ZOZEF pe mars dan enn koulwar bien nwar. Li travay dir ek li pe transpire dan enn saler terib. Deor, soley pe tap for lor Lezip, ek prizon kot Zozef ete inn vinn koumadir enn four. Parfwa Zozef ena linpresion ki li konn tou ti blok ek tou miray ki krake dan sa landrwa-la. Sa ti so liniver. Dimounn bien respekte li isi. Me kanmem sa, li enn prizonie.

Pena dout ki souvan li repans lor so lavi ki li ti ena avan dan bann kolinn dan Ebronn. Laba, li ti enn gardien mouton pou Zakob, so papa. Li ti ena anviron 17 an kan Zakob ti avoy li pou al fer enn travay lwin ar zot lakaz. Li nepli ena sa liberte-la aster. Bann frer Zozef ti bien zalou li. Telman zot ti ena laenn pou li, zot finn vann li kouma esklav. Lerla bann dimounn ki’nn aste Zozef finn amenn li dan Lezip. Laba, li ti servi dan lakaz Potifar, enn ofisie Ezipsien ki ti fer li bien konfians. Me enn zour, fam Potifar ti met enn fos akizasion viol lor Zozef, ek akoz sa li dan prizon zordi. a​—Zenez sapit 37 ek 39.

Zozef ena 28 an ek sa fer preske 10 an ki li esklav ek prizonie. Sa pa vremem lavi ki li ti panse li pou ena. Eski li pou gagn so liberte enn zour? Eski enn zour li pou retrouv so papa ki pe vinn vie? Eski li pou retrouv Binzamin, so ti frer ki li bien kontan? Komie letan ankor li pou res dan prizon?

Eski ou finn deza ena mem santiman ki Zozef? Parfwa nou lavi pran enn direksion ki nou pa ti panse kan nou ti zenn. Kitfwa bann sitiasion difisil kapav paret koumadir zame pou fini, ek li kapav paret difisil pou trouv enn semin sorti ouswa pou kone kouma pou andire. Anou gete seki nou kapav aprann ar lafwa Zozef.

Zozef kone ki so Bondie, Zeova, zame pa finn bliye li, ek sa lide-la sirman inn ed li pou andire. Mem dan enn lot pei, ziska dan prizon, Zeova finn trouv bann fason pou beni Zozef. Labib dir: “Zeova ti kontign res avek Zozef, ek Li ti kontign manifeste lamour fidel anver li ek Li’nn fer li gagn faver devan lizie sef ofisie prizon.” (Zenez 39:21-23) Touletan Zozef travay bien dir. Akoz sa, Bondie ti ena bann bon rezon pou beni li. Sirman sa ti bien ankouraz li pou kone ki Zeova ti touletan avek li!

Eski Zeova ti pou les Zozef dan prizon pou touletan? Zozef ti zis kapav fer bann sipozision, ek sirman li ti koz sa avek Zeova dan lapriyer. Parey kouma sa arive souvan, repons ki li pou gagne pou vinn dan enn fason ki li pa atann. Enn zour, de nouvo prizonie vinn dan prizon. Toule-de ti travay personelman pou Faraon. Enn ti sef boulanze, ek lot-la ti sef bann ki servi divin.​—Zenez 40:1-3.

Sef bann gard prizon konfie Zozef pou pran an-sarz sa de zom ki ti ena bann gran pozision  la. b Enn swar, sa de zom-la fer bann rev bizar. Kan Zozef trouv zot gramatin, li rann li kont ki ena kitsoz pa normal. Li demann zot: “Kifer zot figir tris zordi?” (Zenez 40:3-7) Kitfwa zantiyes ki Zozef ena finn met sa de zom-la alez pou rakont seki pe fatig zot. Zozef pa ti kone, me sa konversasion-la ti pou sanz so lavi. Me, eski ti pou ena sa konversasion-la si Zozef pa ti interes li avek lezot? So latitid kitfwa fer nou demann noumem: ‘Eski mo montre mo lafwa dan Bondie kan mo interes mwa avek lezot?’

Sa de zom-la explik Zozef ki zot bann rev ti pe bien fatig zot, ek anplis pena personn pou interpret sa pou zot. Sa lepok-la, bann Ezipsien ti donn enn gran linportans bann rev ek ti kont boukou lor bann swadizan interpret. Me sa de zom-la pa ti kone ki se Zeova, Bondie ki Zozef adore, ki ti fer zot fer sa bann rev-la. Me Zozef ti kone. Li ti rasir zot: “Eski se pa Bondie ki interpret bann rev? Silvouple, rakont mwa zot rev.” (Zenez 40:8) Bann parol ki Zozef ti dir zot, ankor inportan pou bann etidian Labib ki sinser. Domaz ki pa tou dimounn relizie ki montre mem limilite! Nou bizin dispoze pou rezet bann rezonnman imin ki montre lorgey. Okontrer nou bizin kont lor Bondie pou konpran bien seki so parol dir vremem.​—1 Tesalonisien 2:13; Zak 4:6.

