Nëjkx parë xyʼixët diʼib tmëminy

Nëjkx mä myiny tukëʼëyë titulo

MYËDËDUJK PËKY

Wiˈix tyëgatsyë jukyˈäjtën ko uˈunk jyaˈty

Wiˈix tyëgatsyë jukyˈäjtën ko uˈunk jyaˈty

“Uˈunk ënäˈk yëˈë tuˈugë kumäˈäyën diˈib tsoˈomp mä Jyobaa.” (Salmo 127:3)

Ko tim jawyiimbë uˈunk myaxuˈunkˈaty, mbäät ja tääk teety jyantsy xyondäˈäktë, per nan mbäät tmëkjawëdë. Extëm ko tiempë dyajtundë ets ja jyot myëjää parë tkuentˈattë ja yˈuˈunk. Nan mbäät tmëdattë jotmay mët ko yˈanuˈkxëdë o ko tëgatsy nyayjawëdë. Pääty nimajtsk mbäät dyajtëgatstë wanaty ja jyukyˈäjtënë parë tkuentˈattët duˈun ja yˈuˈunk ets duˈun ja tsyënäˈäy jyukyˈäjtën. ¿Wiˈix mbäädë Biiblyë kyäjpxwijënë pyudëkëdë parë tyäˈädë jotmay twinguwäˈägëdët?

1 IJXWËˈËM WIˈIX JA MJUKYˈÄJTËN TË TYËGATSY

BIIBLYË JYËNAˈANY: “Diˈibë myëdäjtypy ja tsojkën, myëdäjtypy ja maˈxtujkën es oyjyaˈayˈaty [...], kyaj tˈëxtäˈäy diˈibë yëˈëyë tyukˈoyˈatëp këˈëm, kyaj wyinˈakëty” (1 Korintʉ 13:4, 5). Pën yëˈë tim jawyiimbë mˈuˈunk të xypyaaty, mbäät yëˈëyë xymyëwiin xymyëjotë. Ets mbäädë net ja mjamyëët nyayjawëty ko jagam ëxkëˈëm xypyëjtaˈaky, pääty oy ko xyjamyatsët ko ja mjamyëët nan tsyejpy parë mëët myajpäädët. Ko mmaˈkxtukët ets ko mˈoyjyaˈayˈatët mbäät xytyukˈixy ko myajtëgoyˈajtypy ja nyaybyudëkë ets ko mëjjäˈäwëp ko tkuentˈaty ja maxuˈunk.

“Miitsëty kasäädë yetyëjkëty, mëmaˈxtuktë mnëdoˈoxyëty. Wintsëˈëgë extëm yëˈë pyaatyëty.” (1 Peedrʉ 3:7.) Mijts uˈunkteety, tsojkëp xyjaygyukët ko tyam ja mnëdoˈoxy mëk tyunäˈäny parë tkuentˈatët ja maxuˈunk. Ets mbäät nyayjawëty ko jantsy mayë tyuunk, yˈanuˈkxë, o tmëmay tmëdäjy tijaty patëp ttunët. Pääty, mbäät näˈäty mdukjotˈambëkyëty, per mëmaˈkxtuk, mët ko “diˈib kyaj pojën jyotˈambëky mas niˈigyë yˈoyëty këdiinëm tuˈugë yetyëjk diˈib kumëjää” (Proverbios 16:32). Pëkë kuentë wiˈix yaˈixy yajpääty ets mmoˈoy tijaty yajtëgoyˈajtypy (Proverbios 14:29).

DIˈIB MBÄÄT XYTYUNY:

  • Mijts uˈunkteety: Pudëkë mnëdoˈoxy parë xykyuentˈatët ja maxuˈunk, axtë pën yajkuentˈatäämp koots. Ix wiˈix mbäät mas niˈigyë mdiempë xyajnaxy mëdë mnëdoˈoxy ets ja mˈuˈunk

  • Mijts uˈunktääk: Ko mnyaˈay tkuentˈatäˈänët ja maxuˈunk, kupëk. Ets pën kyaj oy tkuentˈaty, kyaj xyˈanëëmët ko kyaj tjaty, tukniˈˈixë tsuj yajxon wiˈix mbäät ttuny

2 YAˈIT MËKË MTSËNÄˈÄY MJUKYˈÄJTËN

BIIBLYË JYËNAˈANY: “Nimajtsk tuˈugyë yajpäätëty ets tuˈugyë jyaˈayˈatëty” (Génesis 2:24, Mʉgoxpʉ ja̱ noky mʉdiˈibʉ jyaayʉn yʉ Moisés). Yaˈit mwinmäˈänyoty ko mijts mët ja mjamyëët duˈunyëm “nimajtsk tuˈugyë” myajpäättë, oy të xypyäättë tuˈugë mˈuˈunk. Pääty, tunë mëjää parë mëk xyaˈitëdë mtsënäˈäy mjukyˈäjtën.

