Juon iaan Ri Kõnnaan ro an Jeova ilo Canada etan Don, ear kate e bwe en kõnono ippãn aolep armej ro rej jokwe itõrerein ial̦ ko. Don ear ba: “Juon em̦m̦aan ij kab loe etan Peter, ear lukkuun ettoonon im ear jokwe ilo ial̦ ko ikõtaan m̦õko kõnke ejjel̦o̦k jikin an jokwe. Ekar juon eo em̦m̦al̦karo im ejel̦ã kilen kõm̦m̦an bwe armej ren jab kepaake. Ekkã an kõjekdo̦o̦n jipañ ko jãn armej.” Meñe ãindein, ak ium̦win 14 iiõ, Don ear kate e ñan kijenmej wõt im kwal̦o̦k jouj ñan em̦m̦aan in ejjel̦o̦k jikin an jokwe.

Juon raan Peter ear kajjitõk ippãn Don: “Etke kwõj el̦tok ñan ña? Armej rejjab el̦tok ñan ña. Etke kwõj kea kõn ña?” Ilo jouj, Don ear kwal̦o̦k jilu eoon ñan kajjioñ tõpar bũruon Peter. Kein kajuon, ear kajjitõk ippãn Peter el̦aññe ejel̦ã bwe ewõr etan Anij, im ear kajjitõk bwe en riiti Sam 83:18. Kein karuo, bwe en kaalikkar unin an kea ear ba bwe Peter en riiti Rom 10:13, 14, me ej ba: “ro otemjej rej kũr etan Irooj renaaj mour.” Im kein kajilu, Don ear riiti Matu 9:36, im ãlikin ear kajjitõk ippãn Peter bwe en bar make riiti. Eoon in ej ba: “A ke Ej lo jar ko, Ej tũriam̦okake er, bwe rej parõk, im jeplõklõk ãinwõt jiip ko ejjel̦o̦k aer jabõt.” Ãlikin an riiti eoon in, ear to̦o̦r dãnnin kõmjaal̦al̦ im ear kajjitõk ippãn Don im ba: “Ij ke bar m̦õttan jiip rein?”

Tokãlik Piter ear jino kõm̦m̦an oktak. Ear tutu, kõkaduukl̦o̦k kwõdeããk ko an, im ear kõn̦ak nuknuk ko rem̦m̦anl̦o̦k me Don ear lil̦o̦k ñane. Piter ear wõnm̦aanl̦o̦k wõt im karreoik e.

Ewõr juon an kar Peter bok me ear je aolep men ko ej kõm̦m̦ani, l̦õmn̦ak kaki, im eñjake ko an n̦a ilowaan. Ilo peij ko jinoin, men ko ear jeje kaki rar nana im kabũrom̦õjm̦õj, ak men ko ear jei tokãlik rar lukkuun oktak. Juon iaan men ko ear je ej ba: “Rainin, iar katak kõn etan Anij. Kiiõ ñe ij jar imaroñ jar ñan Jeova. Elukkuun em̦m̦an bwe ijel̦ã kõn ãt in etan. Don ej ba imaroñ epaake Jeova ãinwõt juon m̦õtta, im ej juon eo  ewõr an iien ñan roñjake ña aolep iien, jekdo̦o̦n ñããt kab jekdo̦o̦n ta.”

Naan ko ãliktata an Peter kar ñan ro jein im jatin, ear je im ba:

“Ejjab lukkuun em̦m̦an aõ mour rainin. Bõlen ilukkuun rũttol̦o̦k kiiõ. Ak jekdo̦o̦n ñe raan eo aõ ãliktata in, ijel̦ã bwe inaaj bar loe l̦een̦ m̦õtta [Don] ilo pedetaij. Ñe kwõj riiti naan kein, mel̦el̦ein bwe em̦õj aõ jako. Ak ñe kwõnaaj loe juon em̦m̦aan ilo iien ilomej en̦ aõ im ejjel̦o̦k ejel̦ã kajjien, kõnnaan ippãn, im jouj im riiti bok bũl̦u in edik [ej jitõñl̦o̦k ñan bok in katak eo etan The Truth That Leads to Eternal Life me kar lel̦o̦k ñane elõñ iiõ ko m̦oktal̦o̦k]. * Bok in ej kwal̦o̦k bwe inaaj bar loe l̦ein m̦õtta ilo pedetaij. El̦ap aõ tõmak men in kõn aolepen bũruõ. Eo jeimi im jatũmi, Peter.”

Ãlikin iien kallib eo, ledik eo jein Peter etan Ummi ej ba: “Bõlen kar ruo iiõ ko remootl̦o̦k ke Peter ear kõnnaan ippa. Eto im to ke ij kab bar loe an m̦õn̦õn̦õ, joñan ej ettõñdikdik.” Ummi ear ba ñan Don: “Inaaj riiti bok in kõnke ñe ewõr jabdewõt men ear tõpar bũruon l̦eo jatũ mel̦el̦ein bwe elukkuun m̦ool.” Ummi ear bar errã in bwebwenato kõn bok eo ekããl, Ta eo Baibõl̦ Ej Lukkuun Katakin Kõj? ippãn juon iaan Ri Kõnnaan ro an Jeova.

Kõj bareinwõt jen jab kalimjek wõt paotokin juon armej, ak jen kwal̦o̦k yokwe eo em̦ool, im meanwõd ñan aolep armej. (1 Ti. 2:3, 4) El̦aññe jenaaj kõm̦m̦ane men in, jemaroñ kõm̦akũt armej ro ãinwõt Peter me remaroñ jab em̦m̦an ñan mejãn armej akõ em̦m̦an bũrueer. Jemaroñ lõke bwe Anij eo me ej ‘lale bũruon armej,’ enaaj kaddek m̦ool eo ilo bũruon ro renaaj mour indeeo.​—1 Sa. 16:7; Jon 6:44, UBS.