Kaini umwana umukalamba wa yatwalane akutandikilapo, watwazile wenga pali ya nkazi yakwe nanti umwanaci lupwa wakwe umupalamisye. Tungasininkizya vii ndi cakuti twalola vino Baibo ikalanda pali Kaini nu lupwa lwakwe.

Ivisinka pali Kaini nu lupwa lwakwe

•   Antu yonsi yafumile kuli Adamu na Eva. “Ukufuma ku muntu wenga, [Leza] waumvileko imitundu yonsi iya antu nu kuleka kuti ikale mu nsi yonsi.” (Milimo 17:26) Umuci wakwe damu, Eva wizile aya “ali nyina wa antu onsi.” (Utandiko 3:20) Fwandi, Kaini afwile watwazile umwana muze wakwe Adamu na Eva.

•   Kaini na Abeli yali ali yana akutandikilako ukuvyalwa kuli Eva. (Utandiko 4:1, 2) Lino Kaini wazinzilwe pa mulandu wakukoma Abeli, wavwanzile ati “wensi alankomanya alankoma.” (Utandiko 4:14) Aaweni yano Kaini watiinanga? Baibo ikalanda ukuti Adamu “wakweti ana na yauze aonsi na anaci.” (Utandiko 5:4) Tungasininkizya ukuti ana yaa yako Adamu yafwile yuvwisyanga Kaini intete.

•   Mpiti ukutwala nanti ukutwalwa umu lupwa kwasesile sana. Abulaamu umonsi wa cisinka, watwazile umwanaci wino isi wavyazile kuli nyina muze. (Utandiko 20:12) Ukutwalana kuu kwizile kutandika ukulesiwa lino Isunde Lyakwe Mose lyatandike ukuomba, ala papita ni myaka iingi ukufuma umu manda yakwe Kaini. (Aina Levi 18:9, 12, 13) Cikaloleka kwati ana avyalwanga uku yantu atwalananga ukufuma mu lupwa longa yayalolangako ningo kucila vino caya ndakai.

•   Baibo yalanda ivya cumi pali Adamu, Eva nu lupwa lwao. Ivyeo ivikalondolola pa ndupwa zyakucisila, wakwe pa lupwa lwakwe Adamu visizanwa sile umwi buku lya Utandiko lino Mose walemvile, vikazanwa nu mu mabuku yano akalondelezya pa vintu ivyampiti yalemvile wakwe Ezila na Luka. (Utandiko 5:3-5; 1 Milandu 1:1-4; Luka 3:38) Yakalemba yakwe Baibo yakalanda ukuti ilyasi ilikalanda pali Kaini lyaya pa malyasi acitikanga mpiti.—Ayebulai 11:4; 1 Yoane 3:12; Yuda 11.