സങ്കീർത്തനം 86:1-17
ദാവീദിന്റെ ഒരു പ്രാർഥന.
86 യഹോവേ, ചെവി ചായിക്കേണമേ;* എനിക്ക്‌ ഉത്തരം തരേണമേ;ഞാൻ ക്ലേശിതനും ദരിദ്രനും അല്ലോ.+
2 എന്റെ ജീവനെ കാക്കേണമേ, ഞാൻ വിശ്വസ്‌തനല്ലോ.+
അങ്ങയിൽ ആശ്രയമർപ്പിക്കുന്ന ഈ ദാസനെ രക്ഷിക്കേണമേ;അങ്ങാണല്ലോ എന്റെ ദൈവം.+
3 യഹോവേ, എന്നോടു പ്രീതി കാട്ടേണമേ;+ദിവസം മുഴുവൻ ഞാൻ അങ്ങയെ വിളിച്ചപേക്ഷിക്കുന്നല്ലോ.+
4 അങ്ങയുടെ ഈ ദാസൻ സന്തോഷിക്കാൻ ഇടയാക്കേണമേ;യഹോവേ, അങ്ങയിലേക്കല്ലോ ഞാൻ നോക്കുന്നത്‌.
5 യഹോവേ, അങ്ങ്‌ നല്ലവനും+ ക്ഷമിക്കാൻ സന്നദ്ധനും അല്ലോ;+അങ്ങയെ വിളിച്ചപേക്ഷിക്കുന്നവരോടെല്ലാം സമൃദ്ധമായി അചഞ്ചലസ്‌നേഹം കാണിക്കുന്നവൻ.+
6 യഹോവേ, എന്റെ പ്രാർഥന കേൾക്കേണമേ;സഹായത്തിനായുള്ള എന്റെ യാചനകൾ ശ്രദ്ധിക്കേണമേ.+
7 കഷ്ടകാലത്ത്‌ ഞാൻ അങ്ങയെ വിളിച്ചപേക്ഷിക്കുന്നു;+അങ്ങ്‌ എനിക്ക്‌ ഉത്തരം തരുമെന്ന്‌ എനിക്ക്‌ അറിയാം.+
8 യഹോവേ, ദൈവങ്ങളിൽ അങ്ങയ്‌ക്കു തുല്യനായി മറ്റാരുമില്ല;+അങ്ങയുടേതിനോടു കിടപിടിക്കുന്ന പ്രവൃത്തികളുമില്ല.+
9 യഹോവേ, അങ്ങ്‌ ഉണ്ടാക്കിയ ജനതകളെല്ലാംതിരുമുമ്പിൽ വന്ന്‌ കുമ്പിടും;+അവർ അങ്ങയുടെ പേര്‌ മഹത്ത്വപ്പെടുത്തും.+
10 അങ്ങ്‌ മഹാനും അത്ഭുതകാര്യങ്ങൾ ചെയ്യുന്നവനും അല്ലോ;+അങ്ങാണു ദൈവം, അങ്ങ്‌ മാത്രം.+
11 യഹോവേ, അങ്ങയുടെ വഴികൾ എന്നെ പഠിപ്പിക്കേണമേ.+
ഞാൻ അങ്ങയുടെ സത്യത്തിൽ നടക്കും.+
അങ്ങയുടെ പേര്‌ ഭയപ്പെടാൻ എന്റെ ഹൃദയം ഏകാഗ്രമാക്കേണമേ.*+
12 എന്റെ ദൈവമായ യഹോവേ, ഞാൻ മുഴുഹൃദയാ അങ്ങയെ സ്‌തുതിക്കുന്നു;+തിരുനാമം ഞാൻ എന്നെന്നും മഹത്ത്വപ്പെടുത്തും.
13 എന്നോടുള്ള അങ്ങയുടെ അചഞ്ചലമായ സ്‌നേഹം എത്ര വലുതാണ്‌!ശവക്കുഴിയുടെ* ആഴങ്ങളിൽനിന്ന്‌ എന്റെ പ്രാണനെ അങ്ങ്‌ രക്ഷിച്ചിരിക്കുന്നു.+
14 ദൈവമേ, ധാർഷ്ട്യമുള്ളവർ എനിക്ക്‌ എതിരെ എഴുന്നേൽക്കുന്നു;+നിഷ്‌ഠുരന്മാരുടെ സംഘം എന്റെ ജീവനെടുക്കാൻ നോക്കുന്നു.അവർ അങ്ങയ്‌ക്ക്‌ ഒട്ടും വില കല്‌പിക്കുന്നില്ല.*+
15 എന്നാൽ യഹോവേ, അങ്ങ്‌ കരുണയും അനുകമ്പയും* ഉള്ള ദൈവം,പെട്ടെന്നു കോപിക്കാത്തവൻ, അചഞ്ചലസ്‌നേഹവും വിശ്വസ്‌തതയും നിറഞ്ഞവൻ.+
16 എന്നിലേക്കു തിരിഞ്ഞ്‌ എന്നോടു പ്രീതി കാട്ടേണമേ.+
അങ്ങയുടെ ഈ ദാസനു ശക്തി പകരേണമേ;+അങ്ങയുടെ ദാസിയുടെ ഈ മകനെ രക്ഷിക്കേണമേ.
17 അങ്ങയുടെ നന്മയുടെ ഒരു അടയാളം* കാണിച്ചുതരേണമേ;എന്നെ വെറുക്കുന്നവർ അതു കണ്ട്‌ നാണംകെടട്ടെ.
യഹോവേ, അങ്ങല്ലോ എന്റെ സഹായിയും ആശ്വാസകനും.
അടിക്കുറിപ്പുകള്‍
^ അഥവാ “കുനിഞ്ഞ്‌ ശ്രദ്ധിക്കേണമേ.”
^ അഥവാ “വിഭജിതമല്ലാത്ത ഒരു ഹൃദയം എനിക്കു തരേണമേ.”
^ അഥവാ “അങ്ങയെ തങ്ങളുടെ മുന്നിൽ വെച്ചിട്ടില്ല.”
^ അഥവാ “കൃപയും.”
^ അഥവാ “തെളിവ്‌.”