ehova ese tanobada na taunimanima e henidia. Momokani, tanobada na ita eda noho gabuna. Una dainai, Dirava ese Adam bona Heva e karadia na dia guba ai bae noho totona​—badina Dirava ese aneru momo vada e karadia, guba ai bae noho totona. (Iobu 38:4, 7) To, Dirava ese Adam na paradaiso mai hairaina ta ladana, Eden umana ai e atoa. (Genese 2:15-17) Iehova ese tano na Adam bona gabeai baine havaradia besedia e henidia, bae noholaia hanaihanai totona.​—Salamo 37:29; 115:16 duahidia.

Matamana negana ai, Eden umana sibona mo na paradaiso. Adam bona Heva na besedia bae havara, bena tanobada bae hahonua. Gabeai, idia ese tanobada idoinai bae biagua, bona paradaiso ai bae halaoa. (Genese 1:28) Tanobada na nega ta basine dika diba. Ia na taunimanima ese bae noholaia hanaihanai gabuna.​—Salamo 104:5 duahia.

Adam bona Heva ese Dirava e gwau-edeede henia dainai, Iehova ese uma murimurina ai e atodia. Una negai, paradaiso vada e boio, bona taunimanima ta dia heḡereḡere, paradaiso baine havaraia lou totona. Baibel eto: “Tanobada na kara dika taudia imadia ai vada e atoa.”​—Iobu 9:24.​—Genese 3:23, 24 duahidia.

Iehova be doini e uramu taunimanima ese tanobada bae noholaia, a? Oibe! Ia na Siahu-idoinai Diravana dainai, ena ura baine haḡuḡuru momokani. (Isaia 45:18) Ia ese tanobada na paradaiso ai baine halaoa lou, bona taunimanima ese bae noholaia.​—Salamo 37:11, 34 duahidia.

Dirava ena King, Iesu, baine lohia negana ai, tanobada na paradaiso ai baine halaoa lou. Tuari ta ladana, Aramagedono ai, Iesu ese Dirava ena aneru baine gunalaidia, Dirava e inai heniamu taudia iboudiai bae haoredia totona. Bena Iesu ese Satana na  guri dobu-masemasena lalonai baine tahoa dobi​—⁠unuseniai baine noho ela bona laḡani 1,000 bae ore. Dirava ena taunimanima na Iesu ese baine hakaudia bona baine gimadia dainai, idia na bae roho mauri. Idia na tanobada Paradaisona ai, mauri hanaihanai bae moalelaia.​—Apokalupo 20:1-3; 21:3, 4 duahidia.

Edena negai Dirava ese dika idauidau na tanobada latana amo baine haoredia? Iesu ese nega dokona baine kahirakahira “toana” na e gwauraia hedinarai. Hari, tanobada heḡeḡemadai, taunimanima edia mauri e hadikamu karadia e varamu ese e hahedinaraimu, ita na ina “nega oromana” dokonai ta nohomu.​—Mataio 24:3, NW.​—Mataio 24:7-14, 21, 22 duahidia.

Iesu na laḡani 1,000 lalonai, guba amo, tanobada baine lohiaia neganai, ia ese hisihisi baine haoredia. (Isaia 9:6, 7; 11:9) Iesu na King ḡaukarana sibona mo basine karaia, to Hahelaḡa Tauna Badana ena ḡaukara danu baine karaia. Una negai, Iesu ese Dirava e lalokau heniamu taudia edia dika baine gwaudiatao. Momokani, Dirava na Iesu amo gorere, buruka, bona mase baine haoredia.​—Isaia 25:8; 33:24 duahidia.

Dirava ena ura e badinamu taudia na Paradaiso ai bae noho. (1 Ioane 2:17) Iesu na ia murinai e rakava taudia e siaidiava, manau taudia bae tahudia bona Dirava ese baine abidia dae daladia bae hadibadia. Hari, Iehova na taunimanima milioni momo e heḡaeḡaelaidiamu, vaira negai baine havaraia tanobada Paradaisona ai, bae noho totona. (Sefania 2:3) Iehova ena Witnes taudia ese Kingdom Hall lalodiai, taunimanima e hadibadiamu edena dalai headava tauna o hahine namona, eiava tama o sina namona ai, baela totona. Ma unuseniai, natu na tama sina ida Dirava e toma henia dihomu, bona sivarai namodia ese edia mauri bae hanamoa daladia e dibamu.​—Mika 4:1-4 duahidia.