Mijts toxytyëjk, mmoˈoyë dyoskujuyëmë mnyaˈay ko mbudëkëty. Pes duˈumbë ää ayuk “yajtsoybyajtp” (Proverbios 12:18). Ets mijts yetyëjk, anëëmë ja mnëdoˈoxy ko mëk xytsyeky, ko myajtsobatypy ets ko mëjwiin kajaa xymyëjjawë tijaty tyuumpy mä ja familyë (Proverbios 31:10, 28).

“Nipën jeˈeyë tkaˈëxtäˈäyët diˈibë yëˈë këˈëm tyukˈoyˈatëp, per nandëˈën tˈëxtäˈäyët esë wiinkpëty ttukˈoyˈattët.” (1 Korintʉ 10:24.) Xëmë tijaty xytyunët diˈib tyukˈoyˈatëp ja mjamyëët ets mmëjjawë tijaty tyuumpy. Juuttë tiempë parë mgäjpx mmaytyäˈäktët ets mmëdooˈit wiˈix mnayˈanëˈëmxëdë. Ets mä mˈit mtsëënëdë, kyaj jeˈeyë mijts mnaymyëmay mnaymyëdajëdët. Ix tijaty yajtëgoyˈajtypy ja mjamyëët. Pesë Biiblyë jyënaˈany: “Katë mnayjyëjpkugäjxëdë nixim niyam, ni ja yetyëjk es ni ja toxytyëjk” (1 Korintʉ 7:3-5). Nimaytyäˈäktë yajxonë tyäˈädë jotmay. Ko mmaˈkxtuktët ets mnayjaygyukëdët, ta oy mtsëënëdët.

DIˈIB MBÄÄT XYTYUNY:

  • Yajnaxë tiempë yëˈëyë mët ja mjamyëët

  • Kyaj mëjwiin kajaa tsyekyëty parë xyaˈixëdët ko mnaytsyojkëdëp, mbäät mnaymyoˈoyëdë tuˈugë regalë o xykyëxjäˈäyët tuˈuk majtskë ayuk nekykyëjxy

3 TUKNIˈˈIXË JA MˈUˈUNK

BIIBLYË JYËNAˈANY: “Të mdimmutskuˈunkˈaty të xynyijawë ja Diosë jyaaybyajtën. Yëˈë mduknijawëdëp es myajnëjxëdët mä ja nitsokën” (2 Timotee 3:15). Niwinmayë wiˈix xyaˈëxpëkäˈäny ja mˈuˈunk. Jamyats ko mä kyajnëm myaxuˈunkˈaty, mëjwiin kajaa tijaty tjaty. Extëm nˈokpëjtakëm, desde ko yˈity mjodoty, mbäät mˈyoˈkmëdoyëty ets nan mbäät nyayjawëty extëm mnayjawëty. Tukmëyujjë letrëkäjpxk desde maxuˈunk, pes oy tkajaygyukë, mbäät pyudëkëty parë ttsojkënyëˈatëdë letrëkäjpxk ko yaˈknët.

Kyaj mwinmayët ko tim mutsknëmë mˈuˈunk parë xytyuknijawëdë Dios. Wyinduuy xymyënuˈkxtäˈägëdë Jyobaa (Deuteronomio 11:19). Ko mëët mˈëyëˈëk mguyatët, tukmëtmaytyäˈäk tijatyë Dios të ttuny (Salmo 78:3, 4). Mientrës ja mˈuˈunk yeeky pyety, pyëkaambyë kuentë ko mijts mëk xytsyekyë Jyobaa ets nanduˈun tjatäˈäny ttsokëdë Jyobaa.

DIˈIB MBÄÄT XYTYUNY:

  • Amdowë Jyobaa wijyˈäjtën parë mˈuˈunk xynyëˈëmoˈoy xytyuˈumoˈoyët

  • Nikäjpxëmbitë ää ayuk diˈib jëjpˈam parë ja mˈuˈunk tsojk tjatët