Lino naali umwance, ulupwa lwane lwikalanga umupiipi nu ku Leipzig, ku East Germany, kupiipi ni mipaka ya Czech na Polish. Lino naali ni myaka 6, incito ino ya tata yaombanga yalenzile tuye ku mpanga zyuze; twatandikiile ukuya uku Brazil alino itwiza ituya uku Ecuador.

Lino naali ni myaka 14, yantumile ku sukulu lya ku boding’i ku Germany. Pa mulandu wakuti avyazi yane ikalanga ukutali uku South America, natandike ukuisakamala. Natandike ukuitaila sana. Ntisile na mano kuli vino ivicitwa vyane vyakumanga yauze.

Lino nafisizye imyaka 17, avyazi yane yaswiliile ku Germany. Pa kutandika nikalanga nayo. Lelo vino naitaile sana cantaliile sana ukuti natungululwa na avyazi. Lino nafisizye imyaka 18, nafumile pa ng’anda.

Nizile impamviwa sana, nalondanga ukucita ivintu ivicindame umu umi. Pa cisila ca kulola uwikazi upusanepusane nu tuungwe, nizile insininkizya ukuti icintu cisuma sana cino ningacita umu umi wane, u kuzinguluka insi yii yonsi isuma lino antu yatatala yayonona.

Nafumile uku Germany, inkala onda, indungama nu ku Africa. Lelo paatalengile nizile inswilila ku Europe mu kulungisya onda. Paatalengile nizile inja umu mbali yakwe yemba uku mpanga ya Portugal. Nizile inta ukupita na onda intandika ukupita nu wato.

Nizile inja pi umba lya yacance aapekanyanga ukulamba yemba wino yakati Atlantic Ocean nu wato. Api umba kwene lii apano nazanyile nu wali nu kwizaya mamane, Laurie. Twatandikilepo ukuya nu wato uku vilila vya Caribbean. Lyene pa cisila ca kwikala panono umu Puerto Rico, twaswilile uku Europe. Twenekelanga ukuzana uwato uno twali nu kusangula uye umwakwikala. Lelo pa cisila ca kulondelezya panono pa myezi sile itatu, umulimo witu wizile uwimilila ukwaula ukwenekela. Izile iyantwala umwi umba lya yasilika ilya ku German.

Namazile umwaka onga ni myezi itatu mu mulimo wa usilika uku German. Umu nsita kwene iiya, twatwaline na Laurie nupya twaipekinye ukutwalilila nu ulendo witu. Lino kwasyazile panono ukuti ntandike usilika, twakazile uwato ukaomviwa ku kupususizyamo antu. Lino naombanga usilika, twatandike ukusangula uwato uwo pakuti uye uwato unono uwa kupitilamo. Twapekinye ukuti amuno tuce twaikala nu kutwalilila ukuzinguluka insi yii isuma. Apa nsita kwene yii, pa cisila ca kuta ukuomba usilika nomba ala tutatala twamala ukupanga uwato uwo, alino twaloline na ya Nte Yakwe Yeova nupya twatandike ukusambilila Baibo.

Pa kutandika ntamanyile ukuti nalondekwanga ukusenuka sana. Alanga natwala mpiti mama wino nikalanga nawe nupya ala naata nu kupeepa. (Efeso 5:5) Ukulozya ku mapange yano twakweti aakuzinguluka insi yonsi, nelenginye ukuti ukuomvya umi witu ku kulola uumbo wakwe Leza uwa kuzungusya cali icintu cimwi icicindame sana.

Lelo ukulanda sile icumi, nalondekwanga ukusenuka maka maka umu miyele yane. Vino nali sana ni cilumba nupya naitaile, nasintiliile sana pa maka yane na muli vino nacitanga. Nisile sile mano kuli nemwineco.

Wanda umwi, nabelenzile ilyasi lyakwe Yesu ilya pa Mwamba. (Mateo, vipande 5-7) Pa kutandika, ntuvwikisye pali vino Yesu walanzile pali vino umuntu angaya ni nsansa. Wakwe vino Yesu walanzile ukuti ansansa aantu aya ni nzala nu lusala. (Mateo 5:6, Cimambwe New Testament.) Ntaamanyile vino inzala nu lusala vingalenga umuntu ukuya ni nsansa. Vino natwalilile ukusambilila, nizile iniluka ukuti swensi kwene tukalondekwa ukusambilila pali Leza, lelo lino tutatala twasambilila tulinzile ukuicefya nu kuzumila ukuti tukalondekwa ukusambilila. Caya wakwe vino Yesu walanzile ati: “Ansansa aantu aakalondesya vyakwe Leza.”—Mateo 5:3.

Pa cisila ca kutandika ukusambilila Baibo uku Germany, Laurie nani twizile itukukila uku France, nupya pa cisila twizile ituya uku Italy. Konsi kuno twayanga twazananga ya Nte Yakwe Yeova. Natemilwe sana ukulola vino ya Nte yatemwana na vino yakaombela pamwi. Naweni ukuti umu cumi ya Nte Yakwe Yeova yaya ulupwa longa umu nsi yonsi. (Yoani 13:34, 35) Umu kuya kwa nsita, Laurie nani twabatiziwe nu kuya ya Nte Yakwe Yeova.

Pa cisila ca kubatiziwa, natwalilile ukusenuka umu miyele. Laurie nani twapingwilepo ukupita nu wato mu mbali yakwe Africa alino tulambe yemba wa Atlantic Ocean ukuya uku United States. Vino twali sile sweili pa manzi umu kawato kanono ala konsi kuno twalola kuli manzi yatupu, alino nilwike ukuti nene munono sana ngu kundinganya kuli Kaumba witu umukalamba. Vino nakweti insita ikalamba, naiomvyanga umu kubelenga Baibo. Nakomeleziwe sana na malyasi aakalanda pa umi wakwe Yesu lino wali pano nsi. Yesu wali umuntu umumalilike uwakweti sana maka ukucila icintu icili consi cino ningelenganyapo, lelo atalondanga ukuti antu yamusumbako sana mano. Atiikanga amano uku mwineco, lelo wikanga mano kuli Isi wa kwi yulu.

Lino nelenginye sana pali vino Yesu wacitanga, naweni ukuti nalondekwanga ukukolezya Uwene wakwe Leza umu umi wane ukucila ukwika amano ku vintu ivipusanepusane cino nalondanga ukucita. (Mateo 6:33) Lino Laurie nani twafisile uku United States, twapingwilepo ukwikala kuuku kwene nu kwika mano uku kuombela Leza

Mpiti lino naitaile sana, ilingi natwisikanga pali vino napingulapo. Lelo ndakai nkatungululwa na mano aya muli Baibo. (Ezaya 48:17, 18) Nupya namanya cino nayelako ukucila vino nali mpiti, kuli kuti ukupepa Leza nu kwazwa yauze ukusambilila pali aliwe.

Ukuomvya ivisinte ivyaya muli Baibo, kwalenga Laurie nani twauvwana sana umu cupo citu. Nupya twapaalwa pa kukwata umwana umukazyana umusuma, uwamanya Yeova nu kumutemwa.

Cisikupiliula ukuti ivintu vikaya ningo lyonsi umu umi witu. Lelo pa mulandu wakuti Yeova akatwazwa, tukalonda ukutwalilila ukumuombela ukwaula ukuta nu kutwalilila ukumutaila.—Mapinda 3:5, 6.