Vino Tungacita Pakuti Twaazwa Yano Yakacula Ukundwala Izya mu Melenganyo
BAIBO IKATI: “Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?”—MAPINDA 17:17.
Vino Cikupiliula
Limwi tungayuvwa ukuti pasi vino tungacita ndi cakuti cuza witu akucula uku ulwale uwa mu melenganyo. Nomba tungalanga ukuti twasakamala cuza witu ndi cakuti tukumwazwa ukuzizimizya intazi ino wakwata. Tungacita uli vivyo?
Vino Tungazwa Aakacula Uku Ulwele Uwa mu Melenganyo
‘Mwauvwa zuwa.’Kambokosi pifwa—YAKOBO 1:19.
Inzila yonga ino mungazwilamo cuza winu u kukutika lino akulanda. Mutaelenganya ukuti mulinzile ukulandapo muli vyonsi vino akulanda. Mwaleka amanya ukuti mukukutika nupya imwikako amano. Cisinka cino mulinzile ukumanya icakuti, mutalinzile ukumupingula nupya mulinzile ukwika mano kuli vino akuyuvwa. Mwaiusya ukuti limwi angalanda amazwi yano atalalinzile ukulanda aakuti aiza alanguluka na pa cisila.—Yobo 6:2, 3.
“Mwateekezya.”—1 TESALONIKA 5:14.
Cuza winu limwi aangasakamikwa, nanti limwi aangayuvwa ukuti uwa sile sile. Nomba ndi cakuti mu kumulanga ukuti imumusakamala, cingalenga ukuti ateekeziwe nu kukomeleziwa, nanti cakuti mutamanyile ivya kulanda.
“Cuza, umukundwe insita ili yonsi.”—MAPINDA 17:17.
Mwaazwa ya cuza inu. Ukucila ukulaelenganya ukuti imumanya vino mungayazwa, mwayuzyako pakuti yangamunena. Ndi cakuti cikutalila cuza winu ukuminena vino akulonda, mwaezya ukucitila pamwi nawe vimwi, ivili wakwe ukuya umukutandala, ukuya umukukalila pamwi ivintu, ukuzifya nanti ukumwazwa imilimo yuze.—Galatiya 6:2.
“Mwateekelela antu.”—1 TESALONIKA 5:14.
Asi lyonsi lino cuza winu angaipekanya ukuminena vino akuyuvwa. Mungamunena ukuti imuipekanya ukukutika ndi cakuti walonda ukuti amulondolwele. Pa mulandu nu ulwale, limwi cuza winu angalanda nanti ukucita ivintu ivingamisosya. Limwi angakana ukucita vimwi vino mwapangine ukuti mucitile pamwi nanti sile ukumisokela. Mwateekela nupya mwamuvwikisya lino mu kumwavwa muli vino akulondekwa.—Mapinda 18:24.
Kutungilila Cuza Winu Kungamwazwa
“Nkasininkizya ukuti naya cuza uno angalanda nawe insita zyonsi. Nanti cakuti pasi vino ningacita pakuti imale intazi ino wakwata, nkaezya na maka ukukutika kuli vino akulonda ukulanda. Insita zimwi cino akalondekwa u kukutika kuli aliwe pakuti auvwe ningo.”—Ya Farrah, a yano cuza wao akacula uku masakamika nu kuvwa sana ulanda ivikalenga yavilwa nu kulya.
“Cuza wane umwi waya sana ni cikuuku nupya akankomelezya. Wangamile uku ng’anda ukwakwe kuti tukalile capamwi ivyakulya ivisuma. Wali sana nu kutemwa kuli nene na cico calenzile munene vino nayuvwanga. Nakomeleziwe sana!”—Ya Ha-eun, alwala ulwale uwakuvwa sana ulanda.
“Ukuteeka umwenzo kwacindama sana. Ndi cakuti mamane wacita vimwi ivyakunsosya, nkaiusya ukuti ulwale wakwe uwati ulenga acite vivyo. Cii cikangazwa ukukanasoka nu kuya ni cikuuku kuli aliwe.”—Ya Jacob, yano aci yao yakucula uku ulwale uwakuvwa sana ulanda.
“Mamane akantungilila nu kunkomelezya sana. Ndi cakuti nasakamikwa sana, asimpatikizya ukucita ivintu vino nsikulonda ukucita. Nupya insita zimwi asicita ivintu vino angatemwa ukuti acite. Wacindama sana kuli nene pa mulandu wakuti waya na ukapekape nupya ataitemwa.”—Ya Enrico, aakacula uku ulwale wakusakamala.
a Asi mazina yao acumi cumi.
Limwi Mungatemwa Ukulolako na Vii
MAVIDYO YAKWE TUKADOLI TWAKULENGA
Uzye Cuza wa Cumi Waya Uli?
Ya cuza ya ufi yatatala ukuzana, nomba uzye ungacita uli pakuti uzane cuza wa cumi?
PALI SWESWE
Leengini Ukuti ya Nte Yakwe Yeova Yakamutandalile
Mukalanzyanye ivya muli Baibo na ya Nte Yakwe Yeova, nanti mukeezyeko ukusambilila Baibo ukuomvya inzila ino twatantika.
