Kolosse 4:1-18
4 Kom̦ irooj ran̦, en jim̦we im em̦m̦an ami kõm̦m̦an ñan ri-karejar* ro ami bwe kom̦ jel̦ã bwe ewõr bareinwõt juon ami Irooj ilañ.
2 Kom̦win niknik ilo jar im kanooj lale bwe kom̦win jab kõjekdo̦o̦ne men in, im kom̦win kwal̦o̦k kam̦m̦oolol.
3 Im ilo ejja iien eo wõt, kom̦win bar jar kõn kõm bwe Anij en maroñ kõpel̦l̦o̦k ial̦an am kwal̦o̦k kõn ennaan eo ettino im eokkwõjarjar kõn Christ, eo ij kalbuuj kõn aõ kwal̦o̦k kake,
4 im bwe in maroñ kwal̦o̦k kake ilo alikkar ilo wãween eo ij aikuj kõm̦m̦ane.
5 Wõnm̦aanl̦o̦k wõt im etetal ilo mãlõtlõt im̦aan mejãn ro ilikin, im kom̦win kõjerbal iien ko ami ilo mãlõtlõt.*
6 Ami kõnono en ilo jouj iien otemjej, im kom̦win kãreiki kõn jo̦o̦l̦ bwe kom̦win maroñ jel̦ã kilen uwaake kajjojo armej.
7 Tikikõs, eo jeiũ im jatũ ejitõnbõro ippa, im ri-kwal̦o̦k etiljek im ri-karejar eo m̦õtta ilo Irooj, enaaj kõnnaanek kom̦ men otemjej kõn ña.
8 Ij jilkinwaj e ñan ippemi bwe kom̦win jel̦ã kõn wãween am mour im bwe en maroñ kaenõm̦m̦an bũruomi.
9 Onesimõs, eo jeiũ im jatũ etiljek im ejitõnbõro ippa im ej juon iaami, ej iwõj ippãn waj. Erro naaj kõnnaanek kom̦ kõn men otemjej rej wal̦o̦k ije.
10 Aristarkõs, eo ej kalbuuj ippa, ej lewaj an yokwe kom̦, ekoba Mark, eo nãj jatin Barnebas (e eo iar jiroñ kom̦ bwe kom̦win karwaineneiki ñe enaaj iwõj ñan ippemi),
11 im bareinwõt Jesus, eo rej ãñinñini im ba Jõstõs, im ej juon iaan ro rar m̦wijm̦wij. L̦õm̦arein wõt rej jerbal ippa kõn Aelõñ eo an Anij,* im ekanooj l̦ap aer kaenõm̦m̦an* eõ.
12 Epapras, eo ej juon ri-karejeran Christ Jesus im ej juon iaami, ej lewaj an yokwe kom̦. Aolep iien ej lukkuun jar kõn kom̦ bwe kom̦win kanooj rũtto ilo tõmak im lukkuun tõmak ilo aolep men ko rej ankilaan Anij.
13 Ij ri-kam̦ool ilo men in bwe el̦ap an kate kõn kom̦ im ro ilo Leodisia im Haierapolis.
14 Luk, taktõ e ejitõnbõro, ej lewaj an yokwe, im bareinwõt Dimas.
15 Lel̦o̦k aõ yokwe ro jeid im jatid ilo Leodisia, im ñan Nympha, im eklejia eo ilo m̦weo im̦õn.
16 Ñe em̦õj riiti lõta in ñan kom̦, kom̦win kõm̦m̦an karõk bwe eklejia eo ilo Leodisia en bar riiti, im bareinwõt bwe kom̦win riiti lõta eo iar jilkinl̦o̦k ñan Leodisia.
17 Bareinwõt kom̦win jiroñ Arkippos men in: “Kwõn kate eok bwe en jejjet am̦ kõm̦m̦ane jerbal eo kwaar bõke ilo Irooj.”
18 Ña Paul, ij make jejewaj im jilkinwaj aõ naanin yokyokwe. Keememej wõt eõ ilo aõ pãd ilo kalbuuj. Jouj eo el̦ap an Anij en pãd ippemi.
Footnotes
^ Ak “ri-kõm̦akoko.”
^ Kajin Grik, “kom̦win wiaik iien.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “kõkajoor.”
