Библий «кызытсе курымын пытымыжым» але тиде тӱнян мучашыжым ончыктышо событий ден условий-влакым палдара (Матфейын 24:3). Библийыште тиде жапым «пытартыш кечыла» але «мучашын жапше» манме (2 Тимофейлан 3:1; Даниил 8:19). Пытартыш кечылаште але мучашын жапыштыже лийшаш событий-влак нерген Библийыште ончылгоч каласыме лийын. Теве нунын гыч южыжо:

•   Ончыч лийдыме сар-влак (Матфейын 24:7; Почмаш 6:4).

•   Шужымаш (Матфейын 24:7; Почмаш 6:5, 6).

•   Моткоч кугу мланде чытырналтмаш (Лукан 21:11).

•   Мор-влак (Лукан 21:11).

•   Закондымылык чыла вере шукемеш (Матфейын 24:12).

•   Еҥ-влак мландым пытарат (Почмаш 11:18).

•   Еҥ-влак пужлат, сандене «таум ыштыдыме... йӧратыдыме, келшыде илыше, еҥ ӱмбаке ойлышо, шкем кучен моштыдымо, торжа, порым ужмышудымо, предатель, вожылдымо, чот кугешныше» улыт (2 Тимофейлан 3:1—4).

•   Келшыде илымылан да ача-авам колыштдымылан кӧра кугу еш нелылык лиеда (2 Тимофейлан 3:2, 3).

•   Шукыштын Юмым «йӧратымашышт йӱкша» (Матфейын 24:12).

•   Еҥ-влак «Юмым пагалышыла койыт» (2 Тимофейлан 3:5).

•   Библийысе ончылгоч каласымаш-влакым умылымаш, пытартыш кече-влакат нерген, рашемдалтеш (Даниил 12:4).

•   Кугыжаныш нерген поро увер тӱня мучко каласкалалтеш (Матфейын 24:14).

•   Мучашын вашке толмыжым пеҥгыдемдыше доказательстве-влак улыт гынат, еҥ-влак тӱткышыштым огыт ойыро да мыскылен воштылыт (Матфейын 24:37—39; 2 Петрын 3:3, 4).

•   Ончылгоч каласымаш-влак гыч южышт але нунын гыч шукыжо гына огыл, а чыла нине ончылгоч каласымаш-влак ик жапыштак шукталтыт (Матфейын 24:33).

Ме «пытартыш кечылаште» илена мо?

 Илена. Тӱняште улшо условий-влак, библийысе хронологий семынак, пытартыш кече-влакын 1914 ийыште тӱҥалмыштым ончыктат. Тиде жапыште каваште Юмын Кугыжаныш шогалтыме лийын. Тунам Сатана ден демонжо-влак кава гыч мландыш сӱмырал шуымо лийыныт (Почмаш 12:7—12). Сатанан калыкым виктарымыжлан кӧра еҥ-влак уда шонымашан да осал пашам ыштыше улыт. Сандене пытартыш кече-влакым «неле жап» манме (2 Тимофейлан 3:1).