Уке. Библийыште возымо дене келшышын, кумалаш Юмылан гына кӱлеш да кумалтыш мутым Иисус Христос лӱмеш каласыман. Иисус шке тунемшыж-влаклан каласен: «А те тыге кумалза: Пылпомышто улшо мемнан Ачана! Тыйын святой лӱмет мокталтше» (Матфейын 6:9). Тудо нигунамат туныктен огыл, пуйто святой-влаклан, суксо-влаклан але иктаж-кӧлан эше кумалаш кӱлеш. Тудо Юмылан гына кумалаш туныктен.

 Тыгак Иисус шке почеш кайышыж-влаклан каласен: «Мый корно, чын да илыш улам. Мыйын гоч огыл гын, Ача деке иктат миен огеш керт» (Иоаннын 14:6). Иисус мемнан да Юмо коклаште посредниклан шогалтыме лийын. Тудлан гына Юмо тыгай рольым пуэн (Еврей-влаклан 7:25).

Юмылан да тыгак святой-влакланат кумалаш лиеш мо?

 Библийын ик кусарымаште Юмын лу кӱштымашыж гыч иктыже тыге шокта: «Мый Господь, тыйын Юмет, ушкалышан Юмо улам» (Исход 20:5). «Ушкалышан Юмо» манме шомакым кузе умылаш? Лопухинын «Толковая Библия» манме изданийыштыже тиде почеламутлан комментарийым возымо. Тушто возымо дене келшышын, чыла чонан-влак Юмылан гына кумалшаш улыт да Юмо тиде праважым тыршен арала. Юмо мемнан деч тудлан гына служитлымынам, лектеш, кумалмынамат вуча (Исайя 48:11).

 Ме святой-влаклан, суксо-влаклан але иктаж-кӧлан эше кумалына гын, Юмым шӱктарена. Кунам апостол Иоанн суксылан кумалнеже ыле, весыже тудым чарен да каласен: «Тыге ит ыште! Мый тый денет да Иисусын таныклымыжым кучышо иза-шольыч-влак дене пырля служитлыше улам. Юмылан вуетым саве» (Почмаш 19:10).