29 MEY 2023 | VAOVAO FARANY: 3 MEY 2024
ROSIA

VAOVAO FARANY: VOAHELOKA IREO RAHALAHY | Manampy ny Rahalahintsika Hiaritra Fanenjehana ny Torolalan’ny Baiboly

HANDEFA

Nomelohin’ny Fitsaram-paritr’i Pozharski any amin’ny Faritanin’i Primorié ny Rahalahy Nikolay Dikhtyar, Andrey Lyakhov, Yuriy Ponomarenko, ary Oleg Sergeyev, tamin’ny 2 Mey 2024. Sazy mihantona roa taona sy tapany no azon’i Nikolay, roa taona sy valo volana ny an’i Andrey, enin-taona sy tapany ny an’i Yuriy, ary enin-taona sy efa-bolana ny an’i Oleg. Tsy mbola naiditra am-ponja aloha ry zareo izao.

Ireo voampanga

Nikolay Dikhtyar

Teraka: 1954 (Ukraine)

Mombamomba azy: Injeniera manamboatra fitaovana fanafanana sy fampangatsiahana

Resy lahatra hoe marina ny zavatra resahin’ny Baiboly rehefa nahita hoe tanteraka amin’izao ny faminanian’ny Baiboly. Natao batisa tamin’ny 1998, dia lasa Vavolombelon’i Jehovah

Resadresaka nifanaovana taminy

Inona no manampy anao amin’izao zavatra iainanao izao?

Tsy gaga aho rehefa nanomboka ny fanenjehana teto Rosia. Fantatro hoe tsy azo ialana ny fanenjehana sy ny olana, dia ny niomana no zavatra tsara indrindra azoko natao. (2 Timoty 3:12) Mampahery anay amin’ny alalan’ny Baiboly ny fandaminan’i Jehovah, dia ny rahalahy sy anabavy koa mivavaka ho anay. Mahatsapa foana aho hoe eo akaikiko eo i Jehovah sy Jesosy, dia manome hery ahy sy manampy ahy hanam-paharetana.

Andrey Lyakhov

Teraka: 1978 (Voznesenka, Faritanin’i Primorié)

Mombamomba azy: Mpanamboatra ny faritra anatiny amin’ny trano

Nisy Vavolombelon’i Jehovah nitory taminy tamin’ny 2014. Resy lahatra hoe nahita ny fahamarinana rehefa hitany tao amin’ny Baiboly ny valin’ny fanontaniany. Natao batisa tamin’ny 2016

Resadresaka nifanaovana taminy

Inona no nanampy anao hanana finoana matanjaka foana?

Raha vao kivy aho dia lasa manahy be sady mora milavo lefona. Dia fantatro hoe raha te ho falifaly foana aho, dia mila manompo be mihoatra noho ny taloha. Mampirisika antsika i Jesosy ao amin’ny Matio 6:33 hoe ‘katsaho foana aloha ilay Fanjakana.’ Manampy ahy hifantoka amin’ny zavatra ara-panahy foana ny misaintsaina an’io teniny io. Miezaka mitadidy foana koa aho hoe na inona na inona olana mitranga, dia hanampy ahy hiatrika an’ilay izy i Jehovah. Dia tsy misy antony tokony hahakivy sy hampanahy be ahy mihitsy izany ny momba ny hoe inona no mety hitranga na tsy hitranga.

Oleg Sergeyev

Teraka: 1984 (Vladivostok, Faritanin’i Primorié)

Mombamomba azy: Elektrisianina

Lasa Vavolombelon’i Jehovah ny ray aman-dreniny tamin’izy tanora. Nianatra Baiboly samirery dia resy lahatra hoe nahita ny fahamarinana. Natao batisa tamin’ny 1999

Nanambady an’i Anastasiya tamin’ny 2010. Manan-janaka telo izy mivady

Resadresaka nifanaovana taminy

Inona ny torolalan’ny Baiboly tena nanampy anao?

Nisaintsaina ny zavatra notenenin’i Jesosy ao amin’ny Lioka 12:25, 26 aho, ilay hoe: “Iza aminareo no mahay manalava ny androm-piainany, na dia kely aza, rehefa manahy? Koa raha izany zavatra kely izany aza tsy hainareo, maninona ianareo no manahy ny amin’ny zavatra hafa?” Nampahatsiahy ahy io andininy io hoe rehefa mitady hanahy be loatra aho, dia tokony hiteny hoe: ‘Aoka izay!’ fa tsy hijanona amin’izao fotsiny. Misy zavatra sasany mantsy tsy azoko ovana. Ny zavatra tsara indrindra azoko atao dia ny mianatra miaritra an’izay zavatra vaovao mitranga eo sy mianatra miantehitra kokoa amin’i Jehovah.

Fantatsika fa “ho ampy fitaovana tsara hanaovana ny asa tsara rehetra” hoatran’i Andrey, Nikolay, Oleg, ary Yuriy isika, rehefa mampihatra ny torolalan’ny Baiboly eo amin’ny fiainantsika.—2 Timoty 3:16, 17.

Zava-nitranga

16 Jolay 2021

Nanomboka nanao famotorana an’i Yuriy ny manam-pahefana. Voarohirohy ho nandamina fandaharana ho an’ny fikambanana iray mampidi-doza izy
22 Jolay 2021

Nosavana ny tranon’i Yuriy
24 Jolay 2021

Tsy navela hanao dia lavitra i Yuriy
1 Novambra 2021

Nosavana ny tranon’i Oleg
2 Novambra 2021

Tsy navela hanao dia lavitra i Oleg
12 Febroary 2022

Nampangaina ho mpanao heloka bevava koa i Oleg
14 Martsa 2022

Nampangaina ho mpanao heloka bevava koa i Nikolay
15 Martsa 2022

Nampangaina ho mpanao heloka bevava koa i Andrey
10 Aogositra 2022

Nanomboka ny fitsarana

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO