Eski Bondie Ekout Nou Bann Lapriyer?
Eski ou finn deza gagn linpresion ki Bondie pa’nn ekout ou lapriyer? Si wi, ou pa tousel. Boukou dimounn finn priye Bondie pou ed zot, me zot problem ankor lamem. Eski savedir ki Bondie pa pe ekout nou lapriyer? Non! Labib donn nou lasirans ki Bondie ekout nou lapriyer si nou priye Li dan fason ki bizin. Anou gete ki Labib dir.
BONDIE EKOUTE.
“Twa ki ekout lapriyer, ver twa, tou sort kalite dimounn pou vini.”—Psom 65:2, NW.
Mem si zot pa krwar ki enn kikenn pou vremem ekout zot, sertin dimounn priye parski sa fer zot santi zot bien. Me lapriyer se pa zis enn kitsoz ki nou fer pou ki nou santi nou bien kan nou pe fer fas ar bann problem. Labib donn nou sa lasirans-la: “LESEGNER [“Zeova,” NW] * pre pou ed dimoun ki apel li e ki dimann so led ar sinserite . . . li tann zot soufrans.”—Psom 145:18, 19.
Alor, nou kapav sir, ki Zeova ekout lapriyer bann ki ador Li. Avek boukou lamour, Li ti dir: “To pou apel mwa ek to pou vinn priye mwa, ek mo pou ekout twa.”—Zeremi 29:12.
BONDIE ANVI KI OU PRIYE LI.
“Persevere dan lapriyer.”—Romin 12:12, NW.
Labib ankouraz nou pou “priye toultan” ek pou ‘priye dan tou sirkonstans.’ Li kler, ki Zeova anvi ki nou priye Li.—1 Tesalonisien 5:17; Efezien 6:18.
Kifer Bondie anvi ki nou priye Li? Anou pran enn lexanp: Enn papa kontan kan so zanfan demann li so led. Li vre ki enn papa deza kone ki so zanfan bizin ouswa seki li resanti, me kan li tann so zanfan demann li so led, sa montre li ki so zanfan fer li konfians ek ki zot pros ar zot kamarad. Li parey, kan nou priye Zeova, nou montre Li ki nou fer Li konfians ek ki nou anvi vinn pros ar Li.—Proverb 15:8; Zak 4:8.
BONDIE VREMEM GAGN OU TRAKA.
“Zet tou zot traka lor Li, parski Li trakase pou zot.”—1 Pier 5:7, NW.
Bondie anvi ki nou priye Li parski Li kontan nou ek Li gagn nou traka. Li bien konn nou bann problem, ek Li anvi ed nou.
Toutlong so lavi, Lerwa David ti priye Zeova pou ed li ek li ti dir Zeova seki li panse ek resanti. (Psom 23:1-6) Ki Bondie ti panse lor David? Bondie ti kontan David ek ti ekout so bann lapriyer. (Zistwar Bann Apot 13:22) Li parey pou nou, Bondie ekout nou bann lapriyer parski Li gagn nou traka.
‘MO KONTAN ZEOVA PARSKI LI FINN TANN MO LAPRIYER’
Sa bann parol-la finn ekrir par enn ekrivin Psom dan Labib. Li ti sir ki Bondie ti ekout so bann lapriyer ek sa ti ed li boukou. Li ti santi li pros ar Bondie ek li ti gagn lafors pou fer fas ar bann difikilte ek lapenn ki li ti ena.—Psom 116:1-9.
Kan nou sir ki Bondie ekout nou bann lapriyer, nou pou kontign priye Li. Anou get lexanp Pedro, ki viv dan lenor Lespagn. Li ti perdi so garson ki ti ena 19 an dan enn aksidan larout. Dan so lapenn, Pedro ti devid so leker ar Bondie ek ti priye plizir fwa pou gagn konsolasion ek soutien. Ki ti arive? Pedro dir: “Zeova ti reponn mo bann lapriyer, kan li ti servi nou bann frer ek ser Kretien pou donn mwa ek mo madam konsolasion ek soutien.”
Souvan Bondie reponn nou lapriyer, kan Li servi bann kamarad ki kontan nou pou donn nou soutien ek konsolasion.
Mem si zot pa finn regagn zot garson, lapriyer finn bien ed Pedro ek so fami. So madam, María Carmen, dir: “Lapriyer finn ed mwa pou andir mo sagrin. Mo ti kone ki Zeova ti konpran mwa parski kan mo ti pe priye Li, mo ti santi enn gran lape.”
Seki Labib ek sertin dimounn dir, montre dan enn fason kler ki Bondie ekout bann lapriyer. Me selman, li kler ki Bondie pa reponn tou lapriyer. Kifer Bondie reponn zis sertin lapriyer?
^ par. 5 Dan Labib, nom Bondie se Zeova.—Psom 83:18, NW.