Sef bann ki servi divin rakont pou li an premie. Li dir Zozef ki li’nn rev enn pie rezin ki ti ena trwa brans kot ti ena bann grap rezin. Bann rezin inn mir, ek sef bann ki servi divin ti pers rezin ek ti vers zi-la dan koup Faraon. Gras-a Zeova, Zozef konpran deswit seki sa rev-la vedir. Li dir sa misie-la ki trwa brans vedir trwa zour; dan trwa zour, Faraon pou fer li regagn so plas. Sa misie-la soulaze ek kapav trouv sa lor so figir! Lerla Zozef demann li enn kitsoz: “Silteple, to bizin montre to lamour fidel anver mwa, ek koz mwa ar Faraon.” Zozef rakonte kouma finn tir li dan so pei ek kouma li’nn al dan prizon dan enn fason inzis.​—Zenez 40:9-15.

Kan sef boulanze tann bon nouvel pou sef bann ki servi divin, li demann Zozef pou interpret so rev. Dan so rev li ti trouv trwa panie dipin. Enn parmi sa bann panie-la ti lor so latet, ek bann zwazo ti pe manz ladan. Zeova fer Zozef konn lexplikasion pou sa rev-la osi. Me sa pa ti enn bon nouvel pou sef boulanze-la. Zozef dir: “Ala so interpretasion: trwa panie reprezant trwa zour. Dan trwa zour, Faraon pou sot to likou ek pou pandi twa lor enn poto, ek  bann zwazo pou manz to laser.” (Zenez 40:16-19) Parey kouma tou bann serviter ki fidel anver Bondie, Zozef ti anons bann mesaz Bondie avek kouraz​—bann bon nouvel ouswa bann nouvel lor enn zizman ki pre pou vini.​—Izai 61:2.

Trwa zour apre, bann parol Zozef realize. Faraon fer so laniverser​—enn fet ki bann serviter Bondie pa ti fer dan lepok Biblik​—ek li anons so zizman lor so de serviter. Parey kouma Zozef ti dir, sef boulanze-la perdi so lavi, alor ki sef bann ki servi divin regagn so plas. Me malerezman, sa zom-la neglizan ek li bliye Zozef.​—Zenez 40:20-23.

De-z-an pase. (Zenez 41:1) Mazine ki kantite Zozef dekouraze! Kitfwa li ti ena boukou lespwar apre ki Zeova inn permet li konpran bann rev sef bann ki servi divin ek sef boulanze. Li posib ki toule gramatin li leve avek lespwar ki li kapav libere pandan lazourne. Me nanye pa arive ek li kontign res dan sa prizon-la. Kitfwa sa de lane ki’nn pase la ti bann lane ki ti pli difisil dan so lavi. Me, touletan li finn gard so konfians dan so Bondie, Zeova. Olie li dezespere, Zozef determine pou andire, ek sorti dan sa leprev-la ankor pli for ki avan.​—Zak 1:4.

Dan lepok difisil ki nou pe viv, nou tou nou bizin fer nou landirans vinn pli for. Pou ki nou kapav fer fas ar bann leprev ki ena dan lavi, nou bizin ena determinasion, pasians, ek lape dan noumem ki zis Zeova kapav donn nou. Parey kouma Li’nn fer pou Zozef, li kapav ed nou pou konbat dekourazman ek ed nou pou gard enn lesperans solid.​—Romin 12:12; 15:13.

Kitfwa sef bann ki servi divin inn bliye Zozef, me Zeova zame finn bliye li. Enn swar, Li fer Faraon fer de rev extraordiner. Dan premie rev, lerwa trouv set zoli vas bien gro ki sorti dan larivier Nil ek deryer zot ti ena set vas bien vilin ek bien meg. Bann vas meg manz bann gro-la. Plitar Faraon fer enn deziem rev. Li trouv set zepi dible ki bien zoli pe pouse lor enn brans. Me set lezot zepi dible ki seti ek ki’nn sek akoz divan, pouse ek devor bann zoli zepi-la. Kan Faraon leve gramatin, li bien trouble akoz so bann rev. Li fer apel tou bann zom saz ek bann pret-mazisien ki ena dan pei pou interpret so bann rev. Me personn pa reisi. (Zenez 41:1-8) Eski sa bann zom-la ti gagn sok? Eski zot ti ena enn kantite interpretasion ek zot pa ti dakor ant zot? Nou pa kone. Me sa pa ed Faraon. Li ankor pli dezespere pou konpran sinifikasion so bann rev.

