Luk 22:1-71
-
An bũrij ro pukot kilen ñan m̦an Jesus (1-6)
-
Aer kõppojak ñan Kwõjkwõjin Kijoone eo ãliktata (7-13)
-
Jinoin aer kõm̦m̦ane Kõjota eo an Irooj (14-20)
-
“Eo enaaj ketake eõ epãd ijin ippa ilo tebõl̦ in” (21-23)
-
An l̦ap aer akwããl kõn wõn eo eutiejtata iaaer (24-27)
-
An Jesus kõm̦m̦ane juon bujen kõn juon aelõñ (28-30)
-
Kar kwal̦o̦k kõn an naaj Piter kaarmejjete Jesus (31-34)
-
Aer aikuj in pojak; im jaje ko ruo (35-38)
-
Jar eo an Jesus ioon tol̦ Olive (39-46)
-
Aer jibwe im kalbuuji Jesus (47-53)
-
Piter ej kaarmejjete Jesus (54-62)
-
Aer kõm̦m̦an kõjak kõn Jesus (63-65)
-
Aer ekajete im̦aan ro rej uwaan Im̦õn Ekajet eo El̦ap an ri-Ju ro (66-71)
22 Kiiõ ear epaaktok iien Kwõjkwõjin Bũreet Ejjab Kauwe,* ãt eo juon ej Kwõjkwõjin Kijoone.
2 Bũrij ro reutiej im skraib ro rar mijake armej ro, kõn men in rar pukot kilen aer m̦ane Jesus ilo juon wãween eban kalluuk er.
3 Innem Setan ear kareel bũruon Judas Iskariõt, juon iaan rijjilõk ro 12,
4 im ear ilo̦k im kõnnaan ippãn bũrij ro reutiej im ro rej bõk eddon tampel̦ eo kõn wãween an naaj ketake ñan er.
5 Rar lukkuun m̦õn̦õn̦õ im rar errã bwe renaaj lel̦o̦k jããn jelba ñane,
6 im ear em̦m̦an ippãn men in im ear jino pukot juon iien em̦m̦an im ejjel̦o̦k armej ñan an ketake ñan er.
7 Ke ear jejjet raanin Kwõjkwõjin Bũreet Ejjab Kauwe, raan eo rar aikuj in katok kõn menninmour ñan iien Kwõjkwõjin Kijoone eo,
8 Jesus ear jilkinl̦o̦k Piter im Jon im ear ba: “Komiro etal im kõpooje kõjota eo ñan Kwõjkwõjin Kijoone eo bwe jen m̦õñã.”
9 Im rar ba ñane: “Ia eo kokõn̦aan bwe kõmin ilen kõpooje ie?”
10 Im eba ñan er: “Ñe komiro naaj tõparl̦o̦k Jerusalem, juon em̦m̦aan ej kotak juon nien dãn enaaj iioone komiro. Komiro l̦oorel̦o̦k ñan m̦weo enaaj del̦o̦ñl̦o̦k ie,
11 im kom̦win ba ñan em̦m̦aan eo im̦õn m̦weo, ‘Ri-Kaki ej ba: “Ewi ruum̦ in an ri-lotok me imaroñ kõjota* ie ippãn ri-kal̦oor ro aõ ilo iien Kwõjkwõjin Kijoone eo?”’
12 Em̦m̦aan eo enaaj kwal̦o̦k ñan kom̦ juon ruum̦ ekilep ej pãd ilõñ im epojak ñan ad kõjerbale. Kom̦win kab kõpooje kõjota eo ad ijen̦.”
13 Kõn men in, erro kar etal im lo aolep men ko ãinwõt an kar ba. Innem rar kõpooji men ko ñan iien Kwõjkwõjin Kijoone eo.
