kiʼolal tanil a bʼetik a bʼaʼal tiʼi a waj Bʼetajil y etel u Mejen. Xoko Ecclesiastes 11:9–12:1; Mateo 19:13-15; 21:15, 16.

Tzajeʼex a meyaj ti chich kaʼ käxtooʼ u janal, u yotoch, y u nokʼ a chʼisajeʼex. (1 Timoteo 5:8) Ti kaʼ u käxtooʼ a kiʼolal, tzajeʼex a kaʼansikooʼ kaʼ u yakuntej a Dʼioso y kaʼ uchukooʼ u kambʼal etel. (Deuteronomio 6:4-7) Leʼek a ejemploj tanil a yeʼik a yakunaj tiʼi a Dʼioso jedʼeʼek u tälik u päsäkʼal a chʼisaj. Leʼek kaʼ kaʼansooʼ a tzʼubʼ etel u pektzil a Bʼibʼle, a kaʼansaj abʼeʼe jedʼeʼek u yaantikooʼ kaʼ u bʼeteʼ a tukul a tojo. Xoko Efesios 6:4; 2 Timoteo 3:15.

Jedʼeʼek u bʼetik a kiʼi a tzʼubʼooʼ wa kaʼ a waantooʼ y tanil a wadʼik u kiʼil a bʼaʼal a tanooʼ u bʼetiki. U kʼatooʼlik a tojkinbʼil y tzeʼekbʼel. Leʼek kaʼ kaʼansooʼ ti bʼoobʼeʼe jedʼeʼekooʼ u känänbʼäl etel a modʼo jedʼeʼek u jokʼsik u kiʼilooʼ u yool. (Proverbios 22:15) Pero, a tzeʼeke maʼax kuchi bʼikʼin ich kʼasil wa xan ich tzʼiikil. Xoko Colosenses 3:21.

Yaabʼ a juʼum a jokʼsajaʼan u men a Testigojooʼ tiʼi Jehovah tiʼi kaʼ u yaantooʼ a tatzil y naʼtzil y ti a meen tzʼubʼ. A juʼumooʼ adʼaʼa ich Bʼibʼle jokʼaʼan u tukulil. Xoko Santiago 1:25.