Awe foo, imipepele yonsi itaya icili cimwi. Muli Baibo mwaya amalyasi aingi akalanda pa mipepele ikasosya Leza. Mipepele iyo yaya umu viputulwa viili.

Ciputulwa 1: Ukupepa ya leza ya ufi

 Baibo ikalondolola ukupepa ya leza ya ufi ukuomvya amazwi ali wakwe “izyasile sile,” “ivyaciwelewele” na “ivyaula amaka.” (Yelemiya 10:3-5; 16:19, 20) Yeova a Leza wanenyile uluko lwa ina Izlaeli ulwaliko mpiti ukuti: “Mutapepa tuleza tuze suka nene nenga.” (Kufuma 20:3, 23; 23:24) Lino aina Izlaeli yapepanga ya leza yauze, Yeova wayasokelanga.—Mpendwa 25:3; Aina Levi 20:2; Yakapingula 2:13, 14.

 Na likwene Leza acili wapata imipepele ya musango uwo iya kupepa vintu vino yakaama ukuti “ya leza.” (1 Kolinto 8:5, 6; Galatiya 4:8) Akanena yonsi akalonda ukumupepa ukuta ukuya pamwi na antu aya umu mipepele ya ufi, akati: “Yatini, nupya fuminiko kuno yali!” (2 Kolinto 6:14-17) Ndi cakuti imipepele yonsi yaya icili cimwi nupya yonsi ikatungulula antu kuli Leza, u mulandu ci lyene uno Leza angapeelela isunde lilyo?

Ciputulwa 2: Ukupepa Leza wa cumi umu nzila ino asilonda twamupepelamo

 Insita zimwi, aina Izlaeli yapepanga Leza ukuomvya ivizumilo alino ni vicitwa vino yaomvyanga umu kupepa ya leza ya ufi, nomba Yeova wakanyile imipepele ya musango uwo iyakuminkanya ukupepa kwa cumi ni mipepele ya ufi. (Kufuma 32:8; Malango 12:2-4) Yesu wanenozile ya simapepo aaliko lino wali pano nsi pa mulandu na vino yapepanga Leza, yailangizyanga uku yantu ukuti aakapepa sana lelo vino yalangizya asi vino yacitanga. Yatazyezile “vintu vikulu kuluta, vya mu Masunde wakwe vii: Upinguzi wa mulinganya, mizu nu ufuma cumi.”—Mateo 23:23.

 Na ndakai kwene avino caya, imipepele sile iyemelela pa cumi iikatungulula antu kuli Leza. Icumi cico cikazanwa muli Baibo. (Yoane 4:24; 17:17; 2 Timoti 3:16, 17) Imipepele ikasambilizya ivipusaneko na vino Baibo ikalanda ikatalusya antu kuli Leza. Ivisambilizyo vino antu yakaelenganya kuti vyafuma muli Baibo ivili wakwe Aeneco Yatatu Muli Leza Wenga, umi usifwa, nu kucuziwa umu moto wa pe​—vyonsi vii vyafuma uku kupepa ya leza ya ufi. Imipepele ikasambilizya vivyo ‘iyasile sile’ nanti iyauwelewele, pano ikasisyapo vino Leza akalonda twapepa nu kwikapo intambi.—Mako 7:7, 8.

 Leza wapata imipepele iya usomvi. (Tito 1:16) Pakuti imipepele iyazwe antu ukupalama kuli Leza, yalinzile ukusambiliziwa ivingayazwa umu umi wao onsi nupya yatalinzile ukwikamo ivya ntambi nanti ivya kupanga sile. Baibo ikati: “Uzye muntu umwi akaelenganya vino wene umupefi wakwe Leza? Ndi cakuti wene asyapindulula lulimi lwakwe, ale nu upefi wakwe u wasilesile nupya akaisomba umwisikulu. Upefi uno Leza Tata akalola ukuti uwa mpomvu aewu: ukwazwa ana asyale na ya mukamfwilwa mu macuzi yao nga nu kuisunga ku ukakasi uwaya mu nsi.” (Yakobo 1:26, 27) Baibo wakwe King James Version waomvya amazwi yakuti “imipepele isanguluke” pa mazwi yakuti ukwa mpomvu nupya ukwa cumi.