Tukasambilila Pali Leza Kuli ya Kasesema
Mpiti, Leza wanenanga ya kasesema amazwi acindame akunena antu. Uzye amazwi yayo yangalanga vino tungacita pakuti Leza atupaale? Ee. Lekini tulole vino tungasambilila kuli ya kasesema yatatu acisinka.
ABULAAMU
Leza ataya na kapatulula nupya akalonda ukupaala antu yonsi.
Leza walavile kasesema Abulaamu ukuti “munuli ndapolelela inko zyonsi.”—Utandiko 12:3.
I vyani vino tukusambililako? Leza watutemwa sana nupya akalonda ukupolelela antu yonsi aakamuvwila kuli kuti aonsi, anaci na ana
MOSE
Leza wakwata uluse nupya akapaala yonsi aakaezya na maka ukulonda ukumumanya.
Leza wa maka yonsi wapeezile kasesema Mose amaka ya kucita ivizungusyo. Nomba Mose wapefile ukuti: “Nkukulenga kuti ndi ukazangila munondi undangilile nzila zyako pakuti ntwalilile kukutumikila nu kukuzanzya.” (Kufuma 33:13) Leza watemilwe sana pali vino Mose walenzile nupya wamupeezile amano aakumanya inzila zyakwe ni miyele. Mose wasambilile ukuti Kaumba a “Leza wa luse na mizu.”—Kufuma 34:6, 7.
I vyani vino tukusambililako? Leza akalonda ukutupaala swensi aonsi, anaci na ana ndi cakuti tukwezya na maka ukumumanya ningo. Watulanga umu Malembelo ya Muzilo vino tulinzile ukumupepa na vino akalondesya ukutupaala.
YESU
Yesu wapozyanga indwala zya misango yonsi
Tungaipakizya mapaalo yakwe Leza aamanda pee nga tukusambilila pali Yesu, vino wacitanga na vino wasambilizyanga.
Tungasambilila ivingi umwi Izwi Lyakwe Leza pali vino Yesu wacisile na vino wasambilizyanga. Leza wapeezile Yesu amaka ya kucita ivizungusyo ivingi wakwe kulenga impafu ukulola, ya cipuuli ukutandika ukuvwa, nu kupozya alemale. Watuutululanga na afwe. Fwandi Yesu walangilile amapaalo yano Leza alaletela antu uku nkoleelo. Walondolwile vino swensi cila muntu tungacita pakuti tukapokelele mapaalo yayo, watiile: “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.”—Yoane 17:3.
Yesu wali nu luse, wasakamalanga antu nupya wali ni cikuuku. Aonsi na anaci, ance na ikolo yayanga kuli aliwe ku kuvwa ulwamo lwakuti: “Musambilile kunondi, pano nene wa mutembo, nupya nkaicefya mu mwenzo, nga mumazana upuzo mu myenzo inu.” (Mateo 11:29) Yesu wapusineko na antu yauze aacuzyanga anaci pa nsita iya, lelo wene wayalanganga icikuuku nupya wayacindike.
I vyani vino tukusambililako? Yesu walangilile vino watemilwe sana antu, nupya watulangilile vino tulinzile ukucitila antu yauze.
YESU ASI LEZA
Malembelo ya Muzilo yakalanda ukuti “twakwata Leza wenga sile” nu kuti Yesu Klistu wali sile intumi yakwe Leza iicefye. (1 Kolinto 8:6) Yesu walanzile umwineco ukuti Leza wakwata amaka ukumucila nu kuti aliwe wamutumile pano nsi.—Yoane 11:41, 42; 14:28. *
^ pala. 17 Pakuti musambilile na vyuze pali Yesu Klistu, lolini isambililo 4 na 5 mwi buku lyakuti Uzye Baibo Ikatusambilizya Vyani? ilyaya pa www.pr418.com.
