KATAK 12
Ta ko Kõmij Kõm̦m̦ani bwe En Kon̦ Amim Kwal̦o̦k Naan kõn Aelõñ eo an Anij?
Jipein
Belarus
Hong Kong
Peru
M̦okta jãn an kar Jesus mej, ear ba: “Im naan em̦m̦an in kõn Aelõñ eo naaj kwal̦o̦k kake ijoko otemjej ilal̦ in, ãinwõt juon menin kam̦ool ñan armej otemjej.” (Matu 24:14, UBS) Ak ewi wãween an naaj rũkal̦oor ro an Jesus kadedel̦o̦k jerbal in ipel̦aakin lal̦ in? Eokwe, ilo aer l̦oore joñak eo an Jesus ke ear pãd ilo lal̦.—Luk 8:1.
Kõmij kajjioñ jibadekl̦o̦k armej ro ilo im̦oko im̦wier. Jesus ear katakin rũkal̦oor ro an bwe ren kwal̦o̦k kõn ennaan eo em̦m̦an jãn em̦ ñan em̦. (Matu 10:11-13; Jerbal 5:42, UBS; 20:20) Rũkal̦oor rein ilo iien ko etto rar kwal̦o̦k naan ilo bukwõn ko me em̦õj aer jitõñ er bwe ren kwal̦o̦k naan ie. (Matu 10:5, 6) Rainin, jerbal in kwal̦o̦k naan eo am elukkuun laajrak im kon̦. Em̦õj lel̦o̦k ñan kajjojo eklejia bukwõn ak jikin ko me remaroñ kwal̦o̦k naan ie. Men in ej kamaroñ kõm bwe en let amim kwal̦o̦k naan, ãinwõt an kar Jesus kakien kõm.—Jerbal 10:42.
Kõmij kate kõm ñan kwal̦o̦k naan jabdewõt jikin ko me ewõr armej ie. Jesus ear bar likũt joñak eo em̦m̦an ilo an kar kwal̦o̦k naan ñan armej ro ilobwilij. Ñan waanjoñak, ear kwal̦o̦k naan ñan armej ro ibarijet im bareinwõt iturin aebõj lal̦ ko. (Mark 4:1; Jon 4:5-15) Kõmij bareinwõt kate kõm im kwal̦o̦k naan jabdewõt jikin ko me ewõr armej ie. Kõmij kwal̦o̦k naan itõrerein ial̦ ko, jikin peejnej ko, jikin piknik ko, ak ilo telephone. El̦aññe ekkar, kõmij bar kwal̦o̦k naan ñan ro ri turum̦, ro kõmij jerbal ippãer, ro kõmij jikuul̦ ippãer, im ro nukũm. Ilo wãween kein aolep, kõmij maroñ tõpar elõñ milien armej ro ipel̦aakin lal̦ in im kwal̦o̦k ñan er kõn ‘ennaan eo em̦m̦an bwe en lo̦mo̦o̦ren er.’—Sam 96:2, UBS.
Ewõr ke juon eo kwojel̦ã kajjien im kokõn̦aan kwal̦o̦k ñan e kõn ennaan eo em̦m̦an kõn Aelõñ in Anij im jeraam̦m̦an ko me remaroñ wal̦o̦k ilju im jekl̦aj? Eokwe, jouj im jab dãpij ennaan in em̦m̦an jãn er. Jouj im kate eok ñan bwebwenato ippãer kõn men kein ilo iien eo em̦õkajtata!
-
Ta ‘ennaan eo em̦m̦an’ me rũkal̦oor ro an Jesus rej aikuj keeañ kake?
-
Ewi wãween Ri Kõnnaan ro an Jeova rej l̦oore joñak eo an Jesus ñe rej kwal̦o̦k naan?
