PƐ MƐDÃPIA 03

Kea Ii Wɔ̃ Lɛ Baabo A Geea Si Wana Ka?

À DA YƐƁO PÍÉ

Wedɔwe wa liewe bunuzɛ dɔɔ lɛ Baaboa yi. Ɓaa naa i wɔ̃ lɛ Baabo a zɔ̃ɔɔ dɔ leĩ, kɛɛ luo gbũu kaa lɛ gaga kɛ i wɔ̃ lɛ a geea si wana ka. Ii bɛi wedɔwe wa liewe ni lɛ o kii ziia yia sii wana ka? Kea ii wɔ̃ lɛ Baabo a gee e gbɛ̃a kɛɓe kɛ geli ka dɛɛ ka ɛ̃ɛ̃ tooliezaa mɔɔ si wana ka? Mia lɛɛkɔɛi bunuzɛ oo si wana ka. Ko lɛ gɛ̃ e kɛa ii bɛi a sii wana kaa.

1. Kea wɔ̃ ni lɛ ko gee Baabo yia lɛ kpokpo ɓo wana ka?

Baaboa laa zɔ̃ɔ kelɛ wɔ̃ a geea “seĩ lɛ wana ka.” (Ikilisiase 12:10) Lɛɛ wɔ̃ gee e gbɛ̃a wɔ̃ ni lɛ o kɛ mɔɔ wa mia o kɛ ɓea mɔ. (Luu 1:3; 3:1, 2 gee.) Wɔ̃ zii gãɓomia wa wɔ̃ zii-zii yinaamia bunuzɛ waa wee a mɔ kelɛ wɔ̃ lɛ Baabo a gee e gbɛ̃a luo kpanazɛ ni, mia, ɛ̃ɛ̃ lɛ gbɛɛ gbɛɛ, wa wɔ̃ ni lɛ o kɛɛ mɔɔ mɔ kelɛ lɛ wana ka.

2. Mɛ e kɛ lɛ kɔaa zo dɔ wɔ̃ Baabo a geea mɔ ye bɛ̃ɛ lɛ lɛ ziia ka?

Zi bunuzɛ kaa, Baaboa lɛɛ wɔ̃ to lie aa gee. A gɔ̃a gɛ̃, e pa wɔ̃ ni lɛ mia o mɛdã e gbɛ̃a kɛɓe ɛ̃ɛ̃ lɛi wa tãã o mɔɔ wɔ̃ mɔ. Wɔ̃ a gee e gbɛ̃a wɔ̃ ni o kilia mɔɔ, mia bunuzɛ oó gbaa kɛ a sipia wana ka e bɛ̃ɛ luo ka. E kɛ bɛ̃ɛ kilia, wɔ̃ lɛ mia o gee dɛɛ ka e gbɛ̃a kɛɓe ɛ̃ɛ̃ lɛi wa tãã o mɔɔ, laa zɔ̃ɔ kelɛ wɔ̃ lɛ Baabo a geea lɛ wana ka. Mia oo bɛi o “zo dɔɔ a mɔ dɛɛ ka ɛ̃ɛ̃ toakili ka.”—Sãã 111:8.

3. Mɛ e kɛ lɛ kɔa wɔ̃ lɛ Baabo a gee lɛɛ lo kɛɛ si wana ka?

Tooliezaa wɔ̃ * bunuzɛ lɛ Baaboa yi, e gbɛ̃a “wɔ̃ ni lɛ oó kɛ nɛa mɔ.” (Aazaya 46:10) E wɔ̃ bunuzɛ to lie gbeĩ a gee, kɛ o to kɛpia. Zeniia, e wɔ̃ bunuzɛ gee mɔ e gbɛ̃a wɔ̃ ni lɛ o kɛpia pɛnɛɛ mɔ. Pɛ mɛdãpia e kea yia, koo lo tooliezaa wɔ̃ ni lɛ o Baaboa yia mɛnyɛɛ. Zi laa wana kaa lɛ lepaazɛ!

A PIE FOO

Zi lɛ kɛɓe ɛ̃ɛ̃ lɛi wa tãã wɔ̃ o pɛnɛɛ, o weea wɔ̃ lɛ Baabo a geea mɔ, wa tooliezaa wɔ̃ ni lɛ Baabo a gee, lɛ o mia zo sia mɛnyɛ.

4. Kɛɓe ɛ̃ɛ̃ lɛi wa tãã wɔ̃ lɛɛ wee Baaboa wee mɔ

Mɔ zeea, mia bunuzɛ o kɛ a geepia kelɛ kpoulaa yaa lɛ pɛ do la. Ko VILOA gɛ̃.

VILO: Kpoulaa Dũu Lɛ Ɓɔɔ (1:13)

Ko wɔ̃ lɛ a bɛ̃ɛ e kɛa Zoo kiia yi, lɛ kɛɛ 3,500 aa diea gɛ̃. Ko Zoo 26:7 gee, ɛ̃ɛ̃ kɛ ko wɛĩlɔɔ e kea yiɓo:

A gee o ɓo kelɛ kpoulaa dũu “lɛ nɔ ɓɔɔ,” mɛ e kɛ lɛ lɛ lepaazɛ?

Mia oó gbaa kɛ yii niɛ lɛɛyii yi wɔ̃ɔ yimapia e toakili kɛɛ 1800 e ɓɔ. Kɛɛ, wɔ̃ lɛ Baabo a gee lɛ kɛɛ bunuzɛ aa diea gɛ̃. Ko Zoo 36:27, 28 gee, ɛ̃ɛ̃ kɛ ko wɛĩlɔɔ ni o kea yiɓo:

Mɛ e kɛ lɛ yii niɛ lɛɛyii yi wɔ̃ yiɓo-kɔ seĩ-seĩ e kea e i zo si?
Kea Baaboa lonipia ni lɛ kɔa gee e kea lɛɛ gbũ i mɔ i wɔ̃ lɛ a geea si wana ka?

5. Baaboa e wɔ̃ kpanazɛ ni to mɔ lie a gee

Ko Aazaya 44:27–45:2 gee, ɛ̃ɛ̃ kɛ ko wɛĩlɔɔ e kea yiɓo:

Mɛɛ wɔ̃ lɛ Baaboa a gee mɔ, lɛ kɛɛ 200 e die kɛ Babɛlɔu yi e tĩa sie?

Ko VILOA gɛ̃.

VILO: Baaboa E Babɛlɔu Yisie Wɔ̃ Gee Mɔ (0:58)

Wɔ̃ zii e weea mɔ kelɛ Kĩĩ Sawɔlɔ lɛ e kɛ Pɛsiaa, wa la gele-gɔ̃-mia o kɔ e die mɔ Babɛlɔu la kɛ aa to kɛɛ 540 ka Kɛlɛi e nu. O yii lɛ a niɛ e kɛa sɛlɛɛ mɔɔ kpaa kpɔ zi gbɛɛ ka. Ye o da sɛlɛɛ yi gala lɛ a le e to e ɓoo kaa kaa, o sɛlɛɛ kũ lɛ oó gbaa gele nɔɔfe gɔ̃ɔ. Kɛɛ 2,500 lɛ aa diea, Babɛlɔu kpɔayi lɛ nɔ ɓa gɛ̃ pɛnɛɛ. Ko wɔ̃ lɛ Baabo a gee mɔɔ gɛ̃.

Ko Aazaya 13:19, 20 gee, ɛ̃ɛ̃ kɛ ko wɛĩlɔɔ e kea yiɓo: