INN gagne deux-trois l’année, Roald ek Elsebeth, enn couple ki ti’nn depasse zot quarante an, ti pé vive bien lor plan materiel dan Bergen, ki ti deuxieme pli grand la ville dan Norvège. Zot ena enn tifi ki appel Isabel ek enn garson ki appel Fabian. Zot tou ensam zot ti bien actif dan congregation. Roald ti enn ancien ek Elsebeth ti pionnier, alors ki Isabel ek Fabian ti bann bon proclamateur.

Selman, en Septembre 2009, la famille ti decide pou faire enn kitsoz different​—al preche pou enn semaine dan enn l’endroit retiré. Alors, Roald ek Elsebeth ensam avek Fabian, ki ti ena 18 an, ti voyagé pou al Nordkyn, enn l’endroit ki ti trouve dan region Finnmark, pli la-haut ki Cercle Arctique. La-bas, dan village Kjøllefjord, zot ti preche avek bann frere ek soeur ki ti vinn dan sa l’endroit retiré-la zot aussi pou preché. Roald raconté: “Kan sa semaine-la ti commencé, mo ti senti-moi satisfait ki mo ti’nn reussi faire bann l’arrangement en seki concerne mo travail pou ki mo kapav participe enn semaine entier dan sa l’activité special-la.” Mais plitar pendant sa mem semaine-la, enn kitsoz ti commence tracasse Roald. Ki ti arrivé?

Roald raconté: “Sans ki mo ti pé attann, Mario, enn pionnier ki ti pé servi dan Finnmark, ti demann nou si nou pa ti pou content demenagé pou al aide enn congregation 23 proclamateur, dan la ville Lakselv.” Roald ti bien etonné par sa question-la, parski li pa ti pé attann sa ditou. Li expliké kifer: “Elsebeth ek mo-mem ti deja reflechi lor possibilité pou al servi kot ti bizin plus proclamateur​—mais nou ti pou faire sa plitar, kan bann zenfant ti pou fini quitte lakaz.” Mais selman, sa deux-trois jour ki li ti preche dan sa region retiré-la, Roald ti kapav trouvé ki bann dimoune ti envie aprann pou konn Jéhovah. Zot ti bizin l’aide asterla, pa plitar. Li dire: “Question [sa frere-la] ti bouleverse mo conscience ek mo pa ti mem kapav dormi pendant plusieurs la nuit.” Apré sa, Mario ti amenn Roald ek so famille dan la ville Lakselv, environ 240 kilometre dan sud Kjøllefjord. Mario ti envie ki so bann visiteur trouve sa ti congregation-la par zot-mem.

Dan Lakselv, Andreas, enn parmi deux ancien ki la-bas, ti faire sa bann visiteur-la visite l’endroit ek ti montré zot la Salle du Royaume. La congregation ti bien accueillir zot ek ti dire Roald ek Elsebeth ki zot ti pou bien content si zot famille ti kapav vinn reste la pou aide zot dan predication. Avek enn sourire, Andreas ti dire ki li ti fini arrange enn interview pou enn travail pou Roald ek Fabian! Ki bannla ti pou faire?

Fabian desuite ti dire: “Mo pa envie demenagé pou vinn reste ici.” Li pa ti envie quitte so bann bon camarade avek ki li ti’nn grandi dan so congregation pou vinn vive dan enn ti la ville. Ek aussi, li pa ti encore fini so formation pou vinn enn electricien. Mais, kan ti demann Isabel, (ki ti ena 21 an sa lepok-la), seki li ti pensé lor enn demenagement, li ti dire: “C’est exactement seki touletan mo ti envie faire!” Mais apré, Isabel dire: “Kan mo ti reflechi plus lor la, mo ti demann-mo-mem: ‘Eski c’est vrai-mem enn bon l’idée? Eski mo pa pou mank mo bann camarade? Eski li pa pli bon ki mo reste dan mo congregation kot tou kitsoz pé marche bien ek tou kitsoz stable?’” Ki Elsebeth ti pensé lor sa l’invitation-la? “Mo ti ena l’impression ki Jéhovah ti donne nou famille enn mission, mais mo ti aussi pense nou lakaz ki nou ti fek renové, ek tou seki ti ena ladan, bann kitsoz ki nou ti gagné pendant sa 25 dernier l’année-la.”

Kan sa semaine special-la ti fini, Roald ek so famille ti retourne Bergen, mais zot pa ti kapav arrete pense zot bann frere ek soeur dan Lakselv, enn distance apepré 2,100 kilometre kot zot ti resté. Elsebeth dire: “Mo ti bien prié Jéhovah, ek mo ti reste en contact avek bann camarade ki nou ti faire la-bas. Nou ti partage nou bann photo ek nou bann l’experience.” Roald dire: “Mo ti bizin le temps pou accepté l’idée enn demenagement. Ek aussi, mo ti bizin reflechi si dan la pratik li ti pou possible pou faire sa. Couma nou ti pou gagne seki nou bizin pou vive? Mo ti bien prié Jéhovah ek mo ti koz avek mo famille ek bann frere ki ena l’experience.” Fabian dire: “Plus mo ti reflechi lor la, plus mo ti realisé ki mo pa ti ena okenn raison valable pou dire non. Mo ti prié Jéhovah souvent, ek sa desir pou demenagé-la ti vinn pli fort tigit par tigit.” Ek ki Isabel ti faire li? Pou prepare-li si jamais zot ti bizin demenagé, li ti commence faire pionnier dan so l’endroit. Pendant six mois, li ti faire pionnier ek li ti aussi passe beaucoup le temps pou etudié la Bible personnellement. Apré sa, li ti senti-li pré pou faire sa grand demenagement-la.

Alors ki zot desir pou al servi kot bien bizin bann proclamateur ti grandi, la famille ti prend bann disposition pou realise zot l’objectif. Roald ti ena enn travail ki li ti bien content ek ki ti bien payé. Mais li ti demann congé pou enn an. Selman, so patron ti demann li pou resté ek pou travail a mi-temps​—travail deux semaine, ek six semaine pa travail. Roald dire: “Mo la paye ti bien diminué, mais tou ti marche bien.”

Elsebeth raconté: “Mo mari ti demann moi pou essaye rod enn lakaz dan Lakselv ek pou loué nou lakaz dan Bergen. Sa ti prend beaucoup le temps ek ti demann beaucoup zeffort, mais nou ti reussi. Apré enn certain temps, bann zenfant ti trouve enn travail a mi-temps, ek zot aide nou pou couvert bann depense mangé ek transport.”

Isabel dire: “La ville kot nou ti allé ti tipti, alors pli grand difficulté ki mo ti gagné c’est trouve enn travail ki ti pou soutenir moi dan mo service pionnier. Parfois, sa ti parette difficile.” Kan-mem, Isabel ti faire  bann tipti travail a mi-temps​—neuf en tout pendant premier l’année​—ek li ti reussi couvert so bann depense. Couma sa ti passé pou Fabian? Li raconté: “Pou complete mo l’etude electricien, mo ti encore bizin travail couma enn apprenti. Mo ti faire sa dan Lakselv. Plitar, mo ti passe mo l’examen ek mo ti gagne enn travail a mi-temps couma electricien.”

Marelius ek so madame, Kesia, ti envie zot aussi al servi kot ti bien bizin bann proclamateur. Marelius, ki ena 29 an asterla, dire: “Bann discours ek bann interview ki ti ena dan bann l’assemblée lor service pionnier ti pousse moi pou reflechi lor possibilité pou faire plus dan mo service.” Selman, pou Kesia, ki ena 26 an asterla, li ti trouve sa difficile pou demenagé ek al reste loin ar so famille. Li dire: “L’idée pou al reste loin ar bann dimoune ki mo content, ti faire moi peur.” En plus, Marelius ti travail a plein-temps pou paye loan ki zot ti prend pou zot lakaz. Li dire: “Nou ti bien prié Jéhovah pou aide nou faire bann changement ek grace a so l’aide, nou ti reussi demenagé.” Premierement, zot ti passe plus le temps pou etudié la Bible. Apré, zot ti vann zot lakaz, quitte zot travail ek zot ti demenagé en Août 2011, pou al dan la ville Alta, dan nord Norvège. La-bas, pou soutenir zot dan zot service, Marelius ti travail comptable ek Kesia ti travail dan enn magasin.

Knut ek Lisbeth, enn couple ki dan la trentaine asterla, ti bien touché kan zot ti lire bann recit dan l’Annuaire lor bann ki pé servi kot bien bizin bann proclamateur. Lisbeth dire: “Sa bann l’experience-la ti faire nou reflechi lor possibilité pou al servi dan enn lot pays, mais mo ti hesité parski mo pa ti pensé ki enn dimoune ordinaire couma moi pou kapav faire sa.” Mais kan-mem, zot ti prend bann disposition pou realise zot l’objectif. Knut dire: “Nou ti vann nou l’appartement ek, pou faire l’economie, nou ti al reste kot mo mama. Plitar, pou nou kapav koné couma sa été pou servi dan enn territoire etranger, nou ti al servi pendant enn an dan enn congregation anglais, dan Bergen, ek la-bas, nou ti reste kot mama Lisbeth.” Enn tipé apré, Knut ek Lisbeth ti’nn senti-zot pré pou demenagé, ek zot ti faire vrai-mem enn grand demenagement​—zot ti al Ouganda. Zot ti retourne Norvège deux mois par an pou travail. Coumsa, zot ti ena assez l’argent pou vive ek pou preche a plein-temps en Ouganda pendant le reste l’année.

Ki bienfait sa bann frere ek soeur bien disposé-la inn gagné? Roald dire: “Dan sa l’endroit retiré-la, nou ti passe beaucoup plus le temps en famille ki nou ti passé dan Bergen. Nou famille inn vinn pli proche. Kan nou trouve progré spirituel ki nou bann zenfant inn faire, nou considere sa couma enn benediction.” Li ajouté: “Ek aussi, asterla, nou ena enn l’attitude pli equilibré lor bann kitsoz materiel. Zot pena sa l’importance couma nou ti pensé-la.”

Elsebeth ti trouve l’importance pou aprann enn lot langue. Kifer? Dan territoire congregation Lakselv,  ena enn village ki appel Karasjok, kot la plupart Sami resté​—bann Sami c’est bann dimoune ki reste dan nord Norvège, Suède, Finlande ek Russie. Alors, pou li kapav koz avek sa bann dimoune-la, Elsebeth ti prend enn cours pou aprann langue bann Sami. Asterla, li kapav gagne enn conversation simple dan sa langue-la. Eski li content so nouveau territoire? Li dire avek enthousiasme: “Mo pé conduire six l’etude la Bible. A part ici, mo pa trouve okenn lot l’endroit kot mo ti pou content été!”

Fabian, ki asterla pionnier ek assistant ministeriel, raconté couma li ek Isabel ti aide trois adolescent dan zot nouveau congregation. Sa bann jeune-la ti bizin l’encouragement pou implik-zot plus dan bann activité congregation. Asterla, toulé-trois jeune, actif dan zot ministere. En realité, deux ladan inn prend bapteme ek ti faire pionnier auxiliaire en Mars 2012. Enn parmi sa bann adolescent ki ti’nn eloigné ar la verité ti remercié Fabian ek Isabel parski zot ti aide li pou “vinn fort lor plan spirituel.” Fabian dire: “Mo ti bien touché kan li ti dire sa. C’est vrai-mem enn la joie pou aide enn kikenn!” Isabel dire: “Dan sa [service-la], mo finn vrai-mem ‘gouté ek guetté ki Jéhovah Li bon.’” (Ps. 34:8) Li ajouté: “Ek en plus, servi ici c’est vrai-mem enn plaisir!”

Marelius ek Kesia asterla vive dan enn fason pli simple, mais zot la vie beaucoup pli riche. Dan congregation Alta, kot zot finn allé, ena asterla 41 proclamateur. Marelius dire: “Kan nou reflechi lor nou la vie, sa encourage nou pou trouvé ki quantité nou la vie finn changé. Nou remercié Jéhovah ki nou kapav servi Li en tant ki pionnier ici. Pena nanyé ki kapav donne nou plus satisfaction.” Kesia ajouté: “Mo finn aprann pou ena plus confiance en Jéhovah, ek Li finn prend nou bien soin. Mo finn aussi trouvé ki vive loin ar mo bann famille aide moi pou apprecié encore plus bann moment ki nou passé ensam. Jamais mo finn regrette nou decision.”

Ek Knut ek Lisbeth, ki’nn al Ouganda, ki’nn arrive zot? Knut raconté: “Sa ti prend le temps pou nou adapté ar enn nouveau l’environnement ek ar enn nouveau culture. De temps en temps, nou gagne probleme de l’eau ek courant, ek aussi probleme l’estomac, mais nou kapav conduire quantité l’etude la Bible ki nou envie!” Lisbeth dire: “Zis trente minute ar l’endroit kot nou resté, ena bann territoire kot bann dimoune jamais finn tann la bonne nouvelle. Pourtant, kan nou al la-bas, nou trouve bann dimoune ki lire la Bible ek zot demann nou pou enseigne zot. Enseigne sa bann dimoune humble-la pou konn message ki ena dan la Bible, c’est enn la joie ki pa kapav comparé!”

Surement, nou Chef Jésus Christ ki dan le ciel bien content kan li observé couma predication ki li ti commencé, pé contigné dan beaucoup plus l’endroit lor la terre! Oui, c’est vrai-mem enn la joie ki tou bann serviteur Bondié ena pou porte-zot-mem volontaire pou obeir l’ordre ki Jésus ti donné pou “faire bann disciple parmi bann dimoune dan tou bann nation.”​—Mat. 28:19, 20.