• ঈশ্বর মশামক্না খনবনি। “ঐনা ঐগী নিংথৌ হাপ্লে . . . ঐনা জাতিশিংবু নহাক্কী ফংফম থোকপা ওইনা নঙোন্দা পীবিগনি, নহাক্কী শরূক ওইনবা মালেমগী অরোইবা ফাওবা পীবিগনি।”—থাগৎ ঈশৈ ২:৬, ৮.

• ইস্রায়েলগী নিংথৌ দেবিদকী য়ুম্লেপচারা অমা ওইগনি। “ঐখোয়দা অঙাং অমা পোক্লে, ঐখোয়দা মচা নিপা অমা পীবিরে, . . . দেবিদকী ফম্বানদা অমসুং মহাক্কী নিংথৌ লৈবাক্তা, মহাক্কী লৈঙাক শাসন অমসুং ঈঙথবা হেনগৎপগী অরোইবা লৈরোই, . . . লৈবাক মরা তপহন্নবা অমসুং লিংখৎনবা।”—যিশাইয়া ৯:৬, ৭.

• বেৎলেহেমদা পোক্কনি। “হে বেৎলেহেম . . . নঙোন্দগী . . . লৈঙাকপা ওইগদবা মী অমা ঐগীদমক থোক্লক্কনি, . . . মহাক মালেমগী অরোইবা ফাওবা চাউগনি।”—মীকা ৫:২, ৪.

• মীশিংনা উশিৎ থৌওইবিরোই অমসুং মখোয়না মহাকপু হাৎকনি। “মহাকপু উশিৎ থৌওইবিদ্রে, ঐখোয়না মহাকপু ঈকাই খুম্নবিদ্রে. . . . ঐখোয়গী লঙজবগীদমক মহাকপু শোকহনখি, ঐখোয়গী অয়োল অরানগীদমক মহাক পোপহনখি।”—যিশাইয়া ৫৩:৩, ৫.

• শিরবা মতুংদা অমুক হন্না হিঙ্গৎলক্কনি অমসুং মতিক মঙান চাউহনগনি। ‘নহাক্না ঐবু খম্নুং লৈবাক্তা লংথোকপিরোই, নহাক্কী অশেংবা মহাকপু নহাক্না অমাঙবা উহনবিরোই . . . নহাক্কী য়েৎ থংবা খূত্তা মতম পূম্নমক্কী নুঙাইবা লৈ।’—থাগৎ ঈশৈ ১৬:১০, ১১.

মীওইবগী পুৱারীদা খ্বাইদগী মতিক চাবা নিংথৌসি কনানো হায়রবদি যীশু খৃষ্ট খক্তনি। তশেংনা, স্বর্গদুত অমনসু যীশুগী মমা মেরীদা হায়রম্মী: “ঈশ্বরনা মঙোন্দা মপা দেবিদগী ফম্বান পীবিগনি . . . অদুগা মহাক্কী নিংথৌ লৈবাক অদু লোম্বা নাইরোই।”—লূক ১:৩১-৩৩.

যীশুনা পৃথিবীদা হিংলিঙৈ মতমদা নিংথৌ ওইরমদে। অদুবু মহাক্না স্বর্গদগী ঈশ্বরগী নিংথৌলৈবাক্কী নিংথৌ ওইদুনা মীওইবশিংগী মথক্তা পানগনি। যীশুবু খ্বাইদগী মতিক চাবা লৈঙাকপনি হায়বসি করম্না হায়বা য়ারিবনো? মহাক্না পৃথিবীদা লৈরিঙৈদা তৌরম্বশিং অদু খন্নরগা য়েংসি।

•   যীশুনা মীশিংগীদমক খনবীখি। মহাক্না নুপা, নুপী, অহল, নহা, লাইর- ইনাকখুনবা খায়দনা পুম্নমকপু মতেং পাংবীখি। (মাত্থি ৯:৩৬; মার্ক ১০:১৬) কুষ্টী থুংবা অমনা যীশুগী মনাক্তা লাক্তুনা “নহাক্না য়াবিরবদি, নহাক্না ঐবু শেংহনবিবা ঙম্মী” হায়না হায়জরকপা মতমদা, যীশুনা মহাকপু নুংশিবা পোক্লদুনা মহাক্কী অনাবদু ফহনবিরম্মী।—মার্ক ১:৪০-৪২.

• ঐখোয়না করম্না ঈশ্বরবু পেলহনবা য়াগনি হায়বদু যীশুনা তাকপীরম্মী। মহাক্না হায়রম্মী: “নখোয়না ঈশ্বর অমসুং শেনবু থৌগল তৌবা ঙম্লোই।” মীশিংনা ঐখোয়দা তৌহন্নীংবা পুম্নমক ঐখোয়নসু মখোয়দা তৌ হায়নসু মহাক্না খঙহল্লম্মী। অদুগীসু মথক্তা, ঐখোয়না তৌথোরকপা খক্তা নত্তনা থম্মোয়দা করি খল্লি নত্রগা ফাওই হায়বদুসু ঈশ্বরনা খঙবি হায়না মহাক্না হায়রম্মী। মরম অদুনা ঐখোয়না ঈশ্বরবু পেলহনগে হায়রবদি ঐখোয়গী থম্মোয়দা করি খল্লিবগে হায়বদু চেকশিনবা দরকার ওই। ( মাত্থি ৫:২৮; ৬:২৪; ৭:১২) অশেংবা নুংঙাইবা ফংনবগীদমক ঈশ্বরনা ঐখোয়দা করি তৌহন্নীংবগে হায়বদু খঙনবা হোৎনবা অমসুং মদু ঐখোয়না ইল্লগা চৎপা দরকার ওই হায়না যীশুনা তাকপীরম্মী।—লূক ১১:২৮.

• অতোপ্পশিংবু নুংশিবা হায়বসিগী অর্থ করিনো হায়বদু যীশুনা তাকপীরম্মী। যীশুগী ৱাহৈশিং অমসুং থবকশিংদা মতিক মগুণ য়াম্না লৈরম্মী অমসুং তারিবশিংগী থম্মোয় য়ৌখি। অদুনা, বাইবলনা অসুম্না হায়: “মীয়াম অদুনা মহাক্কী তম্বিবা অদুদা ইঙক ঙক্লম্মী। মরমদি . . . মতিক লৈবা মী অমগুম্না মহাক্না তম্বিরম্মী।” (মাত্থি ৭:২৮, ২৯) “য়েক্নবশিংবু নুংশিয়ু” হায়না মহাক্না মখোয়দা তাকপীরম্মী। যীশুনা মহাকপু হাৎপদা চেন্নবা মীওইশিংগীদমক্তসু ঈশ্বরদা অসুম্না হায়জখি: “ইপা, মখোয়বু কোকপিয়ু; মরমদি মখোয়না করি তৌরিবা মখোয়না খঙদে।”—মাত্থি ৫:৪৪; লূক ২৩:৩৪.

যীশুনা মীশিংবু নুংশি অমসুং মখোয়গী মতেং পাংই। তাইবংপান অসিগী লৈঙাকপা ওইবদা খ্বাইদগী মতিক চাবদি মহাক্নি। অদু ওইরবদি মহাক্না করম্বা মতমদগী শাসন তৌবা হৌবগে?