Nou tou nou enn sel fami parski nou bann desandan premie zom, Adan. Mem si nou atann ki bann manb enn fami kontan ek respekte sakenn zot kamarad, azordi li difisil pou trouv sa kalite lamour-la. Me se pa sa ki nou Bondie ki ranpli ar lamour anvi.

“To bizin kontan to prosin kouma tomem.”​—LEVITIK 19:18.

“Kontign kontan zot bann lennmi.”​—MATIE 5:44, NW.

Remarke kouma Bondie dekrir lamour dan bann Lekritir Sakre dan 1 Korintien 13:4-7:

“Lamour bien pasian, lamour li bon.”

Reflesi lor la: Ki ou resanti kan lezot montre pasians ek bonte anver ou ek pa ankoler kan ou fer bann erer?

Lamour “li pa zalou.”

Reflesi lor la: Ki ou resanti kan lezot touletan pe dout ou ouswa zalou ou?

Lamour “li pa egois.”

Reflesi lor la: Ki ou resanti kan lezot dispoze pou respekte ou lopinion ek pa touletan insiste pou pran kont zis zot lopinion?

Lamour pa “gard rankinn.”

Reflesi lor la: Bondie pre pou pardonn bann dimounn ki’nn fer pese, me ki’nn repanti. “Li pa pou fer bann repros ek Li pa pou gard nanye dan so leker.” (Psom 103:9, NW) Nou kontan kan enn kikenn ki nou finn ofanse pardonn nou. Alor, nou bizin pre pou pardonn lezot kan zot ofans nou.​—Psom 86:5.

“Lamour pa trouv plezir dan lemal.”

Reflesi lor la: Kan enn move kitsoz ariv nou, sa fer nou leker fer mal ki lezot kontan ki nou pe soufer. Alor, nou pa kontan kan lezot gagn bann difikilte, mem si zot finn mal azir anver nou.

Pou nou gagn benediksion Bondie, nou bizin kontan lezot ninport ki laz, nasionalite, ouswa relizion zot ete. Enn fason ki nou kapav montre lamour se kan nou ed bann ki bizin led.