LYASI LYAKUTANDIKILAKO
Mwamanyapo Vyani pa Nte Zyakwe Yeova?
Becky, uwa ku California, U.S.A. walanzile ati: “Pano namanyila ukuti Mike a Nte Yakwe Yeova, iipapita imyaka ingi. Nomba ntamanya ningo-ningo iceici kwene cico. Uzye ale Yeova kwene a weni? U mulandu ci uno ya Nte yene yasizevezyako amanda yamwikalwe? Uzye ale Mike waya umu kaliumba kamwi sile akamipepele akatamanyikwa ningo?”
Zenon, uwa ku Ontario, Canada, nawe watiile, “Lino naweni antu yano twapalamine yakusambilila Baibo na ya Nte Yakwe Yeova, nelenganyanga ukuti: ‘Uzye izina kwene lyakuti ya Nte Yakwe Yeova, likapiliula cani? Ala mwandi ungafilwa nu kumanya upiliulo wizina kwene lii!’”
Kent, uwa ku Washington, U.S.A. walanzile ati: “Nemo na mamane lino twaweni ya Nte Yakwe Yeova iiza apa ng’anda, twelenginye ukuti limwi iiza uku kutunenola pali vino tutaile ku ceici. Nupya twelenganyanga nu kuti ndi cakuti vino tukulonda viisi umu mipepele ingi, ale na ya Nte Yakwe Yeova kwene yatanga yavikwate.”
Cecilie, uwa ku Esbjerg, Denmark, nawe walanzile ati: “Ukulanda sile icumi, ntamanyile ya Nte Yakwe Yeova na vino yazumilamo.”
Ukwaula nu kutwisika, limwi mwalolapo kuno ya Nte yakusimikila uku ng’anda ni ng’anda nanti sile ukuli konsi, ala yakupeela antu impapulo izikalanda pali Baibo alino nu kusambilizya antu Baibo ukwaula ukulipilisya. Alino limwi mwapokapo na magazini kuli ya Nte. Nomba, nanti cingaya vivyo mufwile mukalonda ukumanya ivingi pali ya Nte Yakwe Yeova. Limwi vino mukaelengaya pali ya Nte vyakolana na vino antu atiyalumbulwa apapela yalandapo.
Ndi cakuti namwe mukauzya sana pali ya Nte Yakwe Yeova, aekwi kuno mungazana amasuko? Mungacita uli pakuti mumanye vino ya Nte Yakwe Yeova yaazumilamo, na kuno yakafumya impiya izikaomviwa ukukuula ivikuulwa vino yakalonganilamo nu kwavwilizya umulimo wa kusimikila? Nupya u mulandu ci uno yakaizila uku mang’anda inu alino nu ku vifulo ukukazanwa antu aingi?
Cecilie uwatalumbulwa apapela, walanzile ukuti: “Nawelenzile ivyeo ivingi sana pali ya Nte Yakwe Yeova apa Intaneti, nupya nuvwile na vino antu yakalanda iviipe pali ya Nte. Kufuma paapo nani kwene natandike ukwelenganya iviipe pali ya Nte.” Nomba apa cisila wizile alandako na ya Nte Yakwe Yeova nupya yamwaswike amauzyo yano wakweti.
Nga mwemo, uzye mukalonda sana masuko uku mauzyo yano mukauzya pali ya Nte? Tukumukomelezya ukuti muce muye kuli ya Nte Yakwe Yeova, yakwene akapanga na magazini kwene ii. (Mapinda 14:15) Tukutaila ukuti ivipande ivyalondelelapo vimamwazwa ukumanya ningo swe ya Nte Yakwe Yeova na vino twazumilamo alino mumamanya nu mulimo uno tukaomba.
