Ufi: Ya Nte Yako Yeova yakakana imilembo napya yakakana kuti yayalwazye umu vipatala.

 Icumi: Tukazumila imilwazizye ingatwazwa ningo sana kumwi ni ndupwa zitu. Ngi cakuti twalwala tukaya kuli ya dokota angatulwazya ningo nanti ukutulepula kwaula ukutwikila uwazi. Tukataizya sana vino ndakai, iiyamanyikisya inzila zisuma izyakulwazizya antu mu vipatala. Nanti cakuti inzila ya kulwazya kwaula ukwikila umulwale uwazi yaiomvyanga sile kuli ya Nte, pali ndakai yakaiomvya nu ku yantu sile yauze. Ndakai umu mpanga izingi, mulwale wakwata insambu zya kukana ukwikilwa uwazi, naci cikalenga ukuti acingililwe ku ndwala ni ntazi zyuze izikacitika ngi cakuti umuntu wazumila ukuti yamwikile uwazi.

 Ufi: Ya Nte Yako Yeova yazumila ukuti utailo sile uungapozya ulwale wa muntu.

 Icumi: Tutazumila ukuti umuntu angapoziwa pa mulandu wa utailo sile.

 Ufi: Kulwazya umuntu kwaula ukumwikila uwazi kukalondekwa impiya izingi sana.

 Icumi: Imilwazizye iyaula ukuomvya uwazi isilondeka impiya izingi sana zya kuti nu muntu afilwa ukulipila. *

 Ufi: Cila mwaka ya Nte Yakwe Yeova aingi kumwi sile na ana yao yakafwa pa mulandu wa kukana ukuti yaikile uwazi.

 Icumi: Aakalanda vii yatakwata ivisinka. Ya dokota aingi yakakwanisya sile ningo kulwazya umulwale kwaula ukumwikila uwazi lino yakuombela pa kulepula ukutale wakwe ukulepula umwenzo, kusezya mafupa, nanti kukuusya ivilundwa vimwi vya mu mwili. * Alwale aingi kumwi sile na ana yano yakalwazya kwaula ukuikila uwazi yakaya ningo kucila na yano yakaikila uwazi. * Fwandi kusi angalanda umu cumi ukuti umulwale angafwa ndi wakana kumwikila uwazi, nanti angapusuka ndi yamwikila uwazi.

 U mulandu na vino yasambilila muli Baibo. Mu Upangano wa mpiti nu Upangano Upya mwaya masunde aakatunena ukuti twasenka uku wazi. (Utandiko 9:4; Aina Levi 17:10; Malango 12:23; Milimo 15:28, 29) Cuze i cakuti Leza akalola ukuti uwazi ukaimilila umi wa muntu. (Aina Levi 17:14) Acino fwandi tukakana ukutwikila uwazi asi mulandu sile wa masunde yatupu, lelo nu mulandu wa kuti twacindika Leza Kapeela wa umi.

 Mpiti ya dokota yalolanga ukuti inzila zyuze zya kulepwilamo umuntu kwaula kumwikila uwazi zitaya ningo, zyatala, napya yatangi kukana uwazi i cili cimwi nu kuikulika; nomba ndakai vintu vyasenuka. Mu 2004 kwali cipande muli magazini imwi icalandanga pa umi wa muntu icalanzile ukuti “inzila izingi zino tukaomvya ukulwazizya ya Nte Yako Yeova azino tulaaomvya sana mu myaka ikwiza.” * Icipande icali muli magazine yakuti Heart, Lung and Circulation calanzile ukuti mu 2010 “‘inzila yakulepula ukwaula kwikila uwazi’ italinzile sile ukuomviwa kuli ya Nte Yakwe Yeova yonga, lelo ifwile ukuomviwa nu ku yantu yonsi.”

 Ndakai umu nsi yonsi ya dokota aingi umu vipatala yatandika ukuomvya inzila ya kusungilila uwazi ningo lino yakulepula umulwale kwaula nu kumwikila uwazi. Imilwazizye iyo ikaomviwa sana, nanti sile umu mpanga izipina, napya alwale aingi kumwi na asi ya Nte Yakwe Yeova kwene yakasoolola imilwazizye kwene iyaula kwikilwa uwazi.