RENEÉ, juon kõrã me 30 jim̦a an iiõ ear dik im rũttol̦o̦k ilo juon baam̦le me el̦ap aer niknik im rej uwaan Ri Kõnnaan ro an Jeova ilo Aujtõrõlia. Kõrã in ej ba: “Elõñ alen ammim em̦m̦akũt ñan jipañ ilo jikin ko me el̦apl̦o̦k aer aikuj rukwal̦o̦k naan ie. Ke kõmar em̦m̦akũtl̦o̦k ñan jikin kein, jinõ im jema rar kõm̦m̦an bwe iien kein ren kãitoktoklimo! Iar kõn̦aan kõm̦m̦ane ejja men in wõt ñan ajri rã ruo nejũ.”

 Shane, l̦eo ippãn Reneé me 30 jim̦a an iiõ, ear bar kõn̦aan kõm̦m̦ane men in. Ej ba: “Ãlikin an kar l̦otak ajri eo nejũm̦ro kein karuo, kõm̦ro ear riiti juon Naan in Keeañ im ej kwal̦o̦k kõn an kar juon baam̦le me rej Ri Kõnnaan ro an Jeova jerak kõn io̦o̦t eo waaer ñan turõk turilikin Pacific bwe ren kwal̦o̦k naan ilo ãne ko ilo Tonga. * (Lale kõmel̦el̦e eo itulal̦.) Bwebwenato in ear kõm̦akũt kõm̦ro ñan jejel̦o̦k ñan ra ko ilo Aujtõrõlia im New Zealand ñan lale ia eo el̦apl̦o̦k aer aikuj rukwal̦o̦k naan ie. * (Lale kõmel̦el̦e eo itulal̦.) Rar jeje tok im ba bwe kõm̦ro maroñ etal im jipañ ilo Tonga, ejja ãne eo wõt me kõm̦ro ear riit kake!”

Etan ajri ro nejin Shane im Reneé ej Jacob im Skye. Ãlikin aereañ kar mour ilo Tonga ium̦win enañin 1 iiõ, ear wal̦o̦k jet poktak ko ibwiljin armej ro ilo ijin im rar aikuj ro̦o̦l ñan Aujtõrõlia. Bõtab, rar peek wõt ippãer make ke mejãnkajjik eo aer ej ñan kal̦apl̦o̦k ijo kun̦aaer ilo kwal̦o̦k naan. Ilo 2011 eo, rar em̦m̦akũtl̦o̦k ñan Norfolk Island, juon ãne jidikdik me ej pãd enañin 900 m̦ail̦ iturearin Aujtõrõlia. Ta eo ear wal̦o̦k ke rar em̦m̦akũttok ñan ijin? Kiiõ, Jacob, eo im 14 an iiõ ej ba: “Jeova ear jab baj lale im kõjparok wõt kõm ak ear bar kõm̦m̦an bwe jerbalin kwal̦o̦k naan en limo!”

Ãinwõt Shane, Reneé, im ajri ro nejierro, elõñ baam̦le ko an Ri Kõnnaan ro an Jeova rej m̦õn̦õn̦õ in em̦m̦akũtl̦o̦k im jipañ ilo jikin ko el̦ap aikuj rukwal̦o̦k naan ie. Ta eo ear jipañ rein bwe ren em̦m̦akũt?

Burnett im Simone, ruo rippãlele me 30 jim̦a aer iiõ, kobal̦o̦k ippãn l̦adik ro ruo nejierro, Eston im Calep, me kiiõ 12 im 9 aer iiõ, rar em̦m̦akũtl̦o̦k ñan juon bukwõn etan Burketown. Bukwõn in epãd ilo Queensland, ilo Aujtõrõlia, im ej juon jikin elukkuun ettol̦o̦k im jeja armej rej etal ñane. Burnett ej ba: “Ri Kõnnaan ro an Jeova rej kwal̦o̦k ilo ijin l̦o̦kun 3 ak 4 iiõ. Elõñ armej ro relukkuun kõn̦aan jel̦ã kõn ennaan eo em̦m̦an. Kõmar itok kõnke kõm kõn̦aan keini am katak Baibõl̦ ippãer.”

