Jerbal 1:1-26
1 Tiopilõs, ilo bok eo m̦oktal̦o̦k, iar jeje kõn aolep men ko Jesus ear kõm̦m̦ani im katakin kaki jãn kar jinoin
2 m̦ae raan eo kar bõklõñl̦o̦k ñan lañ, ãlikin an kar lel̦o̦k naanin kakapilõk ikijjeen jetõb kwõjarjar* ñan rijjilõk ro ear kããlõt er.
3 Ãlikin an kar eñtaan im mej, ear wal̦o̦kl̦o̦k ñan er im kwal̦o̦k elõñ kein kam̦ool ñan er bwe emour. Ium̦win 40 raan, ear wal̦o̦k ñan er elõñ alen im kõnnaan kõn Aelõñ eo an Anij.*
4 Ke ear kweilo̦k ippãer, ear jiroñ er im ba: “Kom̦win jab etal jãn Jerusalem, ak kom̦win kõttar wõt men eo Jema ear kallim̦ur kake, eo kom̦ar roñ jãn ña.
5 Jon ear peptaij armej kõn dãn, bõtab naaj peptaiji kom̦ kõn jetõb kwõjarjar* jejjo raan jãn kiiõ.”
6 Ke rar bar kweilo̦k ippãn doon, rar kajjitõk ippãn im ba: “Irooj, kwõj bar karo̦o̦ltok aelõñ eo ñan Israel ilo tõre in ke?”
7 Ear ba ñan er: “Kom̦ij jab aikuj jel̦ã kõn tõre ko ak raan ko Jema wõt ewõr an maroñ ñan karõki.
8 Bõtab kom̦ naaj obrak kõn kajoor ñe jetõb kwõjarjar* enaaj itok ioomi, im kom̦ naaj kwal̦o̦k kõn ña ilo Jerusalem, ilo aolepen Judia im Sameria, im ñan ãne ko rettol̦o̦ktata* ilo lal̦.”
9 Ãlikin an ba men kein, rej reilo̦k wõt ak Anij ear bõklõñl̦o̦k im juon kõdo̦ ear pineje im rar jab loe.
10 Innem ke ej wanlõñl̦o̦k im rej reilõñl̦o̦k wõt, ejidimkij an ruo em̦m̦aan rej nuknuk mouj wal̦o̦ktok im jutak iturier
11 im ba: “Em̦m̦aan in Galili ran̦, etke kom̦ij jutak ijen̦e im reilõñl̦o̦k? Jesus, eo kar bõklõñl̦o̦k jãn kom̦ ñan lañ, enaaj itok ilo ejja wãween in wõt kom̦ar loe ke ear weaakl̦o̦k ñan lañ.”
12 Innem rar jepl̦aak ñan Jerusalem jãn tol̦ eo etan Tol̦ Olive, eo ej pãd iturin Jerusalem, ettol̦o̦kin enañin jimattan m̦ail̦.*
13 Ke rar tõparl̦o̦k, rar etal ñan ruum̦ eo ilõñ, ijo rej pãd ie. Em̦m̦aan rein ej Piter, Jon im Jemes, Andru, Pilip im Tomas, Bartolomu im Matu, Jemes nejin Alpiõs, Saimõn, eo im el̦ap an kijejeto, im Judas nejin Jemes.
14 Er aolep rar bõro wõt juon ilo aer ekkeini aer jar, ekoba jet kõrã, im Meri jinen Jesus im l̦õm̦aro jatin Jesus.
15 Ilo juon iaan raan ko ke rar kobal̦o̦k ippãn doon im jar, Piter ear jutak ibwiljin rũttõmak ro m̦õttan (oraer aolep* enañin 120) im ear ba:
16 “Em̦m̦aan ran̦ jeiũ im jatũ, ekar menin aikuj bwe en jejjet kũtien eoon eo jetõb kwõjarjar* ear kõm̦akũt Devid bwe en kanaan kake kõn Judas, eo ear tõl ro rar kalbuuji Jesus.
17 Unin ej kõnke Judas ear juon iaad im ekõn bõk kun̦aan ilo jerbal in.
18 (L̦ein ear wiaik juon wãto kõn jããn ko ear bũki jãn jerbal ko an renana. Ear wõtlo̦k im jok kõn bõran, im ear potak lo̦jien im wal̦o̦k nabõjtak aolepen kobban.
19 Ennaan in ear ajeeded im aolep armej in Jerusalem rar jel̦ã kake, innem rar n̦aetan jikin in ilo kajin eo aer Akeldama, mel̦el̦ein, “Wãto in Bõtõktõk.”)
20 Em̦õj kar je ilo bokin Sam im ba, ‘M̦weo im̦õn en jeepepl̦o̦k im ejjel̦o̦k en jokwe ie’ im, ‘Bar juon en bõk eddo ko an.’*
21 Kõn men in, jej aikuj kããlõte juon em̦m̦aan, bõtab ej aikuj juon iaan ro rar pãd ippãd ilo aolep iien ko Irooj Jesus ear kõm̦m̦ani jerbal ko an ibwiljid,*
22 jino jãn iien eo Jon ear peptaiji ñan raan eo kar bõklõñl̦o̦k jãn kõj. Bareinwõt, ej aikuj in juon eo ear lo Jesus ãlikin an kar jerkakpeje, ãinwõt kar kõj.”
23 Kõn men in, rar kããlõt ruo em̦m̦aan, juon iaaer ej Josep, eo rar ãñinñini im ba Barsebas, ãt eo juon etan ej Jõstõs. Armej eo juon rar kããlõte ej Mattaias.
24 Innem rar jar im ba: “O Jeova,* kwõjel̦ã bũruon armej otemjej, kwõn kaalikkar wõn iaan l̦õm̦arein ruo em̦õj am̦ kããlõte
25 ñan bõk jerbal in im eddo ko an juon rijjilõk, eo Judas ear kõjekdo̦o̦ne im etal ilo ial̦ eo an make.”
26 Innem rar kũbween kijdik ñan kããlõt juon iaaer, im eo kar kããlõte ej Mattaias. Kõn men in, rar kobaiki* ippãn rijjilõk ro 11.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “jikin ko jabõntata.”
^ Kajin Grik, “joñan etetal ilo raanin Jabõt.” Joñan aetokin an juon ri-Ju maroñ etetal ilo raanin Jabõt.
^ Ak “oran jarlepju eo.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, eddo eo an ñan lale eklejia.
^ Kajin Grik, “etal im itok ibwiljid.”
^ Lale “Jeova” ilo Kõmel̦el̦e Ko.
^ Ak “bwine,” mel̦el̦ein bwe rar watõke bwe ej uwaan rijjilõk ro 11.
