Wanay Jehovata famíliata yako, jume átchayrimet eyʼyak usim am suáyanake bechïbo (Colosenses 3:20). Átchaytaka, empo ájaria en uʼusim maxtiánake Jehovátam náknake éntok tü géntemtunake bechïbo (2 Timoteo 1:5; 3:15). Éntok ket, ákea jünepo yumala jiápsipo jita bem jípurewi. Júnel bechïbo, jú ejemplo en am mákawi tüysi béxresi machi ame bechïbo. Jú chë tüysi en uʼusim Liosta Noki bétana am maxtiá barëteko bache empo en jiápsipo a jípuna (Salmo 40:8).

BÍBLIATA NOKÄWI: “Tüisi jíkkaij báreka éenake, kaa läuti nok yómmia báreka éenake” (Santiago 1:19). Tüysi türi ke en usim émomak nokbánake. Te wa bechïbo, empo ket am bitʼtebonake ke an jikʼkaix bánake jiba a wátiateko. Yanti jiápsite wetua ke tüysim énake émomak nok bechïbo (Santiago 3:18). Si bempo tüysi emo buysu máchiley, jámak ka enchim texwa bánake. Yanti jiápsee wanay júbune am texwa tüysi en am nákewi (Mateo 3:17; 1 Corintios 8:1).

JITA ARA EN YANAKËWI:

• Tiémpote emo makʼka en uʼusim émomak nok barëteko

• Júbune en usimʼmak etʼtexwa, ka problémam wéteko jibʼba

BÍBLIATA NOKÄWI: “Jú jabe jítapo jüniamta bitʼteboko tüwata téwnake” (Proverbios 16:20). Jámak weyo jume nókim ka jíbatuna a june bechïbo jáchisum emo inʼnea. Jume jubua yötume lemáxpom buéwrusi a jojoá o jítam nonoka ka júnel a iako junʼne. “Jabe jita yómiako ketune ke a jikʼkajako, juʼu tiwsi machi” (Proverbios 18:13). Júneli kate lawti oʼomte (Proverbios 19:11).

JITA ARA EN YANAKËWI:

• Utʼtiate yawʼwa ka en usita nok yätua bechïbo éntok kate maxwe jita émow nokaw bétana, jita junʼne émow nokäteko

• Awe wate jachin en inʼneawi éntok jítase béxresi bítchay a bénasi wasúkteyo

BÍBLIATA NOKÄWI: “Ákea jikʼkaja, in usi, juka en átchayta émow nokäwi, éntok en ayʼye nésawta ka tojʼja” (Proverbios 1:8). Jehová usimʼmechi juka átchayta éntok áyerita nésawta an makla. Bempo woyika bem usim maxtiánake yöriwamta éntok nésawta am yánake bechïbo (Efesios 6:1-3). Bempo ámechim susuá jume átchayrim ka “nanabeu aneka [...] huepulsi eaka” (1 Corintios 1:10). Júnel bechïbo, ka jita nanabew iáteko, kátem enchim uʼusim púxbapo nanasʼsua, buéytuk jámak yöriwamta enchimʼmet tärunake.

JITA ARA EN YANAKËWI:

• Nanabéwem eyʼya enchim usimʼmew nok bechïbo

• Si ka en kuna o en jubi bénasi eáteko jáchim en uʼusim maxtiánake, ache suuwa jatchiasu júnel eyʼya ía bétana

BÍBLIATA NOKÄWI: “Juka jubua yötume maxtiá juka boʼota a nünake bechïbo” (Proverbios 22:6). Tülisi émow a we iáteko en usim maxtiako, kate kiela tojʼja. Tüyse at eyʼya jáchise en usita maxtiánake éntok jáchise kusisi aw noknake (Salmo 127:4; Proverbios 29:17). Kusisi aw nokäteko ka jiba a bépsunake, jú júnel jiawbäre an junetua bechïbo jatchiákate jita am taktáktiria (Proverbios 28:7). Ákeam maxtiá Liosta Nokítam náknake bechïbo éntok princípiom ama wëmem ámet junénake bechïbo (Salmo 1:2). Júnelim tü conciénciatam jípunake (Hebreos 5:14).

JITA ARA EN YANAKËWI:

• Utʼtiate yawʼwa en usim Liosta amigo ara at eame bénasi a bítnake bechïbo

• Juka ka tüwata ka an yanakëwi ákeam aniá ámet junénake éntok ka am yánake bechïbo, internetpo yew sisímeme bétana. Ákeam maxtiá jume géntem kökosi am yä báreka bétana ka am mabétnake ka tüysi éame bechïbo