Mark im Karen, me kiiõ 50 jim̦a aer iiõ, rar jipañ ilo jet eklejia ko me rej pãd iturin Sydney, ilo Aujtõrõlia. Erro im ajri ro jilu nejier etaer in Jessica, Jim, im Jack, rar jipañ ilo ijekein m̦okta jãn aer em̦m̦akũtl̦o̦k ñan Nhulunbuy, juon jikin ettol̦o̦k me ej pãd ilo Northern Territory. Mark ej ba: “El̦ap aõ yokwe armej, eñin unin ikõn̦aan pãd ilo jikin ko me el̦ap aer aikuj jipañ ilo eklejia im ilo jerbalin kwal̦o̦k naan.” Bõtab, ilo kar jinoin Karen ear jab kõn̦aan em̦m̦akũt. Kõrã in ej ba: “Ãlikin an kar Mark im ro jet rõjañ eõ, iar m̦õn̦õn̦õ in etal bwe in lale em̦m̦an ke. Kiiõ el̦ap aõ m̦õn̦õn̦õ bwe iar kõm̦m̦ane men in!”

Ilo 2011 eo, Benjamin im Carolyn ekoba ledik ro ruo nejierro me rej kab jino jikuul̦, Jade im Bria, rar em̦m̦akũt jãn Queensland ilo Aujtõrõlia ñan Timor-Leste, juon jikin ej pãd ilo ãne eo etan Timor ilo Indonesia. Ben ej ba: “M̦okta, kõm̦ro Carolyn ear jipejel̦ bainier ilo Timor-Leste. Kwal̦o̦k naan ilo jikin in el̦ap an kar em̦m̦an, im el̦ap an kar ro jeid im jatid jipañ kõm̦ro. El̦ap am̦ro kar bũrom̦õj ke kõm̦ro ear etal jãn er. Bõtab, kõm̦ro ear peek ippemro bwe kõm̦ro naaj bar ro̦o̦ltok. Ke ear wõr nejũm̦ro ajri, ear jab oktak l̦õmn̦ak eo am̦ro ñan bar ro̦o̦ltok ñan ijin bõtab ear rum̦wijl̦o̦k.” Carolyn ej ba: “Kõm̦ro kõn̦aan bwe ajri rã nejũm̦ro ren dik im rũttol̦o̦k ilo juon jikin me ewõr mijinede, ro rej jerbal ilo Betel̦, im jipejel̦ bainier. Kõm̦ro kõn̦aan bwe ren m̦õn̦õn̦õ ilo aer karejar ñan Jeova.”

Jijej ear jiroñl̦o̦k rũkal̦oor ro an im ba: “Wõn iaami, ekõn̦aan kalõk juon im̦õn bar, ejjab jijet m̦okta, im pepe kõn on̦ãn?” (Luk 14:28) Ãindeinl̦o̦k wõt, ñe baam̦le ko rej l̦õmn̦ak in em̦m̦akũtl̦o̦k ñan juon jikin, ewõr men ko rej aikuj in m̦okta l̦õmn̦ak kaki. Ta kein?

JEM̦JERÃ EO AER IPPÃN JEOVA: Ben ej ba: “Kõm kõn̦aan jipañ ro jet im jab kõm̦m̦an bwe ren eddodo kõn kõm. Kõn men in, m̦okta jãn am kar em̦m̦akũt, kõmar m̦okta kõm̦m̦an bwe en epaakl̦o̦k jem̦jerã eo ammim ippãn Jeova. Bareinwõt, kõmar kal̦apl̦o̦k ijo kun̦aam ilo jerbalin kwal̦o̦k naan im ilo m̦akũtkũt ko jet an eklejia.”

Jacob, eo me jaar kwal̦o̦k kake m̦oktal̦o̦k, ej ba: “M̦okta jãn am kar em̦m̦akũttok ñan Norfolk Island, kõmar riiti elõñ bwebwenato ko ilo Naan in Keeañ im Awake! ko kõn baam̦le ko me rar em̦m̦akũt ñan jipañ ilo jikin  ko me el̦ap aikuj ie. Kõmar bwebwenato kake apañ ko rar iiooni im wãween an kar Jeova jipañ er.” Ledik eo jatin me 11 an iiõ, Skye, ej ba: “Elukkuun bwijin kõttan aõ jar ippa make im ippãn Mama im Baba!”

EÑJAKE: Reneé ej ba: “Kõnke kõmar jokwe iturin baam̦le ko ammim im ro m̦õttam ilo juon jikin em̦m̦an ippa, enãj kar pidodo ammim pãdwõt ijo. Bõtab, ijello̦kun aõ l̦õmn̦ak wõt kõn men kein me kõmar em̦m̦akũt jãni, iar l̦õmn̦ak kõn tokjãn ko renaaj wal̦o̦k ñan baam̦le e aõ ilo ammim em̦m̦akũt ñan bar juon jikin.”

