Ncina Isalau yo Umwene, ninaaca nipuro nintaphuleliya myaha co Umwene wa Nluku—mwaha Yesu waatepaawe wuuluma ukati waalalyeeraawe.—Luka 8:1.

Ankhala mapuro answaaleliya Nluku niinanna yeekhweeli. Isalau co Umwene ankhala mapuro Masaahiti a Yehova antthonkomanihaaya nteko woolalyeera ihapari comaana co Umwene wancokoni. (Matewus 24:14) Isalau co Umwene cinaavirikana moonuwelo ni matekeliyo, masi cotheene nnyo cinkhala inupa coohitepa ureera awula coohitepa wunnuwa, ni mapuro makiina nsalawuni imoca paasi pooti maloko meeli awula mararu upanka mikutthaano caya. Nlattu wo winciva maloko eekristau, myaakha civinre (napankelaka ikontha isalau 5 khula nihuku) nihoteka Isalau co Umwene imiliyau cene. Ninooryaaniha cani?—Matewus 19:26.

Cimpankiya ni micanko coopheela utekeliya paasi Isalau co Umwene. Nnyo micankonnyo, cinveleelihiya u Peteli wiira maloko akhalane nsurukhu woohala utekela awula ulokihacera Isalau.

Cintekiya ni mayowiivaherera oohipheela upokerihiya okhula ikhapila. Ilapo cinci, cihotthenkaciya Ikhurupu ca Anamatekateka Isalau co Umwene. Ikhurupu ca anamatekateka ni mayowiivaherera, anaavira mmalokoni amphwanyannya ilapo iryaaya, hataa maloko oottayi, wiira akavihere uteka Isalau co Umwene. Ilapo cikhwaawe, Masaahiti a Yehova oocuwelaca awula ookhitiri utekatekaca anaathanliya wiira ahoolele utekiya ni ulokihaciya Isalau co Umwene co wanttettheni. Khula nipuro nintekiya isalau, atthu owoorya cinene uvara ntekooyo ankhala uyo ncokooyo anawiivaherera ukavihera, masi mayamunna o wanlokoni antekeliya isalau phintepa uvara nteko mwinci. Nnepa wootteela wa Yehova ni wiikurumica weekhweeli waapoovwaawe phimpankiha wiirannya iyo.—Isaalimu 127:1; Akolosu 3:23.

• Kontha isiyani mapuro ninthukumaneehu wiira ninswalele Nluku aneehaniyaaya Isalau co Umwene?

• Isiyani inkavihera utekiya Isalau co Umwene nlaponi motheene?