14 Ke ear jejjet iien eo, ear jijet ilo juon tebõl̦ ippãn rijjilõk ro.
15 Innem ear ba ñan er: “El̦ap aõ kar kõn̦aan m̦õñã ippemi ilo iien Kwõjkwõjin Kijoone in m̦okta jãn aõ eñtaan,
16 kõnke ij ba ñan kom̦ bwe ijjãmin bar m̦õñã ilo kõjota in m̦ae iien aolep men renaaj jejjet kũtieer ilo Aelõñ eo an Anij.”*
17 Im rar lel̦o̦k juon cup ñane, im ear bõke im kam̦m̦oolol Anij, im ear ba: “Kajjojo iaami en idaak jãne im lel̦o̦k ñan eo juon,
18 kõnke ij ba ñan kom̦ bwe jãn kiiõ im etal, ijjãmin bar idaak wain m̦ae iien Aelõñ eo an Anij enaaj itok.”
19 Bareinwõt, ear bõk juon bũreet im kam̦m̦oolol Anij, im ear kõrrãjete ñan elõñ m̦õttan im lel̦o̦k ñan er im ba: “Men in ej kõkkar kõn ãnbwinnũ, eo inaaj katok kake kõn kom̦. Kom̦win wõnm̦aanl̦o̦k wõt im kõm̦m̦ane men in ilo ememej eõ.”
20 Ear bar kõm̦m̦ane ejja men in wõt kõn cup eo ãlikin wõt aer kõjota, ear ba: “Cup in ej kõkkar kõn bujen eo ekããl, eo bõtõktõkũ ej kapene. Bõtõktõkũ enaaj to̦o̦rl̦o̦k kõn kom̦.
21 “Bõtab ij ba ñan kom̦ bwe eo enaaj ketake eõ epãd ijin ippa ilo tebõl̦ in.
22 Em̦ool bwe Nejin armej* enaaj mej ãinwõt kar kanaan kake, bõtab jerata ñan em̦m̦aan eo enaaj ketake!”
23 Innem rijjilõk ro rar jino kajitũkin doon kõn wõn iaaer enaaj kõm̦m̦ane men in.
24 Bareinwõt, ekar l̦ap aer akwããl kõn wõn eo eutiejtata iaaer.
25 Bõtab ear ba ñan er: “Kiiñ ro an aelõñ ko rej tõl armej ekkar ñan kõn̦aan ko aer, im ro armej rej pãd ium̦win maroñ ko aer, armej rej n̦aetaer ri-Utiej.*
26 Kom̦win jab ãinwõt er. Eo eutiejtata iaami en oktak im ãinwõt eo ediktata, im eo ej tõl en oktak im ami ri-jerbal.
27 Wõn eo eutiejl̦o̦k, eo ej kõjota* ke ak eo ej bõkl̦o̦k kijen?* Eo ej kõjota* eutiejl̦o̦k, ejjab ke? Bõtab ña, ij pãd ippemi im jerbal ñan kom̦.
28 “Kom̦ eo kom̦ar pãdwõt ippa ilo iien ko iar iioon eñtaan.
29 Ãinwõt an kar Jema kõm̦m̦ane juon bujen ippa, ij bar kõm̦m̦ane juon bujen ippemi bwe kom̦win kiiñ ilo juon aelõñ
30 bwe kom̦win maroñ m̦õñã im idaak ilo tebõl̦ eo aõ ilo Aelõñ eo aõ im jijet ioon tũroon ko im ekajete bwij ko 12 bwijjin Israel.
31 “Saimõn, Saimõn,* kwõn roñjake! Setan ear kajjitõk an kõm̦m̦an ñan kom̦ ãinwõt an juon armej kõjenolo̦k wiit ko jãn kilier.
32 Bõtab iar akwel̦ap ñan Anij kõn kwe bwe en jab m̦õjn̦o̦l̦o̦k tõmak n̦e am̦. M̦õjin wõt am̦ ukel̦o̦k im jepl̦aak, kwõn kõkajoor ro jeim̦ im jatũm̦.”
33 Innem ear ba ñane: “Irooj, ipojakin kalbuuj im mej ippam̦.”
34 Bõtab ear ba: “Piter, ij ba ñan kwe bwe m̦okta jãn an juon kako ikkũr rainin, jilu alen am̦ naaj ba bwe kwõjaje kajjieõ.”