M̦ANIT: Elõñ baam̦le ko rej kõm̦m̦an etale ko bwe ren pojak ñan aer em̦m̦akũtl̦o̦k ñan bar juon jikin. Mark ej ba: “M̦okta jãn am kar itok ñan Nhulunbuy, kõmar riiti elõñ men ko me rej kwal̦o̦k kõn jikin in. Ro jeid im jatid ilo jikin in rar jilkintok ñan kõm kaape in nuujpeba ko. Men in ear jipañ kõm bwe kõmin jel̦ã kõn armej ro im m̦anit eo ilo jikin in.”

Shane, me ear em̦m̦akũt ñan Norfolk Island, ej ba: “El̦aptata aõ kar kate eõ ñan kwal̦o̦k wãween ko juon Kũrjin ej aikuj kwal̦o̦ki. Ijel̦ã bwe ñe inaaj juon eo ejouj, eineem̦m̦an, em̦ool an jerbal im eniknik, enaaj pidodo aõ mour ilo jabdewõt jikin ipel̦aakin lal̦ in.”

Ro rar lo tõprak ilo aer kar em̦m̦akũt ñan jikin ko raikuj jipañ ie rej kwal̦o̦k joñan an aorõk ñan jel̦ã kilen ukoktak im aenõm̦m̦an wõt ñe jej iiooni apañ ko jejjab kõtmãne kaki. Jen lale jet iaan men kein:

Reneé ej ba: “Elõñ men ko iar katak kilen kõm̦m̦ani. Ñan waanjoñak, ñe ej nana lo̦jet in Norfolk Island, tim̦a ko rejjab maroñ ebbõktok m̦õñã. Men in ej kõm̦m̦an bwe en lukkuun iiet m̦õñã ilo m̦õn wia ko im l̦ap on̦ãer. Kõn men in, iar ekkatak kilen kõjparok ak kakkõnkõni men ko ewõr ippemmim.” L̦eo ippãn, etan Shane, ej ba: “Kõm̦ro ear bar kõjparok bajet eo am̦ro ekkar ñan kajjojo wiik.”

L̦adik eo nejier, etan Jacob ej kwal̦o̦k kõn bar juon apañ. Ej ba: “Ewõr wõt 7 uwaan eklejia eo ammim im aolepeer el̦ap aer rũtto jãn ña. Ejjel̦o̦k en̦ me ear dettan wõt ña me imaroñ m̦õttãiki! Bõtab, ilo aõ jerbal ippãer ilo kwal̦o̦k naan, kõmar jino epaake doon.”

Jim, me kiiõ 21 an iiõ ej bar iioone ejja wãween in wõt. Ej ba: “Eklejia eo epaaketata Nhulunbuy elõñl̦o̦k jãn 450 m̦ail̦ ettol̦o̦kin. Kõn men in, ñe kõmij etal ñan  kweilo̦k ko rel̦l̦ap, kõmij lukkuun kortokjãn iien kein. Kõmij kate kõm ñan m̦õkajl̦o̦k bwe kõmin bwebwenato ippãn rũttõmak ro jeim̦ im jatim. Iien kein rej jet iaan iien ko rem̦m̦antata ilo kajjojo iiõ!”

Baibõl̦ ej ba: “Kajeraam̦m̦an jãn Jeova, ej n̦am̦weien armej.” (Jabõn Kõnnaan 10:22) Ipel̦aakin lal̦ in, elõñ ro me rej em̦m̦akũt im jipañ ilo jikin ko raikuj jipañ ie rej lukkuun kam̦oole naan kein.

Mark ej ba: “Am kar em̦m̦akũt ear l̦ap an jipañ ajri ro nejũm̦ro, eñin ej men eo el̦aptata am̦ro jeraam̦m̦an kake. Ajri ro rerũtto el̦ap aer lõke Jeova bwe enaaj kabwe aikuj ko an ro rej pukot m̦oktata Aelõñ eo an. Lõke rot in el̦ap an aorõk im jejuwaan.”

Shane ej ba: “Kiiõ, el̦apl̦o̦k aõ epaakel̦o̦k lio ippa im ajri ro nejũ. Ñe ij roñ aer kwal̦o̦k kõn wãween an Jeova jipañ er, men in el̦ap an kam̦õn̦õn̦õik bũruõ.” L̦adik eo nejin, Jacob, ej errã ilo an ba: “El̦ap aõ m̦õn̦õn̦õ. Elukkuun em̦m̦an bwe kõmar itok ñan ijin!”