Nakuliile umu musumba uwa Montreal muno antu aingi yataomba incito nupya umwali upiina. Lino naali ni myezi 6, ya tata yafwile, na cii calenzile yamayo yaomba incito zyonsi izya pa ng’anda. Nene naali umunono pa yana 8 yano yakwata.

Lino nakulanga, natandike ukuomvya imilembo ikavulunganya uwongo, kusitika, kuya nu unkalwe, alino nu kuzanwa na antu aali ivipondo. Lino naali ni myaka 10, natandike ukuombela ya cizelele imilimo imwi nu kuombela aakongwesyanga kaloba ukwaula ukukwata insambu. Ilingi nabepanga nupya naomvyanga micenjelo pakuti niyile antu. Nupya natemilwe sana ukucita vivyo.

Lino nafisyanga imyaka 14, ala nasambilila inzila izingi izya kubepelamo antu. Wakwe, nakalanga ivintu ivingi ivyakwetiko goldi, wa nkoloko, maelena, vibango, alino na vyuze, nu kulembapo ukuti vyapangilwa na goldi kwene, alino inja umu kuvikazya umu miseo nu mu mamaliketi. Fwandi napanganga sana ulupiya. Wakwe, umuku umwi napanzile ulupiya ulungakumana madola 10,000 umu wanda sile onga!

Lino yanzinzile kuno yasambilizizyanga acance atiyapanga imilandu ala indi ni myaka 15, ntakweti ukuli konsi ukwa kwikala. Fwandi nalalaanga sile umu miseo, muno antu yakaizizya, nanti umu mang’anda ya yanji nga yansendako.

Pa mulandu na vino nabepanga, ilingi ya kapokola yandemanga. Lelo pa mulandu wakuti ntakazyanga ivya kwiya, yatanyepanga. Nomba nalipilanga impiya izingi pa mulandu na vino nabepanga, ukukazya ivintu ivisi vya cumi, alino nu kukazya ivintu ukwaula ukukwata insambu. Nupya ukwaula ukutiina ali wensi, nayanga umu kupokela antu impiya kuli yano yakongwesya kaloba. Kucita vii kwali u kuika umu uzanzo, nupya insita zimwi napitanga ni imfuti. Nupya insita zimwi nazyo naombelanga pamwi ni vipondo.

Umuku wa kutandikilapo uno nuvwile pali Baibo naali ni myaka 17. Pa nsita iya umukazyana wino nikalanga nawe watandike ukusambilila Baibo na ya Nte Yakwe Yeova. Nomba, lino nuvwile vino Baibo yalanzile pa miyele ino tulinzile ukuya nayo ntatemilwe, fwandi nasile umukazyana wiyo, inja intandika nu kwikala nu mukazyana muze wino twizizyanyanga nawe pa nsita kwene iya.

Kwali cimwi icacitike lino umukazyana wiyo nawe kwene watandike ukusambilila Baibo na ya Nte. Watandike ukusenuka umu umi, nupya natemilwe imiyele ino wizile akwata wakwe, ukufuuka nu kuteeka sana umwenzo. Lino yanenyile ukuti nkazanwe uku kulongana kwakwe ya Nte Yakwe Yeova uku Ng’anda ya Wene nazumile. Aampokeliile yali sana nu mucinzi ni cikuuku. Miyele ino yakweti yapusine sana ni miyele ino aa mu nsi yakwata! Ntatazile inuvwapo ukuti aa mu lupwa lwane yanjisileko mano; lino nali umwance nayuvwanga ukuti yatantemilwe nupya yatandanganga icikuuku. Vino ya Nte Yakwe Yeova yampokeliile ningo ali vino nalondesyanga. Lino ya Nte yanguzizye nga yangatandika ukusambilila Baibo nani, nazumile.

Ningati sile vino nasambilila muli Baibo vyapuswisye uumi wane. Pa nsita iya ala twapangana na anji yaili ukuti tukiye impiya pakuti tulipile uku nkongole zino twakweti kuno twasitikanga, izyacizile amadola 50,000. Nomba naya sana ni nsansa pa mulandu wakuti ntacisile vivyo! Anji yano twapangiine nayo yaile umu kwiya. Wenga pali aliyo yamunyefile lyene umuze nawe yamukomile.

Lino nasambililanga Baibo, nazanyile ukuti kwali umwingi muno nalondekwanga ukusenuka. Wakwe, nasambilile vino Baibo ikalanda pali 1 Kolinto 6:10 ukuti: “Apuupu, alunkumbwa, ya cakolwa, aantusi, na acenjezi yatalingila umu Wene wakwe Leza.” Lino nabelenzile icikomo cii natandike ukulila. Nilwike ukuti ndinzile ukusenuka sana. (Loma 12:2) Nali sana nu unkalwe ni cipyu, nupya nabepanga sana umu umi wane.

Nomba, nasambiliile nu kuti Yeova wakwata uluse nupya akaelela. (Ezaya 1:18) Napepanga sana nu kupaapata ukuti Yeova angazwe inte ukuya ni miyele ino nakweti mpiti. Pa mulandu wakuti wangazwile, natandike ukusenuka panono panono. Icintu conga cino twacisile pa kulangilila ukuti twasenukanga, u kuyalembesya icupo citu uku uteeko.

Pa nsita iya naali ni myaka 24, nupya ala natwala nkweti na ana yatatu. Fwandi nalondekwanga ukulonda incito iyampomvu iyakuti naomba. Ntasambilile nupya ntakweti mapepala aakwingililapo incito. Nupya kwene napefile kuli Yeova ukufuma pansi ya mwenzo. Lyene naile umu kulonda incito. Nanenanga aingizyanga incito ukuti nkulonda ukusenuka muli vino nacitanga mpiti nu kulaomba na ucisinka. Insita zimwi nayanenanga nu kuti nkasambilila Baibo nupya nkulonda ukuya ni miyele isuma. Aingi yakanyile ukunjingizya incito. Lyene pa cisila ica kulondolwela umwi uwingizyanga incito pa viipe vino nacitanga mpiti, wanenyile ati: “Kwene ntamanyile icaticilenga, nomba nkulola kwati mfwile sile ukukwingizya incito.” Naweni ukuti Yeova wasuka mapepo yane. Lino papile insita, mamane nani twizile itubatiziwa nu kuya ya Nte Yakwe Yeova.

Naya nu umi ndakai pa mulandu nu kuomvya ivisinte ivya muli Baibo alino nu kuya ni miyele ino Aina Klistu yalinzile ukukwata. Nakwata ulupwa ulusuma. Nupya ukumanya ukuti Yeova wanjelela, kwangazwa ukuya na kampingu isanguluke.

Pa myaka 14 iyatipita nkaomba maawazi ukufika kuli 70 cila mwezi umu mulimo wa kusimikila ala nkwazwa yauze ukumanya vino Baibo ikasambilizya, nupya mamane nawe kwene wacitandike ukuombela pamwi nani umu mulimo kwene uu. Pa myaka ukucila pali 30 iyatipita, naipakizya ukwazwa antu yano naombanga nayo aali 22 ukutandika ukupepa Yeova. Na ndakai kwene nkaya uku mamaliketi, nomba lyene nsiya umu kwiya wakwe vino nacitanga mpiti. Ndakai lyene nga nayako, ilingi nkanenako yauze pali vino nazumilamo. Nkalonda ukuyapeelako cimwi, kuli kuti upaalilo uwakuti tulikala umu nsi ipya iili nu kuyako likwene umutalaya upuupu.—Masamu 37:10, 11.