35 Ear bar ba ñan er: “Ke iar jilkinl̦o̦k kom̦ ak ejjel̦o̦k ami nien jããn kab nien m̦õñã im ami juuj, kom̦ kar ke pãd ilo aikuj?” Rar uwaak im ba: “Kõmar jab!”
36 Innem ear ba ñan er: “Ak kiiõ, eo ewõr an nien jããn im nien m̦õñã en bũki ippãnl̦o̦k. Im eo ejjel̦o̦k an jãje, en wiakake kopã eo an im wiaik juon.
37 Jeje ko rej ba, ‘Renaaj kobaiki ippãn ri-nana ro.’ Ij ba ñan kom̦ bwe men in ej kõnnaan kõn ña. Men ko Jeje ko rej ba kõn ña rejejjet kũtieer kiiõ.”
38 Im rar ba: “Irooj, ruo iõ jãje.” Im eba ñan er: “Ebwe joñan n̦e.”
39 Ke ear ilo̦k jãn ijo, ear etal ñan Tol̦ Olive ãinwõt an kõn kõm̦m̦ane, im ri-kal̦oor ro rar l̦oorel̦o̦k.
40 Ke ear tõparl̦o̦k ijo, ear ba ñan er: “Kom̦win jar wõt bwe kom̦win jab po ilo kapo.”
41 Innem ear wõnm̦aanl̦o̦k jidik jãn ijo ippãer, im ear bukwelõlõ im jino an jar
42 im ba: “Jema, el̦aññe kokõn̦aan, kwõn bõk cup* in jãn ña. Bõtab en jab ekkar ñan ankilaõ ak en ekkar ñan ankilaam̦.”
43 Innem juon enjel̦ jãn lañ ear wal̦o̦ktok ñane im kõkajoore.
44 Bõtab, kõn an lukkuun eñtaan ear l̦apl̦o̦k wõt an jar, im menokaduun ear ãinwõt bõtõktõk ke ej ippilpil ñan ioon bwidej.
45 Ãlikin an jar, ear jepl̦aak ñan ippãn ri-kal̦oor ro im lo aer kiki kõnke rar lukkuun m̦õk kõn aer bũrom̦õj.
46 Im ear ba ñan er: “Etke kom̦ij kiki? Kom̦win jerkak im jar wõt bwe kom̦win jab po* ilo kapo.”
47 Ej kõnono wõt ak Judas, juon iaan rijjilõk ro 12, ear jãdetok kõn juon jarlepju, im ear kepaake Jesus im mejenmaiki.
48 Bõtab Jesus ear ba ñane: “Judas, ta kwõj ketake Nejin armej kõn mejenma ke?”
49 Ke ro rej pãd iturin rar loe men eo ej itõn wal̦o̦k, rar ba: “Irooj, kokõn̦aan ke bwe kõmin jek er kõn jãje?”
50 Innem juon iaaer ear jek lo̦jilñin ri-karejar* eo an bũrij l̦apl̦ap eo, lo̦jilñi eo ituanmoon̦.
51 Bõtab Jesus ear ba: “Bõjrak! Ebwe n̦e!” Innem ear jibwe lo̦jilñin ri-karejar* eo im ear bar em̦m̦an.
52 Innem Jesus ear ba ñan bũrij ro reutiej im ro rej bõk eddon tampel̦ eo kab ri-tõl ro an ri-Ju ro me rar jibadektok e im ba: “Etke kom̦ij itok kõn jãje im al̦al̦ ãinwõt ñe ña juon ri-ko̦o̦t?
53 Aolep raan iar pãd ippemi ilo tampel̦ en̦, ak etke kom̦ar jab bõk eõ? Bõtab ami iien in, im ej iien an marok tõl.”
54 Innem rar jibwe im bõke jãn ijo im bõkl̦o̦k ñan m̦weo im̦õn bũrij l̦apl̦ap eo, ak Piter ear pãd ettol̦o̦k im l̦oorel̦o̦k.