Finalman, sa sef ki servi divin la rapel Zozef! So konsians inn travay li, ek li rakont Faraon kouma de-z-an avan, enn prizonie spesial ti bien interpret so rev ek rev sef boulanze. Deswit, Faraon fer apel Zozef.​—Zenez 41:9-13.

Mazinn seki Zozef resanti kan bann mesaze dir li ki li bizin al devan Faraon. Li degaze sanz so linz ek li raze. (Sirman li raz so latet akoz koutim bann Ezipsien.) Pena dout ki li sipliye Zeova pou Li beni so konversasion avek lerwa! Bien vit li ariv devan lerwa dan lakour grandioz pale rwayal. Labib dir: “Lerla Faraon ti dir Zozef: ‘Mo’nn fer enn rev, me pena personn ki kapav interpret sa. Me mo’nn tann dir ki twa, to kapav ekout enn rev ek interpret li.’” Ankor enn fwa, repons ki Zozef done, montre so limilite ek so lafwa dan so Bondie: “Se pa mwa ki inportan! Bondie pou dir Faraon seki bon pou li.”​—Zenez 41:14-16.

Zeova kontan bann dimounn ki ena limilite ek ki fidel. Sa pa etonn nou ki Li fer Zozef konn repons ki bann zom saz ek bann pret Ezipsien pa finn kone. Zozef explike ki toule-de rev Faraon ena mem sinifikasion. Zeova finn repet mesaz-la pou montre ki seki Li’nn deside inn “bien etabli”​—pena okenn dout ki sa pou realize. Bann gro vas ek bann zoli zepi dible reprezant set lane kot pou ena manze an-abondans an Ezip. Bann vas ki meg ek bann zepi dible ki sek reprezant set lane lafaminn ki pou vini apre bann lane labondans. Lafaminn pou fini labondans pei-la.​—Zenez 41:25-32.

 Faraon konpran deswit ki Zozef inn bien interpret so bann rev. Me ki pou fer? Zozef propoz enn plan. Faraon bizin trouv enn dimounn ki alafwa “bon zizman ek saz” pou organiz travay pou stok bann rekolt ki anplis dan bann stor pandan set lane labondans ki pou vini. Sa dimounn-la pou bizin distribie dible kan pou ena lafaminn. (Zenez 41:33-36) Lexperyans ek kapasite ki Zozef ena, fer li bien kalifie pou sa travay-la. Me li pa fer vantar. Akoz so limilite, li inposib pou panse ki Zozef kapav azir koumsa. Sa ti pou initil pou enn dimounn ki ena lafwa kouma li. Si nou ena enn vre lafwa an Zeova, nou pa pou bizin ena lanbision, ni atir atansion lor nou. Avek lespri trankil, nou les tou dan so lame pwisan.

Faraon ek tou so bann serviter finn trouv sazes Zozef dan plan ki li’nn propoze. Lerwa rekonet osi ki sazes Zozef sorti kot so Bondie, Zeova. Lerla lerwa demann so bann serviter dan lakour rwayal: “Eski kapav trouv enn lot zom kouma li, ki ena lespri Bondie?” Li dir Zozef: “Parski Bondie finn fer twa konn tousala, pena personn ki avize ek saz kouma twa. Tomem ki pou an-sarz mo lakaz, ek tou mo pep pou obeir twa dan tou seki to dir. Se zis parski momem lerwa ki mo pou pli gran ki twa.”​—Zenez 41:38-41.

Faraon tini so promes. Li donn Zozef enn linz ki ti fer avek enn bon lin ek li donn li enn kolie an-or, enn bag ki servi pou stanp bann dokiman, ek enn char rwayal. Li donn Zozef lotorite pou al partou dan pei ek pou realiz so plan. (Zenez 41:42-44) Dan enn sel zour, Zozef sorti dan prizon pou al res dan sato. Li leve gramatin kouma enn prizonie malere, ek aswar li al dormi antan ki deziem pli gran personaz Lezip. Wi, Zozef ti ena bien rezon pou ena lafwa an Zeova! Zeova ti trouv tou linzistis ki so serviter inn andire pandan plizir lane. Li finn regle sa sitiasion-la dan bon moman ek dan bon fason. Zeova pa ti pans zis pou sanz sitiasion Zozef, me osi pou prezerv nasion Izrael ki biento ti pou existe. Nou pou trouve kouma sa pou arive dan enn prosin lartik.

Si ou pe viv enn sitiasion difisil, kitfwa ou pe andir enn linzistis depi plizir lane ek li pa pe fini, pa dezespere. Mazinn Zozef. Zame li’nn aret manifeste labonte, ni limilite, ni landirans, ni aret ena lafwa. Li ti donn Zeova tou bann rezon pou rekonpans li.