2 Timote 3:1-17
3 Bõtab kwõn jel̦ã men in bwe ilo raan ko ãliktata, iien ko rekanooj in nana im reppen renaaj wal̦o̦k.
2 Armej renaaj yokwe er make, renaaj arõk* jããn, kõmjãje, jãjjãj, renaaj kõnono n̦ae Anij im ro jet, jab pokake jemãer im jineer, jaje kam̦m̦oolol, im jab tiljek,
3 enaaj ejjel̦o̦k yokwe ippãer, renaaj m̦akoko in errã ilo jabdewõt pepe, renaaj ruruwe, jaje irooj ioer make, lãj, dike em̦m̦an,
4 renaaj ketake ro repaake er, renaaj l̦oor wõt kõn̦aan ko aer, utiej bũrueer, im renaaj yokwe menin kabuñbũrueer ijello̦kun aer yokwe Anij,
5 renaaj ãinwõt ñe rej tiljek ñan Anij, bõtab rejjab mour ekkar ñan men in; kwõn el̦l̦o̦k jãn armej rein.
6 Enaaj wõr jet em̦m̦aan ro jãn ibwiljin rein renaaj del̦o̦ñ ilo m̦õko ilo juon wãween etao im kareel kõrã ro rem̦õjn̦o̦ im robrak kõn jerawiwi im rej l̦oor elõñ kain m̦õm̦ ko,
7 im aolep iien rej katak ak ejjab jim̦we jel̦ãl̦o̦kjen̦ eo aer kõn m̦ool eo.
8 Wãween an kar Jannis im Jambris jum̦ae Moses, ejjel̦o̦k oktak jãn an em̦m̦aan rein wõnm̦aanl̦o̦k wõt im jum̦ae m̦ool eo, elukkuun nana l̦õmn̦ak ko aer im rein rejekkar ñan pãd ilo tõmak.
9 Ijoke reban wõnm̦aanl̦o̦k wõt, kõnke aer jajel̦o̦kjen̦* enaaj lukkuun alikkar im̦aan mejãn aolep armej, ãinwõt kar l̦õm̦arein ruo.
10 Bõtab kwe, kwaar kanooj l̦oor katak ko aõ, wãween aõ kar mour, kõttõpar eo aõ, tõmak eo aõ, im aõ meanwõd, yokwe, im kijenmej,
11 im kwõjel̦ã kõn aõ kar iioon matõrtõr im eñtaan, ãinwõt ilo kar Antiok, Aikoniõm, im Listra. Iar kijenmej ium̦win menin kaeñtaan kein, im Irooj ear lo̦mo̦o̦ren eõ jãn men kein otemjej.
12 Ilo m̦ool, aolep ro rekõn̦aan mour ilo aer tiljek ñan Anij im aer juon wõt ippãn Christ Jesus, naaj bareinwõt kaeñtaan er.
13 Bõtab ro renana im ro rejel̦ã m̦on̦ enaaj l̦apl̦o̦k wõt aer nana, renaaj m̦on̦e ro jet im ro jet renaaj bar m̦on̦e er.
14 Ak kwe, kwõn wõnm̦aanl̦o̦k wõt ilo men ko kwaar katak kaki im kar kõm̦akũt eok ñan am̦ tõmaki, bwe kwõjel̦ã wõn ro kwaar katak kõn men kein jãn er,
15 im jãn ke kwaar niñniñ, kwaar jel̦ã kõn jeje ko rekkwõjarjar, ko rej jipañ eok ñan mãlõtlõt, eo ej tõll̦o̦k ñan lo̦mo̦o̦r eo ikijjeen tõmak ilo Christ Jesus.
16 Aolep Jeje ko rej kakũrm̦ool in Anij,* im ewõr tokjãer ñan katakin, kauwe, kajim̦we, im ñan kammineneik kõj ñan kõm̦m̦ane men eo ewãnõk,
17 kõnke eo ej karejar ñan Anij, en juon eo elukkuun ekkar im pojak ñan aolep jerbal ko rem̦m̦an.
Footnotes
^ Kajin Grik, “yokwe.”
^ Ak “bwebwe.”
^ Mel̦el̦ein, “itok jãn tõl eo jãn jetõb kwõjarjar eo an Anij.”