55 Ke armej ro rar kõjo̦jo kijeek ilo iol̦apen mel̦an m̦weo im jijet ippãn doon, Piter ear jijet ibwiljier.
56 Bõtab ke juon jiroñ* ear lo an jijet iturin kijeek eo, ear kalimjeke im ba: “L̦õn̦e ear bar pãd ippãn Jesus.”
57 Bõtab ear kariabe jiroñ eo im ba: “Kõrã en̦, ijaje kajjien l̦een̦.”
58 L̦o̦kun jidik iien, bar juon armej ear loe, im ear ba: “Kwe bar juon iaaer.” Bõtab Piter ear ba: “Em̦m̦aan en̦, ejjab ña eo.”
59 Ke emootl̦o̦k enañin juon awa, bar juon em̦m̦aan ear akwel̦ap im ba: “Lukkuun m̦ool ke l̦õn̦e ej juon iaaer kõnke elukkuun alikkar ke e ri-Galili!”
60 Bõtab Piter ear ba: “Em̦m̦aan en̦, ijaje ta n̦e kwõj kõnnaan kake.” Ej kõnono wõt ak ekajju ikkũr kako.
61 Innem Irooj ear oktak im kalimjeke Piter, im Piter ear keememejtok naan ko Irooj ear ba ñane, ke ear ba: “M̦okta jãn an ikkũr kako rainin, jilu alen am̦ naaj kaarmejjeteik eõ.”
62 Innem ear diwõjl̦o̦k im lukkuun jañ.
63 Ak kiiõ em̦m̦aan ro rej waje Jesus rar jino kõm̦m̦an kõjak kake im baiti,
64 im ãlikin aer pinej mejãn, rel̦akkar kajjitõk ippãn im ba: “Ñe kwe juon ri-kanaan, eokwe wõn eo ej baiti eok?”
65 Im rar bar ba elõñ kain naan ko renana n̦ae e.
66 Ke ear raan, ri-tõl ro an armej ro ak bũrij ro reutiej im skraib ro rar koba ippãn doon im rar bõkl̦o̦ke ñan Im̦õn Ekajet eo El̦ap an ri-Ju,* im rar ba:
67 “El̦aññe kwe Christ, kwõn ba ñan kõm.” Bõtab ear ba ñan er: “Jekdo̦o̦n ñe inaaj ba ñan kom̦ ak kom̦ ban tõmak eõ ñan jidik.
68 Bareinwõt ñe inaaj kajitũkin kom̦, kom̦ ban uwaake eõ.
69 Bõtab jãn kiiõ im etal, Nejin armej enaaj jijet ituanbwijmaroñin pein Anij, eo ekajoor.”
70 Kõn men in, er aolep rar ba: “Kwe ke nejin Anij?” Im ear ba ñan er: “Ejim̦we ami ba.”
71 Innem rar ba: “Etke jej aikuj bar kappoktok ri-kam̦ool ke em̦õj adwõj roñ jãn lo̦ñiin make?”
Footnotes
^ Lale “Kwõjkwõjin Bũreet Ejjab Kauwe” ilo Kõmel̦el̦e Ko.
^ Kajin Grik, “m̦õñã.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Ak “Ro Rej Jipañ Ro Jet.” Eñin kar juon taitõl̦ ñan kwal̦o̦k kautiej.
^ Ak “jijet ilo tebõl̦ eo.”
^ Ak “jerbal ñane.”
^ Ak “jijet ilo tebõl̦ eo.”
^ Ãt eo juon etan Piter.
^ “Cup” in ej kõkkar kõn an Anij kõtl̦o̦k an armej ro liaakel̦o̦k Jesus ñan mej meñe rar riab im ba bwe ear aikuj mej kõn an kõnono n̦ae Anij.
^ Ak “del̦o̦ñ.”
^ Ak “ri-kõm̦akoko.”
^ Ak “ri-kõm̦akoko.”
^ Jiroñ in ej juon ri-jerbal.
^ Kajin Grik, “Sanhedrin.”
