Uzye Leza Waya Sile Apali Ponsi?
Vino Baibo yalandapo
Leza akalola vyonsi nupya akacita cimwi ukuli konsi kuno watemwa. (Mapinda 15:3; Ayebulai 4:13) Nomba Baibo isitusambilizya ukuti Leza waya sile apali ponsi nanti umu vintu vyonsi. Lelo ikatunena ukuti umuntu nu kuti wakwata kuno akaikala.
Musango uno Leza wayelamo: Leza u mupasi. (Yoane 4:24) Asiloleka uku yantu. (Yoane 1:18) Ivilolwa ivyalembwa muli Baibo vyonsi vikalangilila ukuti wakwata icifulo cimwi pano akaikala. Mu vilolwa vivyo atalolekelanga sile apali ponsi.—Ezaya 6:1, 2; Umbwilo 4:2, 3, 8.
Kuno Leza akaikala: Leza akaikala uku cifulo ca viumbwa vya mupasi, icifulo icapusanako na cino antu aakaloleka yakaikalako. Mu cifulo cico ica viumbwa vya mupasi, Leza waikwatila incende kuno akaikala. (1 Yamwene 8:30) Baibo ikalandapo pa nsita imwi lino angeli ‘yaile uku kwimilila apa nkoleelo yakwe Yeova.’ a—Yobo 1:6.
Uzye Leza angansakamala ndi cakuti ataya apali ponsi?
Ee. Leza akasakamala sana umuntu wenga na wenga. Nanti cakuti akaikala uku cifulo ca viumbwa vya mupasi, akalola yonsi aya pano nsi aakamuzanzya, nupya akayazwa. (1 Yamwene 8:39; 2 Milandu 16:9) Lolini vino Yeova akalanga ukuti akasakamala ya kapepa yakwe acisinka:
Ndi mwapepa: Yeova akauvwa ipepo linu lili kwene sile lino mwatandika ukuvwanga.—2 Milandu 18:31.
Ndi cakuti muli nu ulanda: “Yawe [Yeova] akaya umupipi sana na yayo ati yaputuka imisana. Wene akapususya antu yano yati yapelelwa amano.”—Masamu 34:18.
Ndi mukulonda ukumanya ivya kucita pakuti mupingulepo ningo: Yeova ‘alamusambilizya nu kumulanga inzila’ ukupitila umwi Izwi lyakwe, Baibo.—Masamu 32:8.
Ivya ufi pa kuya apali ponsi sile
Ufi: Leza waya sile umu viumbwa monsi.
Icisinka: Leza ataya pano nsi nupya ataya umu cintu icili consi icaya pano nsi. (1 Yamwene 8:27) Icacumi intanda ni viumbwa vyuze vino waumba ‘vikalanda apa lulumbi lwakwe Leza.’ (Masamu 19:1) Nomba Leza asiikala umu viumbwa vyakwe wakwe vivi kwene vino kalenga wa vintu asiikala muli vino walenga. Nomba nanti ciye vivyo vino umuntu wiyo walenga vingatunena vimwi pali vino waya. Avino caya na kuli Leza, ivintu vino tukalola umu nsi vikatunena imiyele ino Kaumba witu wakwata ili wa maka, amano nu kutemwa.—Loma 1:20.
Ufi: Leza afwile ukuya apali ponsi pakuti amanye ivintu vyonsi nu kuya sana uwa maka.
Icisinka: Umupasi wakwe Leza nanti amaka akaomba, ali yano akaomvya pakucita ivintu. Ukupitila umu mupasi wakwe, Leza angamanya nu kucita icili consi, ukuli konsi nupya pa nsita ili yonsi ukwaula ukuya pa ncende iyo.—Masamu 139:7.
Ufi: Pa Masamu 139:8 pakasambilizya ukuti Leza waya apali ponsi vino pakalanda ukuti: Nga nalungama ukwiyulu, akunuli, vyonsi nga ningati inje nkalale kuzimo, akunuli.
Icisinka: Ilembelo lii lisikulanda pa cifulo cakwe Leza. Likalangilila sile ukuti kusi incende iyafisama kuno tungaya kuno Leza angafilwa ukutwazwa.
a Yeova i zina lyakwe Leza ukulingana na vino Baibo ikalanda.
Limwi Mungatemwa Ukulolako na Vii
MASUKO KU MAUZYO AMULI BAIBO
Uzye Umupasi wa Muzilo I Cani?
kwaya umulandu onga ucindame uno Baibo ikalandila ukuti umupasi wa Muzilo a “makasa” yakwe Leza.
PALI SWESWE
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.