“Anij . . . enaaj kõm̦õrãik jãn mejãer dãnnin kõmjaal̦al̦ otemjej im enaaj ejjel̦o̦k bar mej, bũrom̦õj, lim̦õ im eñtaan. Men ko m̦okta rejako.”—Revelesõn 21:3, 4, Jeje ko Rekkwõjarjar—Ukokin Lal̦ eo Ekããl (Matu-Revelesõn)

Kwõnaaj kõm̦m̦ani jerbal ko ewõr tokjãer im rej kam̦õn̦õn̦õik eok.​—Aiseia 65:21-23.

Enaaj jako aolep nañinmej im eñtaan.​—Aiseia 25:8, United Bible Societies; 33:24.

Kwõnaaj m̦õn̦õn̦õ im mour ñan indeeo ippãn baam̦le eo am̦ im ro m̦õttam̦.​—Sam 37:11, 29.

Aet, jen lale ruo iaan un ko:

• Ewõr an Anij maroñ ñan kajejjete kallim̦ur in. Baibõl̦ eo ej ba bwe Jeova Anij ej make wõt eo me “Ekajoor Bõtata,” kõnke ejjel̦o̦k joñan kajoor eo an. (Revelesõn 15:3) Kõn men in ewõr an maroñ ñan kajejjete kallim̦ur eo an ñan kõm̦m̦an bwe mour ilo lal̦ in en em̦m̦anl̦o̦k. Ekkar ñan Baibõl̦, “Anij emaroñe men otemjej.”​—Matu 19:26.

• Anij ekõn̦aan kajejjete kallim̦ur in. Ñan waanjoñak, Jeova elukkuun kõn̦aan kõm̦m̦an bwe armej ro rar mej, ren bar mour.​—Job 14:14, 15.

  Baibõl̦ ej bar kwal̦o̦k bwe Jesus, eo ej Nejin Anij, ekar kãjmour armej ro jãn aer nañinmej. Etke ear kõm̦m̦ane men in? Kõnke ear kõn̦aan. (Mark 1:40, 41) Ear jejjet wãween an kar Jesus kwal̦o̦k kadkad ko kadkadin Jemãn ilo an kar kõn̦aan jipañ ro rar pãd ilo aikuj.​—Jon 14:9.

  Innem, jej tõmak bwe Jeova im Jesus jim̦or rekõn̦aan jipañ kõj bwe jen m̦õn̦õn̦õ ilju im jekl̦aj!—Sam 72:12-14, UBS; 145:16; 2 Piter 3:9.