Bann inzenier pe rod fer bann lekipman pou ed bann dokter fer bann loperasion konplike. Sa pou kapav permet zot fer bann loperasion san ki zot bizin koup enn pasian tro boukou. Kan zot inn etidie lapat enn ourit, ki extra flexib, zot finn kapav devlop enn nouvo teknik.

 Reflesi lor la: Enn ourit kapav trap, tini, ek ser bann kitsoz avek so bann lapat ki flexib ek ki kapav vinn pli long, mem dan bann ti lespas. Enn ourit kapav tourn so lapat dan ninport ki direksion me li kapav osi redi sertin parti so bann lapat kan bizin.

 Bann siantis krwar ki parey kouma lapat enn ourit, enn lebra robo ki mou ek flexib pou permet fer bann loperasion san ki bizin koup enn pasian tro boukou. Sa kalite lekipman-la pou kapav permet oper enn pasian ki normalman ti pou bizin fer bann loperasion boukou pli konplike.

 Gete kouma lapat enn ourit bien flexib

 Bann siantis inn fer enn lebra robo koumsa ek zot pe teste li dan bann fos loperasion. Lebra-la fer 135 milimet (5 pous) ek li kapav lev ek tini bann organn andan enn lekor san ki li andomaz zot, pandan ki enn lot lebra sa robo-la pe fer loperasion-la. Dr. Tommaso Ranzani, enn manb sa lekip ki’nn travay lor sa lekipman-la dir: “Nou krwar ki sa sistem-la, li zis enn koumansman ek pou ena bann nouvo version ki pli bon avek bann opsion pli sofistike.”

 Ki ou panse? Eski lapat enn ourit inn aparet par limem? Ouswa eski inn kree sa?