Na punkjꞹ ntee unꞹji nguenrra ke kja o nitsjimi ñe kja o templo nu ja poji dya jichiji kʼo mama ne Biblia, ma pje kjogꞹji dya dyønbʼꞹji ma bʼꞹnji na joo, ngekʼua dya kja nee ra mojinu. ¿Pjenga na joo ri maa nu ja jmurꞹji yo testigo e Jehová? ¿Pje ra jitsʼijinu?

Jango ri jmurgojme, yo ntee yo pojinu sʼiyaji in dyojui ñe pjøsʼꞹji. Kja kʼe siglo dʼaja, kʼo cristiano mi jmurꞹji kja congregación, mi matrʼꞹji Mizhokjimi, mi xørꞹji o jñaa ñe mi potka pjøsʼꞹji (Hebreos 10:24, 25). Kʼo cristiano mi jingua me mi sʼiyaji o dyoji xo me mi joji na joo (2 Tesalonicenses 1:3; 3 Juan 14, TNM). Ixi nge kʼo ri kjagojmedya ma ri jmurgojme.

Na joo ke ra kjaji kʼo mama ne Biblia. Mi jingua, ma mi jmurꞹji yo kjuarma, mi pojinu bʼɇzo, nrrinxu ñe tsʼitrʼi. Mi bʼꞹbʼꞹ bʼɇzo kʼꞹ mi jichiji o kjuarma ja rgua tsjaji kʼo mi mama o jñaa e Mizhokjimi. Nudya, xo ri kjagojme ja ma tsjajikʼo (Deuteronomio 31:12; Nehemías 8:8). Nu ja ri jmurgojme, kʼo pojinu to̱nji trjo̱njo̱, ma kjaji trʼønꞹ pasʼꞹji o dyɇji unꞹji comentario (Hebreos 10:23).

Kʼo jitsʼkojme nu ja ri jmurgojme pjøxkꞹjme ra kreojme Mizhokjimi. Na nu paa kʼe apóstol Pablo go xipji na congregación: “Me ri nee ra chjɇji. Ri nee ra jitsʼiji kʼꞹ ya xo o jitsi Mizhokjimi, kʼua ja kjaa angeze, ngekʼua xo ra zɇzhi in mꞹbʼꞹji. Ri nee ra bʼꞹbʼꞹ kʼua ja in ka̱ra̱ji ngekʼua ra mⱥjⱥ in mꞹbʼꞹgo. Xo ñetsʼkʼeji xo ra mⱥjⱥ in mꞹbʼꞹgeji” (Romanos 1:11, 12). Ma ri pojme kja reunión, ri zenguajme ñe ri ñagojme ko yo in kjuarmajme, nujyo kjakꞹ ra zɇzhi in mꞹbʼꞹjme ngekʼua ra sɇchijme yo nrrumꞹ ñe ra kjajme kʼo mama ne Biblia.

Ri zonkʼꞹjme ri mage nu ja ri jmurgojme. Me ra mⱥkjojme ma ra jantrʼkʼajmenu. Dya pje ri tsjontrʼꞹ, dya xo ra dyøtkʼꞹji merio.

• Nzakja kʼo kjuarma kʼo mi jmurꞹ mi jingua, yo padya, ¿pje ri kjagojme ma ri jmurgojme?

• ¿Ja ga mbøxkꞹji yo reunión?