Faraon ti fer enn move rev ki ti pe fatig li. Liv Zenez montre ki akoz sa li ti demann so bann serviter pou degaze amenn Zozef, enn prizonie Ebre, pou interpret so rev. Sa fer plizir lane ki Zozef ti dan prizon. Mem si lord Faraon ti irzan, Zozef ti pran letan pou raz li. (Zenez 39:20-23; 41:1, 14) Sa detay-la paret pena enn gran linportans. Selman, parski ekrivin liv Zenez inn mansionn sa, sa montre li ti bien konn koutim bann Ezipsien.

Dan lepase, bann misie dan boukou nasion ti les zot labarb pouse. Bann Ebre osi ti fer parey. Selman, enn ansiklopedi (McClintock and Strong’s Cyclopedia of Biblical, Theological, and Ecclesiastical Literature) dir ki “dan lepase, Lezip ti sel nasion oriantal ki ti defann bann misie gard labarb.”

Eski bann misie ti bizin raz zis zot labarb? Magazinn Biblical Archaeology Review dir ki dapre sertin koutim relizie bann Ezipsien, kan enn misie ti al devan Faraon, li ti bizin prepar li koumadir li pe al dan tanp. Dan sa ka-la, Zozef ti bizin raz net so latet ek so lekor.

Pa neseserman. Dan so bann let, parfwa lapot Pol ti apel bann dimounn ki pa Zwif bann Grek ouswa Héllênés. Koumadir pou li, tou bann ki pa ti Zwif ti Grek. (Romin 1:16; 10:12) Kifer? Enn rezon se parski dan bann landrwa kot Pol ti prese bann dimounn ti adopte lang ek kiltir Grek.

Dan lepase kisannla bann dimounn ti konsider kouma Grek? Dan katriem siek Avan Nou Lepok, Isocrate, enn orater ki res Atenn, ti koz avek fierte lor fason ki kiltir Grek ti pe fane partou dan lemond. Li ti dir ki rezilta sa finn ena: “Se pa bann ki’nn ne Lagres ki apel Grek, me plito bann ki’nn tir profi ar nou ledikasion.” Alor li posib, mem si nou pa sir, ki papa Timote ek lezot ki Pol apel Grek pa’nn ne dan Lagres me zot inn adopte kiltir Grek.​—Zistwar Bann Apot 16:1.