Elõñ armej rej kate er bwe baam̦le ko aer ren m̦õn̦õn̦õ wõt. Rippãlele ro rej bar kate er bwe pãd eo aer en lukkuun em̦m̦an. Bõtab, ejjab pidodo ñan lo m̦õn̦õn̦õ kõnke jet iien emaroñ jidimkij an wal̦o̦k jorrããn ak men ko rekabũrom̦õjm̦õj ñan kõj. (Ekklisiastis 9:11, UBS) Anij emaroñ jipañ kõj ilo iien ko reppen. El̦aññe kwõnaaj l̦oore naan in kakapilõk ko jãn Baibõl̦ ilo katak in, men in emaroñ jipañ eok im baam̦le n̦e am̦ ñan kijenmej wõt meñe ilo iien ko reppen.

EKKAR ÑAN BAIBÕL̦: “Likũt ami inepata otemjej n̦a Ippãn, bwe kwõaorõk Ippãn.” (1 Piter 5:7) Keememej bwe ejjab Anij eo ej kõm̦m̦an bwe kwõn iioon jorrããn ak apañ. (Jemes 1:13, UBS) El̦aññe kwõnaaj epaake Anij, enaaj l̦apl̦o̦k an jipañ eok. (Aiseia 41:10) Baibõl̦ ej ba bwe kwõn ‘kwal̦o̦k bũruom̦’ ñan Anij.​—Sam 62:8.

Bareinwõt, ñe kwõnaaj riit im katak Baibõl̦ aolep raan, men in enaaj jipañ eok bwe kwõn aenõm̦m̦an. Ñe kwõnaaj kõm̦m̦ane men kein, kwõnaaj kile wãween an Jeova “kaenõm̦m̦an armej ro doon.” (Aiseia 49:13, UBS; Rom 15:4, UBS) Anij ej kallim̦ur bwe enaaj lewaj “aenõm̦m̦an . . . eo ej el̦l̦ã jãn jel̦ã otemjej.”—Pilippai 4:6, 7, 13.

MEN KO KWÕMAROÑ KÕM̦M̦ANI:

• Jar ñan Jeova im kajjitõk bwe en jipañ eok bwe kwõn jab inepata im wiwijet ak kwõn ineem̦m̦an wõt im jel̦ã ta eo kwõn kõm̦m̦ane

• Kajjioñ l̦õmn̦ak kõn ta ko kwõmaroñ kõm̦m̦ani im kate eok ñan kããlõt pepe eo em̦m̦antata

EKKAR ÑAN BAIBÕL̦: “Bũruon rũjel̦ãl̦o̦kjen̦, ej jibadek jel̦ã; im lo̦jilñin rũmmãlõtlõt, ej kappukot jel̦ã.” (Jabõn Kõnnaan 18:15) Kate eok ñan mel̦el̦e im jel̦ã kõn aikuj ko an eo pãleem̦ im ajri ro nejũm̦. Bwebwenato ippãer im lukkuun roñjake ñe rej kwal̦o̦k bũrueer ñan kwe.​—Jabõn Kõnnaan 20:5, UBS.

Ta el̦aññe eo pãleem̦ ak juon iaan ajri ro nejũm̦ ej mej? Eokwe, jab ãliklik in kwal̦o̦k am̦ bũrom̦õj. Keememej bwe Jijej ‘ear jañ.’ (Jon 11:35; Ekklisiastis 3:4) Ej aikuj bar bwe iien am̦ kiki im kakkije. (Mark 6:31) Men in enaaj jipañ eok ñan jel̦ã kijenmej wõt ñe kwõj iioon juon apañ.

MEN KO KWÕMAROÑ KÕM̦M̦ANI:

• Meñe ejjañin wal̦o̦k juon men ekabũrom̦õjm̦õj ñan baam̦le n̦e am̦, ak em̦m̦an ñe ej ikkutkut am̦ kõm̦m̦an iien ñan baj bwebwenato ippãer. Ilo wãween in, el̦aññe ej wal̦o̦k juon apañ ak jorrããn, enaaj pidodo aer kepaake eok

• Kwõmaroñ bar bwebwenato ippãn ro jet me em̦õj aer iioone ejja wãween ko wõt kwõj iiooni

EKKAR ÑAN BAIBÕL̦: “Juon jeran ej yokwe iien otemjej; im juon jein im jatin, ear l̦otak bwe en rijjipañ ilo iien jorrããn.” (Jabõn Kõnnaan 17:17) Ro m̦õttam̦ remaroñ kõn̦aan jipañ eok ak rejaje ta ko ren kõm̦m̦ani. Kõn men in, kwõn jab ãliklik in kwal̦o̦k ta ko kwõj aikuji aer jipañ eok kaki. (Jabõn Kõnnaan 12:25, UBS) Bareinwõt, ñe kwõj aikuj jipañ kõn naan in kakapilõk ko ilo Baibõl̦, kwõmaroñ kepaake ro me el̦ap aer mel̦el̦e kõn Baibõl̦. Men ko renaaj kwal̦o̦ki waj ñan kwe jãn Baibõl̦ renaaj jipañ eok.​—Jemes 5:14.

Kwõn niknik ilo am̦ kobal̦o̦k ippãn ro me em̦ool aer tõmak ilo Anij im rej lõke kallim̦ur ko an kõnke armej rein renaaj jipañ eok. Bar juon men me emaroñ jipañ eok ej ñe kwõj jipañ im kaenõm̦m̦an ro jet. Kwõn kwal̦o̦k ñan er kõn Jeova im kwal̦o̦k kõn kallim̦ur ko an. Kwõn poub wõt ilo am̦ jipañ armej ro me rej pãd ilo aikuj. Jab kattol̦o̦k eok jãn ro me rej yokwe eok im el̦ap aer kaorõk eok.​—Jabõn Kõnnaan 18:1, UBS; 1 Korint 15:58, UBS.

MEN KO KWÕMAROÑ KÕM̦M̦ANI:

• Bwebwenato ippãn juon eo kwepaake im kõtl̦o̦k bwe en jipañ eok

• Kwõn kwal̦o̦k ta ko kwõj aikuji aer jipañ eok kaki